Tukuate mudimu bimpe ne mikanda ya kale

¹ Miaba yonso pa buloba, bantu mbalame miliyo ya mikanda ya kale mu bilaminu biabu bia mikanda. Kadi mikanda eyi idi ne diambuluisha kayi dia tshiendelele bua bantu? (Muam. 12:12) Mikanda idi ikoka ntema pa Bukalenge bua Nzambi ne pa malu enzelabu bukua-bantu ke idi ne mushinga mutambe bunene. Bisumbu bia bungi bidi mu stoke yabi ne mikanda kabukabu ya nunku ivua mipatula kumpala kua 1985. Mu Tshiongo netufile mikanda eyi ya kale kudi bantu mu buambi.

² Idi ne mushinga mulelela: Nansha mudi bamue ba kutudi mua kuela meji ne: mikanda eyi kayena miakanyine tshikondo etshi pa kuyifuanyikija ne mikanda yetu mipiamipia, tudi ne bua kuvuluka ne: idi ne bulelela bua mu Mifundu. Mukenji wa Bukalenge udiyi yumvuija utshidi amu ne mushinga lelu’eu ne udi mua kupandisha mioyo ya bantu bikalabu bateyaku ntema. (Yone 17:3) Nunku, tudi ne bua kuenza madikolela a pa mutu a bungi bua kukuata mudimu bimpe ne mikanda ya kale eyi.

³ Bua kuela kashonyi pa mushinga wayi tudi mua kulonda bualu bua muntu mukaji kampanda wakapiana kudi kakuende mukaji mikanda ya bungi ya kale ya Société. Ntemu mukuabu wakebeja muntu mukaji eu né uvua mumanye mushinga menemene wa mikanda eyi. Muntu mukaji eu wakandamuna ne: “Tshiena mumanye mushinga wayi menemene to, kadi mmunyi mundi mua kuumanya?” Wakitaba dilonga dia Bible, kuitabaye bulelela, ne pashishe wakangata ne mushinga mukole tshilaminu tshia mikanda tshia kakuende. Bushuwa, mikanda ya kale eyi yakamueneka bumpianyi bua mushinga mukole!

⁴ Yendeshayi: Pa kumbusha difila mikanda ya kale eyi ku nzubu ne ku nzubu, wikale kabidi ne dipangadika dia kuyifila paudi wenza makumbulula kudi bantu baudi mumanye ne: batu basue kubala mikanda yetu, kabidi ne bantu badi ne abonema ya Tshibumba tshia Nsentedi ne Réveillez-vous! ne badi mu njila webe wa diabanya bibejibeji. Bua badi balonga nebe Bible, mikanda misunguluke ya kale idi mua kubapetesha dimanya dia malu adi mua kualabaja lumvu luabu lua bulelela. Kupu muoyo wewe muine bua kukeba mikanda ya kale idi mipangike mu tshilaminu tshiebe tshia mikanda. Mushindu eu, neupete tshilaminu tshia mikanda tshia teokrasi tshia mushinga, tshidi mua kukuambuluisha bikole mu bikondo biebe bia dilonga dia pa nkayebe.

⁵ Pamutu pa kulama mikanda yetu ya kale mu stoke, tukuatayi nayi mudimu bimpe bua kusaka bantu batudi tupetangana nabu bua ‘kutshina Nzambi mulelela ne kulama mêyi-matuma ende.’​—Muam. 12:13, NW.