Tumanyishayi Bukalenge
1 Mu Ebelu 10:23, badi batubela bua ‘kulamata dijukula dia patoke dia ditekemena dietu,’ didi dishindamene pa Bukalenge bua Nzambi. Yezu wakamba muikale ne tshipatshila ne: lumu luimpe lua Bukalenge ludi ne bua kuambibua mu bisamba bionso. (Mâko 13:10) Bidi bikengedibua ne: tulame mêyi aa mu lungenyi patudi mu mudimu.
2 Patudi tumonangana ne bantu, tudi tuteta bua kutuadija diyuki pa tshiena-bualu tshidi tshibasankisha anyi tshidi tshibatangila. Misangu mivule, tutu tutela malu adibu bamanye bimpe, bu mudi dibunda dia bibawu pabuipi nabu, ntatu idi ifikila bansonga, diditatshisha bua kukumbaja majinga a muntu peshi dikola dia bintu mushinga. Bu mudi bantu bavule batume lungenyi ku “tunyinganyinga tua mu nsombelu” etu, batu batumanyisha misangu mivule bitu bibatonda patudi tuleja dibatabalela ne dibateleja. (Luka 21:34, NW) Abi bidi mua kutuambuluisha pashishe bua kumanyisha ditekemena dietu.
3 Kadi, bituapanga kutabalela muanda eu, diyukidilangana ndifuane kutangila anu ku ngenyi mibi bafuana kupua muoyo tshipatshila tshia dikumbula dietu: kumanyisha mukenji wa Bukalenge. Pikalabi bushuwa ne: tudi tutamuja bantu pa nsombelu mibi idi ilela ntatu ya bungi, tshipatshila tshietu ntshia kutuma ntema yabu ku Bukalenge, ditekemena dimuepele dia bukua-bantu. Kabiyi mpata, tudi ne ditekemena ditambe buimpe didi bantu ne bua kumanya. Nunku, nansha bituatuadija ku ditela bimue bimanyishilu bia “bikondo bia njiwu ne bikole mua kupita nabi,” tuludike ne lukasa luonso diyukidilangana dietu ku tshidi tshikale mukenji wetu, “lumu luimpe lua kashidi.” Pa kuenza nunku, netukumbaje mudimu wetu bimpe tshishiki.—2 Tim. 3:1, NW; 4:5; Buak. 14:6.