‘Dîyi diamba mu tshikondo tshiakane’
1 Kumanyisha bakuebe mukenji wa muoyo kutu kukukolele anyi? Utu wela meji ne: udi amu ne bua kuamba bualu budi buelesha meji a bungi pa kubumvua bua kukemesha badi bakuteleja anyi? Pavua Yezu mutume bayidi bende, wakabambila ne: ‘Panutshidi nuya, nubambile ne: Bukalenge bua mu diulu budi pepi.’ (Mat. 10:7) Mukenji eu kauvua ne malu makole pa kuumvua to, uvua mupepele bua kuumanyisha. Kawena mushintuluke lelu’eu to.
2 Misangu mivule, bitu bikengela anu mêyi makese patupu bua kutuadija diyuki ne muntu. Pavua Filipo mupetangane ne muntu mutungula wa mu Etshiopi, wakamukonka ne: “Udi mujingulule bualu bûdi ubala, anyi?” (Bien. 8:30) Muyuki wabu wakapatula bipeta bilenga eu wakafumina ku ‘dîyi diamba mu tshikondo tshiakane’!—Nsu. 25:11.
3 Kadi mmushindu kayi uudi pebe mua kulonda tshilejilu etshi mu mudimu webe wa buambi? Mpa kumanya mua kulonga muntu anyi bualu, ne kusungula miaku idi miakanyine malu adi panshi. Ela lukonko, uteleje diandamuna.
4 Imue nkonko minene: Bua kutuadija diyuki ne muntu, teta kumuela lukonko bu mudi elu:
▪ “Nutu nusambila Disambila dia Tatu Wetu mu nzambi muenu anyi?” (Mat. 6:9, 10) Ambulula imue miaku yadi, pashishe umuambile ne: “Bamue bantu batu bakonka ne: ‘Dîna dia Nzambi divua Yezu muambe ne: ditumbe (anyi badinemeke) ndîna kayi?’ Bakuabu pabu ne: ‘Mbukalenge (anyi Bumfumu) kayi buvua Yezu muambe bua tuetu kulomba ebu?’ Ukadiku mupete mandamuna mimpe a nkonko eyi anyi?”
▪ “Ukadiku mudikonke ne: ‘Bua tshinyi tudi ne muoyo,’ anyi?” Umvuija ne: mushinga eu udi utangila dimanya dia Nzambi.—Muam. 12:13; Yone 17:3.
▪ “Utuku wela meji ne: lufu luadiakujimina dikuabu dîba anyi?” Bala Yeshaya 25:8 ne Buakabuluibua 21:4 bua kumupesha diandamuna dimpe didi difila ditekemena.
▪ “Kudiku mushindu wa kujikija bimvundu pa buloba apa anyi?” Leja ne: Nzambi udi ulongesha bua ‘unange muntu nebe.’—Mat. 22:39, Mukanda wa Mvidi Mukulu.
▪ “Buloba buetu ebu, nebabubutule dimue dituku kudi bintu bia muulu anyi?” Ambila bantu bualu ebu budi Bible utulaya ne: buloba nebuikaleku tshiendelele.—Mus. 104:5.
5 Manyisha lumu luimpe mu mushindu mupepele, wa buludiludi ne mêyi malenga. Yehowa neakubeneshe bua bukole buudi wenza bua kumanyisha bakuabu nansha ‘dîyi dimue’ patupu dia bulelela.