Mvita ya bena tubalu idi ikutangila
1, 2. Mmunyi mudi basadidi ba Nzambi ba lelu baditue mu dikumbaja tshikena-kumona tshia buprofete tshidi mu Buakabuluibua 9:13-19?
1 “Muanjelo muisambombo wakela mpungi.” Pashishe, ‘misumba ya bena mvita ba pa tubalu’ bungi “mbombo ibidi misangu lubombo” kuelabu lubila bu mukungulu wa dikubakuba. Aba ki mbasalayi betu ba pa tshibidilu aba to. “Mitu ya tubalu idi bu mitu ya nyama ya ntambue.” Kapia, muishi ne soufre bivua bipatuka mukana muatu, ne “mikila idi ifuana nyoka.” Baluanganyi ba pa tubalu ba mu tshimfuanyi aba badi bashiya kabutu muaba udibu bapitshila. (Buak. 9:13-19) Udiku mumanye mudi dikumbana dia tshikena-kumona tshia buprofete tshidi tshikemesha etshi tshikutangila anyi?
2 Bashadile bela manyi ne balunda babu mikoko mikuabu badi bamanyisha dilumbuluisha dia Nzambi mu buobumue. Dimanyisha diabu edi didi ditandula patoke mudi Bukua-Buena-Kristo bufue mu nyuma. Mpindieu tukonkononayi malu abidi a mu tshikena-kumona tshia buprofete etshi adi aleja bua tshinyi mudimu wa basadidi ba Nzambi udi muimpe menemene.
3. Mmushindu kayi udibu bakulongeshe bua kumanyisha mukenji wa Nzambi bu mudibi bikengedibua?
3 Balongesha ne bapaya bua kumanyisha mukenji wa Nzambi: Ku diambuluisha dia Kalasa ka Mudimu wa Nzambi ne bisangilu bikuabu bia tshisumbu, batu balongesha basadidi ba Nzambi mua kumanyisha mukenji wa Nzambi ne dikima. Anu bu Yezu ne bayidi bende, batu baya kukeba bantu ba muoyo muimpe, babayisha muaba kayi wonso udibu mua kubapeta. (Mat. 10:11; Mâko 1:16; Luka 4:15; Bien. 20:18-20) Ngenzelu wa buambi wa mu Bible eu mmupatule bipeta bilenga be!
4. Mbia-mudimu kayi bidi biambuluisha bamanyishi ba bungi bua kukumbaja mudimu wabu?
4 Bena Kristo mbafile miliyo ya Bible, mikanda, broshire ne bibejibeji kudi bantu mu dienza mudimu wa kuyisha udi Nzambi mubapeshe. Mikanda eyi mmipatuke mu miakulu mitue ku 400, mikale ne biena-bualu kabukabu ne mifunda mu mushindu wa kusankisha bantu ba mishindu ne mishindu. Utuku ukuata mudimu bilenga ne biamu bia mudimu ebi anyi?
5, 6. Ntshinyi tshidi tshileja ne: bantu ba Yehowa badi ne diambuluisha dia mu diulu?
5 Bulombodi ne diambuluisha bia mu diulu: Tshikena-kumona tshia buprofete etshi tshidi kabidi tshileja patoke ne: mudimu eu udi muleja mu tshimfuanyi kudi bena mvita ba pa tubalu udi wenzeka ku diambuluisha dia Nzambi. (Buak. 9:13-15) Mudimu wa diyisha udi wenzeka pa buloba bujima ki nku meji anyi bukole bua bantu to, kadi nku nyuma wa Nzambi. (Zek. 4:6) Yehowa udi wenza mudimu ne banjelu bua kulombola mudimu eu. (Buak. 14:6) Nunku, ku diambuluisha dia madikolela a Bantemu bende badi pa buloba, Yehowa udi ufila dikuatshisha dia mu diulu bua kukoka bantu ba mitshima mipuekele kudiye.—Yone 6:45, 65.
6 Kakuena muntu udi mua kuimanyika mudimu wa bantu ba Yehowa to, bualu mbabalongeshe ne mbabapaye bimpe bua kumanyisha mukenji wa Nzambi, ne banjelu ke badi babalombola mu mudimu eu. Tutungunukayi ne kuenza tshietu tshitupa tshia mudimu bua dikumbana dia tshikena-kumona etshi tshia buprofete tshidi tshilenga ku muoyo.