Umanye mua kuteleja bimpe
1 Bidi bikengela kudienzeja bua kuteleja ne ntema. Bidi kabidi bikengela bua muntu udi uteleja kuikalaye ne dijinga dia kulonga ne kujinga bua malu adiye umvua amuambuluishe. Ke bua tshinyi Yezu wakamba ne: “Dimukayi mushindu unudi nuteleja!”—Tuetu mbadi baladike maleta; Luka 8:18, Muanda Mulenga Lelu.
2 Tudi mua kutumikila mubelu eu patudi tubuela mu bisangilu, mu mpuilu ne mpungilu. Ebi mbikondo bitudi ne bua kuteleja ne ntema ya bungi. (Eb. 2:1) Mona amue malu akuambuluisha bua kumanya mua kuteleja bimpe dîba dia bisangilu ebi.
▪ Vuluka mushinga udi nawu bisangilu. Bisangilu ebi ke njila munene udibu ‘batulongeshila kudi Yehowa’ ku diambuluisha dia ‘muena mudimu wa lulamatu.’—Yesh. 54:13, NW; Luka 12:42, MML.
▪ Udianjile kudilongolola. Ulonge malu anuamona mu bisangilu, uvuluke bua kuambula Bible webe ne mukanda udi ne malu anudi nulonga.
▪ Wenze muebe muonso bua kushindika lungenyi luebe kaba kamue mu bisangilu. Epuka kuyikila ne badi basomba pabuipi nebe ne kukenzakana bua kutangila bidi bakuabu bateleji benza. Ukebe mushindu wa kubenga kutuma lungenyi ku malu awenza pajika bisangilu anyi ku malu makuabu adi akutangila.
▪ Elangana meji bua malu adibu balongesha. Udikonke ne: ‘Ntshinyi tshidi malu aa andongesha? Ndîba kayi dindi mua kuatumikila?’
▪ Ufunde malu manene adi makoke ntema yebe ne mvese ya mu Bible. Nebikuambuluishe bua kutuma meji ebe ku malu adibu bakonkonona, kukuambuluisha kabidi bua uvuluke malu manene awikala nawu dijinga pashishe.
3 Longeshayi bana mua kuteleja: Bidi bikengela kulongesha bana malu a mu nyuma. (Dut. 31:12) Kale, bena tshisamba tshia Nzambi ‘bonso bakadi ne matshi a kumvua’ bavua ne bua kushala ne ntema dîba divuabu bababadila Mikenji ya Mose. (Neh. 8:1-3) Biadifila baledi ne biateyabu ntema mikole dîba dia bisangilu, bana badi pabu mua kushala ne ntema. Ki mbimpe kupesha bana bintu bia kunaya nabi anyi mikanda ya bimfuanyi dîba dia bisangilu to. Dipatuka dibuela tshianana tshianana dia badi baya ku nkumba didi dibapangisha mua kuteleja bimpe. Bu mudi ‘bupote busuikibue mu mutshima wa muana,’ mbimpe baledi benze muabu muonso bua bana kabikadi batambakana to, kadi bikale ne ntema dîba dia bisangilu.—Nsu. 22:15.
4 Patudi tumanya mua kuteleja bimpe, tudi tuleja ne: tudi bantu ba meji badi bajinga ‘kudiunda mu malu adibu batuyisha.’—Nsu. 1:5.