‘Unzululayi mitshima yenu bikole’
1. Mbujitu kayi butudi nabu tuetu bonso?
1 Mu tshisumbu tshia bena Kristo, muntu ne muntu udi ne bujitu bua kuenza ne: tshisumbu tshikale ne musangelu. (1 Pet. 1:22; 2:17) Musangelu eu udi ulua patudi ‘tunzulula mitshima yetu bikole’ bua kunangangana. (2 Kol. 6:12, 13, Muanda Mulenga Lelu) Bua tshinyi bidi ne mushinga bua kumanya bimpe bana betu ba balume ne ba bakaji?
2. Bua tshinyi mbimpe kudia bulunda ne bena Kristo netu?
2 Bulunda budi bukola: Patudi tuibidilangana ne bena Kristo netu, tudi tubanga kuangata ditabuja diabu, ditantamana diabu ne ngikadilu yabu mikuabu ne mushinga wa bungi. Bilema biabu bidi bimueneka bu bikese ne bulunda budi bukola. Patudi tumanyangana bimpe, tudi tupeta mushindu wa kukoleshangana ne kusambangana. (1 Tes. 5:11) Tudi mua kulua “basambi” kudi umue ne mukuabu bua kukandamena malu mabi adi mu bulongolodi bua Satana. (Kolos. 4:11) Bu mudiku ntatu ya bungi mu matuku a ku nshikidilu aa, tudi ne dianyisha dia bungi dia kuikala ne balunda bimpe munkatshi mua tshisamba tshia Yehowa.—Nsu. 18:24.
3. Mmunyi mutudi mua kusamba bantu bakuabu?
3 Balunda bimpe badi mua kutukolesha ne kutusamba bimpe patudi mu ntatu mikole. (Nsu. 17:17) Muena Kristo kampanda uvua udiumvua kayi ne mushinga udi wamba ne: “Kuvua balunda bavua bangambila malu malenga avua antangila bua kungambuluisha bua kumusha ngenyi mibi imvua nayi.” Balunda ba mushindu eu ndibenesha dia kudi Yehowa.—Nsu. 27:9.
4. Mmushindu kayi utudi mua kumanya bantu bakuabu mu tshisumbu bimpe?
4 Ikala uditatshisha bua bantu bakuabu: Mmunyi mutudi mua kualabaja dinanga dietu kudi bena Kristo netu? Pa kumusha diela bantu muoyo mu bisangilu, tudi ne bua kudienzeja bua kuyukila malu mimpe a bungi. Ikala uditatshisha bua bualu buabu, kadi kuyi ujinga kumanya malu adi abatangila buobu nkayabu to. (Filip. 2:4; 1 Pet. 4:15) Mushindu mukuabu wa kutabalela bakuabu mpa kubabikila kumbelu bua kudia nabu. (Luka 14:12-14) Udi kabidi mua kulongolola bua kupatuka nabu mu mudimu wa buambi. (Luka 10:1) Patudi tudienzeja bua kumanya bana betu bimpe, tudi tukolesha buobumue mu tshisumbu.—Kolos. 3:14.
5. Mmushindu kayi utudi mua kuvudija balunda betu?
5 Tutuku ne tshibidilu tshia kusungula balunda betu anu munkatshi mua bantu ba mulongo wetu anyi aba badi ne bipatshila bia diatshimue netu anyi? Katulekedi malu a nunku atuelele mikalu mu disungula balunda mu tshisumbu to. Davidi ne Yonatana, nansha Luta ne Naomi bakadia bulunda bukole nansha muvuabu bashilangane ku bidimu ne bakolele mu nsombelu mishilangane. (Luta 4:15; 1 Sam. 18:1) Udiku mua kuvudija balunda bebe anyi? Tuetu ne balunda ba bungi nunku netupete masanka atuvua katuyi batekemene nansha.
6. Mmalu kayi malenga atudi tupeta patudi tualabaja dinanga kudi bana betu?
6 Patudi tualabaja dinanga kudi bakuabu, tudi tukoleshangana ne tukeba ditalala mu tshisumbu. Yehowa udi utubenesha bua dinanga ditudi tuleja bana betu. (Mus. 41:1, 2; Eb. 6:10) Kuenaku mua kudifundila tshipatshila tshia kuibidilangana ne bana betu ba bungi menemene anyi?