Kukuna bivule kudi kupetesha masanka mavule
1 Tuetu bonso tudi batekemene dîba diakumbana malu manene adibu batulaye mu Mukanda wa Nzambi. Nansha mpindieu, Yehowa udi utupesha mabenesha a bungi adi afila disanka dikuabu mu nsombelu wetu. Kadi bua tuetu kuapeta mavule, bidi bilondeshila mushindu utudi tudienzeja tuetu bine nkayetu. Anu muvua mupostolo Paulo muleje, ‘udi ukuna maminu a bungi neapuole a bungi.’ (2 Kol. 9:6) Tukonkononayi bitupa bibidi bitudi mua kuenzela mudimu ne dîyi edi.
2 Mudimu wetu nkayetu: Kumanyisha bantu lumu luimpe patudi ne mushindu wa kulumanyisha kudi kututuadila mabenesha a bungi. (Nsu. 3:27, 28) Bualu bua kuela kalumbadi mbua se: ba bungi badi bakuna maminu a bungi pa kuvudija mudimu wabu ne kulua nansha bampanda-njila bambuluishi anyi ba pa tshibidilu. Muntu yonso wa kutudi udi mua kukuna maminu a bungi pa kupinganyina bantu bua kukolesha dijinga divuabu baleje dia kumanya bia bungi ne kubalomba bua kutuadija kulonga nabu Bible dîba dionso didi mpunga umueneka. (Lomo 12:11) Kudienzeja muetu muonso mushindu eu kudi kufikisha ku malu adi akankamija ne kuvudija disanka mu mudimu wetu wa buambi.
3 Ditua malu a Bukalenge nyama ku mikolo: Paulo wakakula bua bidi bitangila ‘dikuna maminu a bungi’ pavuaye wakula bua difila dia bintu. (2 Kol. 9:6, 7, 11, 13) Lelu’eu, tudi mua kudifila ne makanda etu onso anyi kufila bintu bua kutua malu a Bukalenge nyama ku mikolo. Tudi mua kuambuluisha mu mudimu wa dibaka dia Nzubu ya Bukalenge. Kabidi tudi mua kudifila bua disukula ne dilama ne mankenda miaba ya ntendelelu mulelela eyi. Tudi kabidi mua kufila makuta bua malu a mu tshisumbu tshietu ne bua mudimu wa dimanyisha Bukalenge ne divuija bantu bayidi udi wenzeka pa buloba bujima. Padi yonso wa kutudi wenza tshiende tshidiye mua kukokesha bua kuenza, disanka didi dituenza patudi tumona mudi Yehowa ubenesha menemene mudimu eu udiye mutupeshe!—Mal. 3:10; Luka 6:38.
4 Dîyi dia Nzambi didi ditukankamija bua ‘kuenzela bakuabu bimpe, kuikala ne bubanji bua bienzedi bimpe; badilongolole bua kupangana bintu.’ Patudi tutumikila mubelu eu, tudi tupeta mabenesha a bungi mpindieu. Kabidi, tudi ‘tudibutshila bidi bitekibua bimpe bua matuku atshilualua, bua kulamata muoyo udi muoyo wa bushuwa mene’ matuku adi kumpala eku.—1 Tim. 6:18, 19.