Mandamuna Ku Nkonko Yenu

◼ Tudi ne bua kuela meji ku tshinyi patudi tubala bikoso mu bisangilu?

Tshitupa tshinene tshia dîba tshilongolola bua dilonga dia Tshibumba tshia Nsentedi ne dilonga dia mukanda tshitu tshienzeka ku dibala dia bikoso. Ebi bidi biumvuija ne: mubadi udi ne bujitu bunene mu diumvuangana ne dilongesha. Udi ne bua kubala mu mushindu wa ‘kufila diumvuija’ dia malu bua bateleji kumvuabu, ne kabidi kusakibuabu ku dienza. (Neh. 8:8) Ke bua tshinyi mubadi udi ne bua kudilongolola bimpe. (1 Tim. 4:13; tangila dilonga 6 dia mukanda wa Manuel pour l’École.) Mona amue malu malomba adi akengela bua dibala dilenga dia patoke.

Kuleja tshikuma tshia bungamba-malu tshiakanyine. Dianjila kusungula miaku anyi biambilu bidi bikengela kushindika bua kuambuluisha lumvu lua bushuwa.

Kushindumuna miaku biakane. Bidi bikengela kushindumuna bimpe ne kupatula miaku mu dîyi bua bateleji kumvuabu biambilu bifunda mu mikanda. Kebulula miaku iudi kuyi mumanye peshi ikena mitambe kumanyika mu nkonga-miaku.

Kuakula mu mushindu udi umvuika ne musangelu. Pa kuakula ne dîyi dikole ne musangelu, neujule ntema ya bateleji, neusonsole majinga abu, ne neutabuluje majinga abu.

Kuakula ne luya ne pa dîyi dia muyuki. Kuakula bu pa tshibidilu kudi kufumina ku bupepele bua muakulu. Pa kulongolola ne kuambulula, mubadi neadiumvue mudilekelele ne abi nebivuije dibala diende disankishi pamutu pa kuikaladi ditonda.​—⁠Hab. 2:⁠2.

Kubala bionso bidi bifunda. Note kuinshi kua dibeji pamue ne mamanyisha adi mu tuboko anyi mu tulobu adi abadibua ne dîyi dikole bikalawu afila bualu kampanda ku bidi bifunda. Pakumbusha anu miaku idi ijadika muaba udi bualu buangatshila. Note kuinshi kua dibeji udi ne bua kubadibua anu pa muaba udi muleja mu tshikoso ne kumubueja mu mushindu eu: “Note kuinshi kua dibeji udi wamba ne . . .”

Dibala dia patoke dilenga mmushindu mulenga udi ne tshipatshila tshia ‘kulongesha bakuabu bua kutumikila mêyi onso akatutumina’ Mulongeshi wetu munene.​—⁠Mat. 28:⁠20, NW.