Ntshinyi tshiwambila Mizilman?
1 Ukadiku muyishe muena Islame peshi Mizilman anyi? Bikalabi nanku, wakafika pamu’apa ku dimanya ne: ba-Mizilman batu bitabuja Nzambi bikole. Kadi, bu mudibu bamanye anu malu makese akamba baprofete ba Yehowa bua Mparadizu wikala pa buloba, mbimpe kubamanyisha ditekemena edi. (1 Tim. 2:3, 4) Malu adi alonda aa neakuambuluishe bua kuyisha bimpe.
2 Ba-Mizilman batu bitabuja Allah, anyi Nzambi, ne kabidi batu bitabuja ne: Muhammad mmuprofete wa Nzambi. Bua ba-Mizilman, Koran mmukanda wabu munsantu, ne badi babikila tshitendelelu tshiabu ne: Islame, mbuena kuamba ne: “dikokela.” Koran udi wamba ne: ki mbimpe bua kushima anyi kutendelela mpingu to, Nzambi udi umuepele ne ki m’Busatu Bunsantu to. Udi wamba kabidi ne: anyima katu ufua to, ulongesha inferno ne mparadizu wa mu diulu. Ba-Mizilman badi bitaba ne: Bible n’Dîyi dia Nzambi ne kabidi bela meji ne: mbamushintulule, eku Koran mutshikale mu muakulu wende wa ku mbangilu ne mmulama kayi munyanga.
3 Leja bulunda, ikala ne bukalanga ne lungenyi: Paudi wasa diyuki ne Mizilman, mbimpe umuleje bulunda ne wikale ne bukalanga. (Nsu. 25:15) Umanye ne: mitabuja a ba-Mizilman mmajame bikole mu ngenyi yabu ne a bungi mbaakuate anu ku muoyo patupu. Nunku, ki mbakole ne tshibidilu tshia kuelangana meji pa malu a Nzambi bua kufika ku dijadika tshidi tshikale disua diende to. (Lomo 12:2) Lutulu ne diumvuilangana bidi ne mushinga bua kumona mua kuambuluisha ba-Mizilman.—1 Kol. 9:19-23.
4 Epuka mêyi adi mua kufikisha ba-Mizilman ku dikuangata bu muena mu Bukua-Buena-Kristo. Umvuija bimpe ne: kuena muena Katolike anyi muena Mishonyi to, kadi udi mushilangane nabu. Ikala pamutu pa kuamba ne: “Bible,” wamba ne: “Mukanda wa Nzambi.” Bu mutu ba-Mizilman kabayi basue tshiambilu tshia ne: “Muana wa Nzambi,” pa tshibidilu ki mbimpe kutshitela anyi kuyukidilanganapu to; amu too ne padi muntu udiunda mu nyuma. Kadi, udi mua kulonda malu a Yezu pa kumutela bu muprofete anyi bu mutuadi wa mukenji. Kanukokanganyi ku mêyi to. Wewe mujingulule se: muntu udi wamba kufiika munda, mulaya ne bukalanga ne umbuka diakamue ndaku.
5 Mbitambe buimpe kuakula ne muntu umue pamutu pa kuakula ne kasumbu ka bantu. Pa tshibidilu, mbia meji bua bantu bakaji kuyishabu bantu bakaji nabu, ne bantu balume, bantu balume nabu. Bushuwa, imue misangu bidi mua kushilangana, kadi bidi bikengela kujingulula malu bimpe. Kabidi, ba-Mizilman ba bungi kabatuku basue kumona bantu bakaji ne mvuadilu peshi ne ndengejilu wa nsuki ne wa mubidi bidibu bangata bu bidi bibi. Bana betu ba bakaji badi ne bua kudiakaja pa bualu ebu.—1 Kol. 10:31-33.
6 Malu a kuyikila: Akula ne muoyo umue bua bunene bua Nzambi ne dinanga diende. Kuelakanyi bua kuamba ne: udi muena kuitabuja mulelela, Nzambi udi umuepele (ki m’Busatu Bunsantu to), ne ditendelela mpingu mbualu bubi. Akula bua malu mabi adi pa buloba lelu’eu: mvita, bimvundu, dikinangana bua dishilangana dia bisa ne malu a lubombo adi munkatshi mua bena malu a Nzambi bavule.
7 Broshire wa La direction de Dieu: Le chemin qui mène au Paradis (Bulombodi bua Nzambi: Njila udi utufikisha ku Mparadizu) neakuambuluishe ne ngenyi mikuabu pa biena-bualu biudi mua kudikuatshisha nabi bua kutuadija mayuki ne ba-Mizilman. Broshire eu mmupatula bua kukoka ntema ya ba-Mizilman badi muaba udi bakuabu kabayi mua kubatatshisha bua kulonga Bible.
8 Bua kutuadija diyuki, udi mua kuamba ne:
▪ “Ndi ngenza madikolela bua kuakula ne ba-Mizilman. Ndi mubale malu adi atangila ntendelelu wenu ne ndi ngela meji ne: tshiena mutupakane bu meme mua kuamba ne: ba-Mizilman badi bitabuja ne: kudi Nzambi umuepele mulelela ne badi bitaba baprofete bonso. [Lekela muntu andamune.] Mvua njinga kuakula nebe bua mulayi kampanda wa kale udi wakula bua dikudimuka dia buloba ebu bulua mparadizu. Ndiku mua kukubadila tshivua muprofete au mufunde anyi? [Bala Yeshaya 11:6-9.] Mulayi eu udi utuma lungenyi luanyi ku mêyi a mu Koran adi mu kakanda aka.” Bulula broshire mu dibeji dia 9, ne bala mêyi au adi mafunda mu maleta matambe kufiikisha adi akula bua bantu bakane bapiana buloba. Bialeja muntu dijinga dia kumanya bivule, nutungunuke ne diyuki pa kukonkonona tshikoso tshia 7 too ne tshia 9. Mushiila broshire ne udilongolole bua kupingana kabidi.—Bua mayuki makuabu, tangila Mudimu wetu wa Bukalenge wa Luabanya 1998 dib. 6, tshik. 26.
9 Paudi ulomba muntu bua kukonkonona nende broshire eu, nebikale bitambe buimpe bua wewe kuenza mudimu ne muaku: diyukidilangana, pamutu pa: dilonga dia Bible. Panudi nujikija broshire eu, mulongi udi ne bua kuikala mukumbane mpindieu bua kutuadijaye kulonga broshire wa Utulomba anyi mukanda wa Dimanya. Kudi mikanda mikuabu idibu bapatule nangananga bua ba-Mizilman: trakte wa Le chemin du Paradis: Comment le trouver? ne broshire mukese wa Le temps de la vraie soumission à Dieu.
10 Bikale ne dimanya edi dia mitabuja a bena Islame ne mushindu wabu wa dimona malu, tudi mua kuleja busunguluji patudi tuangata mikanda itudi mua kufila kudi ba-Mizilman ne kumanya mushindu utudi mua kubayisha. Yehowa atungunuke ne kubenesha madikolela atudi tuenza bua kuambuluisha bantu ba mishindu yonso bua kubila dîna diende ne kusungidibua.—Bien. 2:21.