Tupetele dikuatshisha ku ndongamu wa Kalasa ka Mudimu wa Teokrasi bua 1999

¹ Yezu uvua Mulongeshi Munene. Bantu bavua “bakema bua dilongesha diende.” (Mâko 1:22, Mukanda wa Mvidi Mukulu) Nansha mudi muntu nansha umue wa kutudi kayi mua kuakula ne kulongesha mushindu wakenza Yezu, tudi mua kudienzeja bua kumuidikija. (Bien. 4:13) Bua tuetu kukumbaja bualu ebu, midimu itudi tuenza mu Kalasa ka Mudimu wa Teokrasi neyituambuluishe bua kutungunuka ne kulengeja nzanzu yetu ya diakula ne dilongesha.

² Mu 1999, Mudimu No. 1 neushindamene nangananga pa biena-bualu bia mu bibejibeji bia 1997 bia Tshibumba tshia Nsentedi ne Réveillez-vous! Diumvua dietu dia malu a mu nyuma nedilubuluke bikole bituikala tudianjila kubala malu aa ne pashishe tuateleja mu kalasa. Badibu bapeshe miyuki ya ndongeshilu eyi badi ne bua kusuika malu adimu ku nsombelu, bayenza mu mushindu udi ukoka ntema ne wa musangelu. Mudimu No. 3 neushindamene pa mukanda wa Disanka mu dîku ne Mudimu No. 4 pa muntu kampanda wa mu Bible, nansha muikalabu mua kushintakaja mikanda bua midimu ibidi eyi. Mutangidi wa kalasa udi ne bua kulonga bimpe malu a dikonkonona kumpala kua kufilaye midimu. Balongi badibu bapesha mudimu muashila pa mukanda wa Disanka mu dîku badi ne bua kuikala bilejilu bimpe mu mêku abu buobu bine.

³ Tumikila mibelu, ne dilongolola bimpe: Muntu yonso udi mua kuenza malubuluka a pa mutu mu ngakuilu ne ndongeshilu. (1 Tim. 4:13) Pa nanku, tudi ne bua kulomba mibelu ne katuyimonyi bu bualu bua kuepuka nansha. (Nsu. 12:15; 19:20) Bua kupatula bipeta bimpe mu dilongesha bulelela mu bisangilu ne mu mudimu wa budimi bidi bikengela malu a bungi kupita dilonda malu patupu anyi dibala mifundu pa mutu pa mutu. Tudi ne bua kulenga mitshima ya bantu ne kujula dijinga dia kumanya dia badi batuteleja. Tudi mua kuenza nunku mu diakula bulelela ne dituishibua didi difumina mu mutshima wetu. (Fuanyikija ne Bienzedi 2:37.) Mibelu mitupesha mu kalasa neyituambuluishe bua kufika ku tshipatshila etshi.

⁴ Padibu bakupesha mudimu, diakamue ela meji pa ngikadilu wa bungamba-malu uudi ne bua kulonda mu mudimu webe bilondeshile mudiye mumvuija mu mukanda wa Manuel pour l’École. Ela meji pa tshiudi ne bua kuenza bua kutumikila mibelu ivuabu bakupeshe kumpala. Elangana meji pa tshiena-bualu tshiebe, nsombelu uwafuanyikija mu mudimu webe bikalabi bikengela kuenza nanku, ne mushindu uumvuija mifundu idi mu malu awakonkonona. Shindamija lungenyi pa mushindu mulenga wa kukuata mudimu ne malu aa bua kulongesha ne kusakangana ku bienzedi.​—1 Tim. 4:15, 16.

⁵ Biwikala umvua buôwa bua kudifundisha mu kalasa, enza disambila bua bualu ebu ne pashishe uyukile ne mutangidi wa kalasa bua muudi udiumvua. Muntu yonso udi mua kupetela dikuatshisha dinene ku ndongamu eu wa Kalasa ka Mudimu wa Teokrasi bua 1999.