Ndongamu mupiamupia wa mpuilu wa pa buende

Tshiena-bualu tshia mpuilu wa pa buende wa tshidimu tshia mudimu tshipiatshipia ntshishindamene pa mvese udi wamba bualu bua mushinga ne: “Nukokele Nzambi; nukandamene Diabolo.” (Yak. 4:7) Mêyi aa mmubelu muimpe bua bikondo bikole bitudi ebi! Patudi tutumikila mikenji ya Nzambi bidi bitukebela buluishi bua Satana. Mpuilu eu neatulongeshe mua kukandamena mayele mabi a Diabolo a dinyanga nawu ditabuja dietu. Nng’amue malu kayi a mushinga a mu nyuma atuateleja mu mpuilu eu?

Mutangidi wa tshijengu nealeje mu tshiena-bualu tshia: “Tulejayi ne: tudi tutumikila mikenji ya Nzambi mu dîku,” mudibi bikale bikolesha mêku ne biambuluisha bua kukandamena ntatu ya panu. Muyuki wa kumpala wenza ngamba-malu walua kutuendela buenyi newikale ne tshiena-bualu ne: “Kukandamena Diabolo ntshinyi?” Muyuki eu neutuleje bua tshinyi ne mushindu utudi mua kuangata dipangadika dikole bua kukandamena meji mabi a Satana a kutekesha makanda etu a mu nyuma. Nekuikale miyuki ibidi idi ne malu adi atangila nangananga bansonga, bualu badi pabu ne bua kudimukila meji mabi adi nawu Diabolo. Bena Kristo ba bungi bakadi mpindieu bantu bakulumpe bakabenga kulonda majinga a bena panu pavuabu bansonga. Netuteleje malu akamonabu kudi bamue bana betu.

Bantu bonso badi ne bua kutumikila mikenji ya mbulamatadi. Nanku, muyuki wa ndekelu wa ngamba-malu walua kutuendela buenyi au neushindamene pa malu anayi adi ne bua kuleja ne: tudi tutumikila mikenji ya Nzambi: (1) kudi mbulamatadi, (2) mu tshisumbu, (3) ku midimu yetu nkayetu ne (4) mu dîku. Mprograme kayipu bulenga nunku!

Badi bajinga kutambula mu mpuilu wa pa buende eu badi ne bua kumanyisha mutangidi-muludiki pa lukasa. Tuetu bonso tudi ne bua kuenza kamanyinu pa kalandriye ketu pa dituku dia ngondo dienzeka mpuilu eu ne kudilongolola bua kuikalamu dituku adi dijima. Masanka atuapeta neikale a kashidi patudi tukokela Yehowa tshiendelele.