Nnganyi Udi Mukumbane Bua Kuyisha?

¹ Ukadiku mupete mmuenenu wa muomumue ne wa Mozese pa bidi bitangila mudimu anyi? Wakamba ne: “Umfuile luse, Yehowa, tshiena muakudi muena ludimi lupepele, nansha dituku dishale, nansha kumpala, nansha paudi wakula ne musadidi webe apa.” (Ekes. 4:10, NW) Pawikala ne mmuenenu eu, imue misangu udi wimanyika mudimu webe wa buambi. Kadi, Yezu “wakatutumina dîyi bua kuyisha” bantu ne kufila bumanyishi mu buondoke. (Bienz. 10:42, NW) Mmunyi mutudi mua kulua bambi ba lumu luimpe bakumbane?

² Ki ntulasa tutudi balonge tudi mua kutuvuija bakumbane bua mudimu. Paulo wakamba ne: ‘kakuena ba bungi babikidibue badi bena meji mu buntu buabu’ ne bua se: “meji a mu bulongolodi ebu adi bupote ku mêsu kua Nzambi.” (1 Kol. 1:26; 3:​19, NW) Yezu wakasungula bapostolo bende munkatshi mua bena mudimu balanda; banayi ba kudibu bavua balobi. Bamfumu ba bitendelelu bena lutambishi bavua babangata ne kapetu bu ‘bantu bakena bamanye mukanda ne bantu ba patupu.’ Bangatshibue bilondeshile mmuenenu ya bena bulongolodi ebu, bapostolo kabavua bakumbane bua kuyisha. Pabi, muyuki wa tshikuma wakenza Petelo dituku dia Pentekoste wakasaka bantu 3 000 bua kutambuishibuabu!​—⁠Bienz. 2:14, 37-41; 4:13.

³ Yehowa udi utuvuija bakumbane bua kuyisha: Paulo wakamba ne: “Dikumbana dietu didi difuma kudi Nzambi.” (2 Kol. 3:5) Yehowa, Mpokolo wa meji, mmulongeshe miliyo ya bantu bua buobu kuyisha bakuabu bulelela budi butangila Bukalenge. (Yesh. 54:13) Mudimu eu mmukumbane tshishiki ne udi upatula bipeta bivule: bua kujadika, tshidimu tshishale (1995) bantu bapiabapia 338 491 bàvuà batambule badi bu ‘mikanda ya didimanyisha nayi’ idi ne muoyo. (2 Kol. 3:1-3) Bionso bidi bituibaka bua kuyisha ne dikima ne muoyo mujima bidi Yehowa mutulongeshe.     

⁴ Bulongolodi bua Nzambi mbulongolole programe wa dilongesha pa buloba bujima bua ba-ministre bende. Ku diambuluisha dia Mifundu ne mikanda kabukabu miumvuiji ya Bible, tudi balongeshibue ne bakajibue bua kulua ‘bakumbajibue biakane, balongolola tshishiki’ bua kuyisha. (2 Tim. 3:16, 17) Bantu bavule mbakemeshibue bua dimanya didi mu mikanda ya Société. Tshilejilu, mona tshivuabu bafunde mu tshikandakanda tshia bena Suède: “Ditabuja didi Bantemu ba Yehowa bayisha didi dileja bujinguluji buvule bua mu Bible ne dileja makebulula a pa buawu mu bukua-matunga.”

⁵ Ne mêyi-malombodi atudi tupeta mu bisangilu bitanu bia ku lumingu luonso, programe wetu wa dibala ne dilonga dia Bible, mibelu itudi tupeta mu Kalasa ka mudimu wa teokrasi, diambuluisha dia muntu pa nkayende didibu batupetesha kudi ba-ministre bamonamona mianda ne, pa mutu pa bionso, dikuatshisha dia spiritu munsantu wa Yehowa, tudi mua kuikala bashindike se: Yehowa udi utumona bakumbane bua kuyisha. ‘Eyowa, bu batumibue ba Nzambi, ku mêsu kua Nzambi, pamue ne Kristo, tudi tuakula.’​—⁠2 Kol. 2:17, NW.

⁶ Patuikala mua kubabidila menemene dilongesha dia teokrasi didi Nzambi utupesha ku butuangaji bua bulongolodi buende, katuena ne kabingila nansha kamue bua tuetu kudikanda anyi kumvua buôwa. Tuyishayi bakuabu ne disanka dionso, batuishibue se: Yehowa neabeneshe madikolela etu.​—⁠1 Kol. 3:6.