Mandamuna Ku Nkonko Yenu

◼ Ntshinyi tshidi ne bua kusanganyibua mu tshilaminu tshia mikanda tshia Kalasa ka Mudimu wa Teokrasi?

Bungi bukumbane bua mikanda miumvuiji ya Bible mbupetesha tshisamba tshia Nzambi, bua diakalenga diatshi dipite bunene. Bu mudi bamanyishi bavule kabayi nayi yonso, tshilaminu tshia mikanda tshia Kalasa ka Mudimu wa Teokrasi, ku Nzubu wa Bukalenge, tshidi tshibambuluisha bua kuenza makebulula mu mikanda idibu kabayi pamu’apa mua kupetela kukuabu. Nenku tshilaminu tshia mikanda etshi tshidi ne bua kuikala tshikumbaja biakane: nkudimuinu kabukabu ya Bible, mikanda ya ndekelu ya Société, mushiki wa Mudimu wetu wa Bukalenge ne relié ya Tshibumba tshia Nsentedi ne ya Réveillez-vous !, ne mikanda ya Index des publications. Mbimpe kuikala kabidi ne nkonga-miaku wa buena-lelu. Bibungu, mikanda ya atlas peshi mikanda ya nsongo ya dimanya dia muakulu anyi ya miyuki ya bantu bidi kabidi mua kuikala ne dikuatshisha. Kadi, tshipatshila tshietu tshia kumpala tshidi ne bua kuikala tshia kulama mikanda mifila kudi “mupika wa lulamatu ne wa budimu.”​—⁠Mat. 24:​45, NW.

Mbimueneke imue misangu ne: mikanda idi ne malu akena makane mmiteka mu tubadi tua tshilaminu tshia mikanda tshia Kalasa ka Mudimu wa Teokrasi. Kabiena biakanyine kubuejamu mikanda ya malu mafuikakaja, ya malu adi adiwula mifundu ya mu Bible, ne mikanda ya nkindi peshi idi yakuila spiritisme. Tshilaminu tshia mikanda tshia Kalasa ka Mudimu wa Teokrasi tshidi ne bua kuikala anu ne mikanda yambuluisha badi bayibala bua kutungunuka ne kulubuluka mu nyuma.​—⁠1 Tim. 4:15.

Mutangidi wa kalasa ke udi mupeshibue bujitu bua tshilaminu tshia mikanda, nansha bikalabu mua kuteka muanetu mukuabu bua kumuambuluisha mu diambula dia bujitu ebu. Udi ne bua kutabalela bua tshilaminu tshia mikanda tshikale tshilama bilondeshile bikondo, pa kusakidila mikanda mipiamipia diakamue padiyi ipetshibua. Dîna dia tshisumbu tshiena tshilaminu tshia mikanda didi ne bua kumueneka difunda bimpe mu mabeji a ntuadijilu a mukanda wonso. Bidimu bionso, badi ne bua kukomonona mikanda bua kumona bikalaku dikengedibua dia kulongolola imue ya kudiyi peshi kupingaja mikuabu pamutu payi.

Muntu yonso udi mua kuambuluisha mu dieleshangana diboko pa kukuba tshilaminu tshia mikanda. Bidi bikengela kuikala ne ntema mu ditumika ne mikanda. Kabena kabidi ne bua kulekela bana banaya nayi ne kabena ne bua kufundamu tshintu nansha. Dimanyisha dileja patoke nedikale dilamika ku tubadi tua tshilaminu tshia mikanda bua kuvuluija ne: mikanda kayena ne bua kupatuka pambelu pa Nzubu wa Bukalenge.

Bu mudi bisumbu bipiabipia bienjibua misangu ne misangu, bidi mua kuikala ne: bilaminu bia mikanda bivule bipange kuikala ne mikanda mikumbane. Bamue bamanyishi badi ne mikanda ya kale nebikale mua kupangadija bua kuyipesha tshisumbu. Bakulu nebangate pamu’apa dipangadika dia kulomba mpatuidi mienzulula ya relié ya Tshibumba tshia Nsentedi. Nenku, tshilaminu tshia mikanda tshia Kalasa ka Mudimu wa Teokrasi netshimueneke tshikuatshishi tshinene, tshidi tshiambuluisha muntu yonso bua kupeta biûma bisokome bia mu Dîyi dia Nzambi didi difila dimanya, meji ne lungenyi.​—⁠Nsu. 2:4-6.