Tudiundishe Disankidila Dijula Kudi Ngumu Ya Bukalenge
1 Kukadi Mbingu Mikese, Tudi Ne Disanka Ne Diakalenga Dia Kumuangalaja Ngumu Ya Bukalenge No. 35 Idi Ne Tshiena-bualu Tshia: “Bantu Bonso Nebananganganaku Anyi?” Miaba Yonso, Bamanyishi Badi Badienzeja Bua Kushiya Trakte Eu Kudi Bantu Ba Bungi Badi “Bakanyine.” (Mat. 10:11, NW) Kampanye Aka Kadi Ne Bua Kujika Mu Dia Lumingu Dia 14 Tshisua-munene, Kadi Bikalaku Kutshidi Teritware Mikuabu Ya Dinyunguluka, Bakulu Nebatulombe Pamu’apa Bua Kutungunuka Ne Dimuangalaja Dia Ngumu Ya Bukalenge No. 35 Too Ne Pajika Stoke Wa Tshisumbu Tshietu. 2 Nimero Eu Wa Ngumu Ya Bukalenge Udi Ujula Disankidila Dia Bantu Bavule. Mbamone Se: Dinanga Dia Ku Tshifukilu Ndijimine Kudi Bavule Ba Mu Tshikondo Tshietu Etshi, Ne Badi Kabidi Badiebeja Mushindu Wikala Matuku Atshilualua. (2 Tim. 3:3) Tudi Basue Kudiundisha Disankidila Edi Dijula.
3 Dimuangalaja dia Ngumu ya Bukalenge didi dikuama mamuma adi: Mu kampanye kenza mu 1995, mukaji kampanda wakapeta kopi wa Ngumu ya Bukalenge wakabuela mu tshisangilu ku Nzubu wa Bukalenge bua kumanya bia bungi pa mitabuja a Bantemu ba Yehowa. Wakitaba diakamue ne disanka dionso dilonga dia Bible ne, pashishe, uvua upumbisha bisangilu anu mu mpukapuka. Matuku makese patupu, wakakupuisha dîna diende ku mikanda ya Ekleziya wabu.
4 Lelu’eu, bantu nkama ne nkama mu teritware wetu bakadi babale mukenji mufile kudi Ngumu ya Bukalenge No. 35. Kadi mmuenenu wabu uvua tshinyi? Nansha bikala malu avuabu babale mabalenge ku muoyo, ba bungi kabena ne tshienzabu anu Ntemu wa Yehowa kampanda muya kubakumbula tshiakabidi. Tudiku tupangadija bua kubapinganyina anyi? Diditatshisha bua muinetu, dienzeja kudi dinanga, didi ne bua kutusaka. Tudi ne bua kukumbulula aba bonso badi baleje disankidila bua Ngumu ya Bukalenge.
5 Netuambe tshinyi mu dipita dietu dia musangu muibidi? Netuikale mua kuleja mushindu udi mukenji udi mu Ngumu ya Bukalenge mumvuangane ne malu adi enzeka lelu, pashishe kuela lukonko ludi lusaka ku diela meji. Tuteleje mutuyukidishi ne ntema bua kumvua buondoke bua lungenyi luende bimpe. Pashishe, tukoke ntema yende pa lungenyi kampanda luakanyine lua mu broshire wa Utulomba, udibu baleje mu Ngumu ya Bukalenge. Bialeja muntu dianyisha, tutete mua kutuadija diakamue dilonga dia Bible.
6 Mona imue mishindu ya kutuadija diyukila musangu muibidi ne aba bavua baleje disankidila bua “Ngumu ya Bukalenge” No. 35:
◼ “Udi pamu’apa muvuluke dibeji dimvua mukushile dituku adi. Malu adimu adi atangila tshilumbu tshikole tshitu tshijula matapuluka munkatshi mua bantu: dipanga dinanga bua muntu netu.” Tela malu malonda mu dibeji 2 dia Ngumu ya Bukalenge bua kujadika mêyi ebe, pa tshiena-bualu: “Dinanga dia muntu netu ndikepele.” Nenku webeje ne: “Udiku wela meji ne: Nzambi mmusue bua kumona bantu ne nsombelu wa nunku anyi?” Teleja diandamuna. Bulula broshire wa Utulomba pa dilongesha 5 ne teta mua kutuadija dilonga dia Bible.
◼ “Mu dipetangana dietu dia kumpala, mvua mukushile dibeji dibunya divua ne lukonko lua se: ‘Bantu bonso nebananganganaku anyi?’ Udiku wela meji ne: bidi mua kuenzeka nanku pa buloba bujima anyi?” Teleja diandamuna. Bulula broshire wa Utulomba pa dilongesha 6 ne bala tshikoso 6. Pashishe bala dilaya difila kudi Nzambi mu Mika 4:3, 4. Pikala mukuyukidishi umueneka ne disankidila, umuleje broshire ne umulombe bua kulonga Bible.
◼ “Musangu mushale patuvua bamonangane, mvua mukushile trakte uvua ne tshiena-bualu tshia: ‘Bantu bonso nebananganganaku anyi?’ Mudi musanganyibua dilomba bantu dilonga dia Bible dia ku nzubu kabiyi difuta mfranga. Ndi mukupinganyine bua kukuleja mukanda udi umvuija Bible ututu tutumika nawu. [Leja mukanda wa Dimanya.] Mukanda eu udi umvuija bimpe tshikondo kayi tshitudi mua kutekemena bua kumona bantu banangangana, ne udi wandamuna ku nkonko iutu pamu’apa udiela: Bua tshinyi tudi tukulakaja ne tufua? Bua tshinyi Nzambi mmulekele dikenga? Ntshinyi tshidi tshifikila banangibue betu badi bafue?” Pashishe webeje ne: “Ndiku mua kukuleja mutu dilonga edi dienzeka anyi?” Biabenga muntu dilomba dietu, muebeje bikalaye ujinga bua kudibadila mukanda eu nkayende. Bikalaye muanyishe nunku, mushile mukanda umue ne mumvuije ne: mudimu wetu wa pa buloba bujima wa dilongesha Bible mmukuatshisha kudi mapa a budisuile. Umvuanganayi bua dikumbula didi dilonda.
7 Bituikala banyunguluke teritware mujima ne Ngumu ya Bukalenge No. 35, netuikale mua kufila mukanda wa Dimanya mu matuku a ngondo ikala mashala. Bua kuuleja, tudi mua kupeta ngenyi mivule mu dibeji dia ndekelu dia Mudimu wetu wa Bukalenge wa Kabalashipu 1996; Kashipu ne Tshisua-munene 1996; ne Kashipu 1997.
8 Dimuangalaja dia Ngumu ya Bukalenge ke mpunga udi yonso wa kutudi nende bua kuvudija madikolela ende mu buambi. Bu mutudi bambuluisha kudi Yehowa, tudi mua kuikala bashindike dienzeka dimpe dia kampanye aka: Nekambuluishe bantu bua kumanya ne: dilongolola dia Nzambi ndia se: bantu banangangane. Yehowa atungunuke ne kubenesha madikolela etu onso bua kudiundisha disankidila dijula kudi Ngumu ya Bukalenge!