Mandamuna ku nkonko yenu

▪ Mmalu kayi mimpe adi muntu mua kupeta padiye ubuela mu bisangilu mu tshisumbu tshia mu teritware wa muaba udiye musombele?

Tutu tupetela mu tshisumbu mibelu idi itukankamija bua ‘kuenzejangana ku dinanga ne ku dienza dia bienzedi bimpe.’ (Eb. 10:24, 25) Tudi tulongela bulelela mu tshisumbu ne tupeta mushindu wa kuenza mudimu wetu wa dienza bayidi. (Mat. 28:19, 20) Badi kabidi batukankamija bua kutantamena ne lulamatu mateta ne kabidi tudi ne batangidi ba dinanga badi batuambuluisha bua kutshimuna ntatu ne tunyinganyinga bidi bienda anu bivula. Kakuyi mpata, tshisumbu tshidi ne mushinga mukole bua lupandu luetu lua mu nyuma. Kadi, kudiku malu mimpe adi muntu upeta padiye ubuela mu tshisumbu tshia mu teritware wa muaba udiye musombele anyi?

Nsombelu wa muntu ne muntu utu ushintuluka, kabidi kudi malu bu mudi mudimu udi muntu wenza, muena dibaka nende udi kayi Ntemu ne mianda ya mashinyi bidi mua kufikisha muntu ku diangata dipangadika kampanda peshi kansanga pa bualu bua tshisumbu tshia kuikala kuya bua bisangilu. Kudi malu malenga a mu nyuma ne makuabu kabukabu adi muntu upeta padiye ubuela mu bisangilu mu tshisumbu tshia teritware wa muaba udiye musombele. Bakulu badi mua kumonangana pa lukasa ne bamanyishi bonso padiku bualu bua kujikija lukasa lukasa. Mu Mandamuna ku nkonko yenu a musangu mushale bavua baleje makuabu malu malenga mavule.​—Kasuabanga 1991.

Pa tshibidilu, bitu biakanyine menemene bua kubuela mu bisangilu bia pabuipi ne muaba uudi, kuenza nunku kudi kuambuluisha muntu bua kufikaku kumpala kua dîba bua kumona mua kuyikilaku ne bakuabu, kuenzaku malu makuabu adi akengedibua, kuimba musambu wa ntuadijilu ne kuteleja disambila dia ntuadijilu. Padiku bantu bapiabapia badi banyisha bulelela badi basombele pabuipi, tudi tupeta mushindu wa kubakumbula, kulonga nabu Bible ne kulua nabu mu bisangilu bidi biakanyine buabu buobu.

Tudi bajadike se: bamfumu ba mêku nebenze muabu muonso ne meji bua kulonda mubelu eu, batangila malu onso adi akengela bua kufika ku diangata dipangadika ditambe buimpe bua makanda a mu nyuma ne a mubidi a bena mu mêku abu.​—1 Tim. 5:8.