Tuvulukayi bena lulamatu bakadi bakulakaje

¹ Nansha muvua Ana muikale mukaji mukamba wa bidimu 84, ‘kavua umuka mu ntempelo’ to. Lulamatu luende luakasaka Yehowa bua kumubenesha mu mushindu wa pa buawu. (Luka 2:36-38) Lelu’eu, bana betu ba bungi badi ne lungenyi lua buena lua Ana nansha mudibu ne ntatu. Padi bena lulamatu abu batata ne masama ta bapeta makuabu malu bua bukulakaje, badi imue misangu mua kuteketa mu maboko. Tukonkononayi imue mishindu miakanyine itudi mua kuenza bua kubakankamija ne kubambuluisha bua kuikalabu ne tshibidilu tshimpe tshia dienza malu a mu nyuma.

² Bisangilu ne buambi: Padi bana betu bakuabu badi bambula bakulakaje ba lulamatu bua kubafikisha mu bisangilu, bidi bipetesha bawetu aba mushindu wa kubuelamu misangu yonso. Bidi bikolesha bena lulamatu aba badi bakuate mudimu bidimu bia bungi kabidi biambuluisha tshisumbu. Ukadiku muenze pebe mudimu mulenga eu anyi?​—Eb. 13:16.

³ Kupatuka pa tshibidilu mu buambi kutu kupa bena Kristo balelela disanka. Kadi kupatuka mu buambi pa tshibidilu kudi mua kukolela muntu mukulakaje ne eu udi disama dizengeje. Kudiku mushindu wa umue wa ku bana betu bananga aba akufileku bu ‘muena mudimu nebe’ mu imue mishindu ya buambi anyi? (Lomo 16:3, 9, 21) Pamuapa udi mua kumulomba bua nuenu kuyishila nende bantu ku telefone peshi kumuambila bua kuya nebe mu dikumbula ta mu dilonga Bible ne muntu. Bikala muntu mukulakaje au kayi ne mushindu wa kupatuka kumbelu kuya kule, bua tshinyi mulongi webe wa Bible kenaku mua kuikala uluila kua mukulakaje au bua nuenu kulongelaku nende?

⁴ Dilonga ne dishemeja malanda: Ku misangu ne misangu, bamue batu babikidisha muntu mukulakaje anyi eu udi disama dizengeje bua kuluaye kubuela mu dilonga diabu dia mu dîku, anyi baya kuenzela mene dilonga adi kua muntu au. Munga mamu wakaya ne bana bende babidi kumbelu kua muanetu wa bakaji mukuabu mukulakaje bua kulongelabu kuine aku mukanda wa Miyuki ya mu Mukanda wa Nzambi, bakasanka bonso bua mushindu wakashemakana malanda abu. Bantu abu batu kabidi banyisha padibu bababikila bua kudia biakudia anyi bua tshibilu tshikuabu. Padi bantu badi disama dinzengeje kabayi ne bukole bua kusomba mutantshi mule padibu balua kubakumbula, pamuapa udi mua kuyukidila nabu ku telefone peshi kupitshila kumbelu kuabu katantshi kîpi bua kubabadila amue malu, kusambila pamue nabu ta kubalondela bualu budi bukolesha ku muoyo.​—Lomo 1:11, 12.

⁵ Yehowa udi wangata bantu bakulakaje ba lulamatu ne mushinga wa bungi. (Eb. 6:10, 11) Tudi mua kumuidikija, kubaleja ne: tudi tubanyisha ne kubambuluisha bua kutungunukabu ne tshibidilu etshi tshimpe tshia kuenza malu a mu nyuma.