Tukumbajayi Mutshipu Wetu Ku Dituku Ne Ku Dituku

¹ Mufundi wa misambu Davidi wakadiumvua musakibue bua kuambila Yehowa ne: ‘Nengimbe misambu ya kutumbisha nayi dîna diebe tshiendelele, bua kumana mitshipu yanyi ku dituku ne ku dituku.’ (Mus. wa 61:⁠8) Davidi uvua mumanye ne: padi muntu wenza mutshipu, udi uwenza ku budisuile menemene. Pabi, uvua mumanye kabidi ne: bikalaye mua kuenza mutshipu, uvua muenzejibue bua kuukumbaja. Nansha nanku, uvua usamuna Yehowa bua muvuaye mupete mushindu wa kukumbaja mitshipu yende ku dituku ne ku dituku.

² Patuvua baditshipe kudi Yehowa, nku budisuile buetu kutuvua benza mutshipu wa kukumbaja disua diende. Tuvua badipidie ne bateke mudimu wa Yehowa pa muaba wa kumpala mu nsombelu wetu. (Luka 9:23) Ke bua tshinyi tudi petu ne bua kukumbaja mutshipu wetu ku dituku ne ku dituku. (Muambi 5:​4-6) Dimanyisha dia patoke dituakenza dîba dia batismo wetu didi ne bua kumueneka mu nsombelu wetu mujima, bamanye se: ‘Batu bajukula ne mukana bua kupeta lupandu.’ (Lomo 10:10) Ebi bidi bikongoloja mudimu wa kuamba kua lumu luimpe. (Eb. 13:15) Nsombelu wa muntu ne muntu mmushilangane bikole, kadi tudi tulama bonso mu lungenyi mushinga wa kumanyisha lumu luimpe kudi bakuabu ku dituku ne ku dituku.

³ Tukebayi mishindu ya kuyisha dituku dionso: Dimanyisha lumu luimpe kudi muntu kampanda ditu dituala disanka. Bua kuenza dimanyisha edi dituku dionso, tudi ne bua kukeba mishindu ya kuyisha musangu wonso utudi mua kuenza nunku. Aba badi badibamba bua kufila bumanyishi bua mu mpukapuka pa miaba yabu ya mudimu, mu tulasa, kudi bena mutumba nabu anyi kudi bantu bakuabu badibu bapetangana nabu dituku dionso batu bapeta bikondo bia disanka. Tudi mene mua kufila bumanyishi pa kufunda mukanda anyi ku diela nshinga. Pa kubabidila mishindu yonso eyi ne pa kudilamina tshikondo tshia kufila bumanyishi ku tshiibi ne ku tshiibi ne kuenza makumbulula, netupete pamu’apa disanka dia pa buadi didi muntu upeta pa kulombola dilonga dia Bible dia ku nzubu. Eyowa, tudi mua kukeba mishindu ya kuyisha dituku dionso.

⁴ Muanetu wa bakaji kampanda wakaditua mu dibala broshire wa Tukonkononayi Mifundu dituku dionso dîba dia diikisha. Wakalomba muena mudimu nende mukaji bua kubala mvese wa dituku pamue nende, ne ebi biakafikisha ne lukasa luonso ku dilonga dia Bible ne mukaji au. Bavua balonga mu tshitupa tshia dîba dituku dionso, misangu itanu ku lumingu. Muena mudimu nabu mukuabu mulume wakabambisha dilonga diabu dia ku dituku ne ku dituku. Wakafika ku didimanyisha bu muanetu wa balume, kadi katshivua uyisha. Lukunukunu lua muanetu wa bakaji eu luakamunyukula, ne wakapetangana ne mukulu bua kupetulula makanda bua mudimu wa buambi. Ku dijinga diende dia kukumbaja mutshipu wende mu mushindu mukumbanyine ku dituku ne ku dituku, muanetu wa bakaji eu wakatuala buenzeji buimpe kudi bantu babidi.

⁵ Basakibue kudi mutshima muule tente ne dianyisha bua malu onso malenga adi Yehowa mutuenzele, netukumbaje mutshipu wetu dituku dionso bilondeshile makokeshi etu, abi nebitupeteshe disanka ne disankishibua. Anu bu mufundi wa misambu, tudi mua kuamba ne: ‘Mukalenge Nzambi wanyi, [“ndi nkutumbisha,” NW] ne mutshima wanyi wonso, nentumbishe dîna diebe tshiendelele.’​—⁠Mus. wa 86:⁠12.