Udi mua kulabula bulunda budi bunenga

KUDI bipumbishi bia bulunda. Bushuwa, Bible wakadianjila kulaya ne: mu ‘matuku aa a ku nshikidilu’ nekuikale dipangika dia dinanga, disuangana dia ku tshilelelu, ne bulamatshi ku mikenji. (2 Timote 3:1-5; Matayo 24:12) Nsombelu eyi mmituale tshipupu tshia katshia ne katshia tshia bunkaya. Muntu kampanda wakamba ne: “Bidi amu bu buatu bua Nowa ku mutumba kuanyi. Binuikala kanuyi bena dibaka babidi, kanuena mua kumubuela.” Tshilema tshijima bua nsombelu eu katshiena mua kutekibua pa mutu pa muntu kayi yonso udi bunkaya bukuate. Mu bimue bitupa bia pa buloba, ntatu ya bulunda budi bunenga idi ikonga malu bu mudi bantu badi bamuangala misangu ne misangu, mêku adi akoseka, bimenga bikena musangelu ne bia njiwu, ne dikepela dia dikema dia dîba dia kudiolola.

Musombi kampanda wa mu tshimenga tshia buena-lelu udi mua kupetangana ne bantu bavulavulayi ku lumingu kupita bavua musombi wa mu musoko wa mu siekele wa 18 umona ku tshidimu anyi mene mu bule bua muoyo! Pabi, malanda lelu’eu atu pa tshibidilu a pa mutu pa mutu. Bavule mbaditue ne kasuki kakuyi diikisha mu dikeba dia balunda ne madikolela bua kudiolola. Kadi, tudi ne bua kutonda ne: kusanka ne balunda basungula mu mushindu mubi nkufuane kutumika ne mêba pamutu pa nkunyi. Muambi 7:5, 6 udi wamba ne: ‘Kumvua mibelu ya bena meji kudi kupita kumvua misambu ya bapote buakane. Tuseku tua bapote tudi bu kutudika kua mêba muinshi mua luesu; bualu ebu mbua patupu kabidi.’ Mêba adi bua musangu muîpi apatula kapia katokesha ne ka mutoyi, kadi kakena ne bienji bivule bua kutupetesha luya. Bia muomumue, banyânà bena mutoyi, baseki badi mua kututanaja bua musangu muipi, kadi kabakujimija bunkaya buetu buonso ne kukumbaja dikengela dietu dia balunda balelela.

Bu-katadi-wa-pa-buende mbushilangane ne bunkaya. Bumue bu-katadi-wa-pa-buende budi ne mushinga bua tuetu kudipolesha ne nunku kuikala ne bivule bia kufila bu mulunda. Padibu mpala ne mpala ne bunkaya, bavule badi diakamue banyemena ku mushindu kampanda wa dijikija lutetuku ne tudiomba. Dikebulula kampanda diakasokolola ne: umue wa ku ngandamuinu ya pa tshibidilu ku bunkaya nkubandila televizion. Kadi, bakebuludi aba bakakomesha ne: dibandila dilunguluke dia televizion ntshimue tshia ku bintu bitambe bubi bitudi mua kuenza padi bunkaya butukuate. Didi dilubuluja bukata, lulèngù, ne malu a mu tshingenyingenyi, pa kulua tshipinganyi tshibi pa muaba wa bantu bakuabu ba kushemesha nabu malanda.

Bushuwa, bu-katadi-wa-pa-buende budi mua kuikala ne mushinga mukole bituatumika ne dîba ditudi baditole mu mushindu udi wibaka. Tudi mua kuenza nunku pa kubala, kufunda mikanda, kuenza malu, ne kuikisha. Bu-katadi-wa-pa-buende bùdì buibaka budi bukonga kusambila Nzambi, kulonga Bible, ne kueleelapu meji. (Musambu wa 63:6) Ayi ke mishindu ya kutamba kusemena pabuipi ne Yehowa Nzambi, eu udi mua kulua Mulunda wetu mutambe bunene.

Bilejilu bia mu Bible bia bulunda

Nansha mudibi bimpe bua kushemesha malanda ne bantu bavule, Bible udi utuvuluija ne: ‘kudi mulunda udi upita muanabu ne muntu kumulamata.’ (Nsumuinu 18:24) Tuetu bonso tudi tukengela ndambu wa balunda badi bushuwa batutabalela, bena bulunda budi butupetesha disanka, bukole, ne ditalala. Nansha mudi bulunda bulelela bua mushindu’eu mua kuikala bukese lelu’eu, bimue bilejilu bia kale mbileja mu mushindu wa pa buawu mu Bible. Tshilejilu, kuvua bulunda bua pa buabu pankatshi pa Davidi ne Yonatane. Ntshinyi tshitudi mua kulongelaku? Bua tshinyi bulunda buabu buakanenga?

Bu kabingila kapite bunene, Davidi ne Yonatane bavua batuangaja kudi bipatshila binene bia muomumue. Ku mutu kua bionso, bavua bonso ne budiambiki buondoke kudi Yehowa Nzambi. Pa kusunguluja ditabuja dia Davidi kudi Nzambi ne bienzedi biende mu disungila bantu ba Yehowa, “anyima wa Yonatane wakadisuika bikole ku anyima wa Davidi, ne Yonatane wakabanga kumunanga anu bu anyima wende nkayende.” (1 Samuele 18:1, NW) Nunku, dinanga dia umue ne mukuabu bua Nzambi, didi diambuluisha bua kusuika balunda umue kudi mukuabu.

Yonatane ne Davidi bavua bantu ba dikima bavua ne nsombelu uvua mu diumvuangana ne mêyi-maludiki a Nzambi. Nunku bavua bakumbana mua kulejangana kanemu umue kudi mukuabu. (1 Samuele 19:1-7; 20:9-14; 24:6) Tudi bushuwa babeneshibue bituikala ne balunda batshinyi ba Nzambi badi balombola kudi mêyi-maludiki a mu Mifundu.

Malu makuabu akambuluisha bua kukolesha bulunda bua Davidi ne Yonatane. Malanda abu avua a bululame ne a mpoko, ne yonso wa kudibu uvua wangata mukuabu bu muntu muakanyine dieyemena. Yonatane wakateka diakalenga dia Davidi kumpala kua diende nkayende. Kavua ne lubabu bu muvuabu balaye Davidi bukalenge; bishilangane, Yonatane wakamutua nyama ku mikolo mu lungenyi ne mu nyuma. Ne Davidi wakanyisha diambuluisha diende. (1 Samuele 23:16-18) Mu mishindu miakanyine idi mu diumvuangana ne Mifundu, Davidi ne Yonatane bakamanyishangana umue ne mukuabu bulunda buabu. Bulunda buabu bua buena-Nzambi buvua buashila pa dianyisha ne disuangana bilelela. (1 Samuele 20:41; 2 Samuele 1:26) Kabuvua mua kufua bualu bakashala bonso bantu bena lulamatu kudi Nzambi. Kutumikila mêyi-maludiki a mushindu’eu kudi mua kutuambuluisha bua kuibaka ne kunengesha malanda malelela.

Mushindu wa kudima bulunda

Udi wenda ukeba balunda balelela anyi? Kuyi kubakeba kule. Bamue munkatshi mua benzejanganyi nebe ba pa tshibidilu badi mua kulua balunda bebe, ne badi mua kukengela bulunda buebe. Nangananga pa bidi bitangila bena nkristo netu, mbia meji bua kutumikila mubelu wa mupostolo Paulo wa ‘kunzulula mioyo.’ (2 Bena Korente 6:11-13, MMM) Kadi, kusuyibu bikala madikolela kayi wonso bua kupeta mulunda kaayi afikisha ku tshisuikidi tshiondoke. Bitu pa tshibidilu biangata tshikondo kampanda bua kudima bulunda, ne ki mmalanda onso ikala muondoke mu mushindu wa muomumue. (Muambi 11:1, 2, 6) Bushuwa, bua kulabula bulunda bulelela, tudi ne bua kuepuka budinangi, ne bidi bikengela bua tulonde mubelu eu wa Yezu: “Nuenzele bantu malu onso anudi basue banuenzele.”​—Matayo 7:12.

Mbanganyi badi bakengela bulunda buebe? Pa kumbusha bena mulongo nebe, netuambe tshinyi bua badi bakunyi anyi bakulumpe kuudi? Kuvua dishilangana kampanda dia bidimu mu malanda a Davidi ne Yonatane, Luta ne Naomi, ne Paulo ne Timote. (Luta 1:16, 17; 1 Kolinto 4:17) Udiku mua kualabaja malanda ebe kudi bakamba ne bantu bakuabu bakena babake anyi? Kabidi, ela meji ku aba badi bapiabapia mu muaba uudi musombele. Badi mua kuikala balekele didisangisha ne bavule peshi ne bonso ba ku balunda babu mu dimuangala peshi mu dishintulula nsombelu wabu. Kuindidi bua bakuabu balue kukukeba. Biwikala muena nkristo, udie bulunda budi bunenga pa kutumikila mubelu eu wa Paulo: ‘Mu dinanga dia bana benu ba mu Kristo nunangangane, muntu ne muntu; mu bunême muntu ne muntu ateke mukuabu kumpala.’​—Lomo 12:10.

Tudi mua kufuanyikija bulunda ne mushindu kampanda wa dipangana. Yezu wakamba ne: bituikala tupangana, bantu nebatupe. Wakaleja kabidi ne: disanka dia kupa ndipite dia kuangata. (Luka 6:38; Bienzedi 20:35) Udi mupetangane ne bantu ba nshidimukilu kabukabu anyi? Mpuilu ya bukua-matunga ya Bantemu ba Yehowa mmileje patoke ne: bantu bena nshidimukilu mishilashilangane badi mua kudia bulunda bulelela ne budi bunenga padibu batuangaja kudi ntendelelu wa Nzambi.

Dinengesha bulunda

Bia dibungama, aba badi bangatshibua bu balunda badi imue misangu bakebelangana ntatu umue ne mukuabu. Mineku mibi, bualu bukuatshilangana buela patoke, dipanga dia dianyisha​—aa adi munkatshi mua malu adi atapa bikole ku mutshima padiwu menza kudi muntu kampanda uuvua wangata bu mulunda mulelela. Ntshinyi tshidi mua kuenjibua mu nsombelu ya mushindu’eu?

Fila tshilejilu tshimpe. Enza tshintu kayi tshionso tshiudi mua kuenza bua kuepuka ntatu midikebela. Mu imue miaba ntshilele tshitangalake bua balunda kuseka bua ntupakanyi ya mukuabu. Kadi dinyawudibua anyi dishima kabiakutamba kusemeja balunda pabuipi, nansha bikalabu bamueneka bu badi ‘bela bilele.’​—Nsumuinu 26:18, 19, MMM.

Enza muebe muonso mua kuenza bua kukuba bulunda. Dipanga kumvuangana didi imue misangu mua kubudika padi balunda batekemena bipitshidile kudi umue ne mukuabu. Mulunda udi ne bubedi anyi udi mutatshisha kudi bualu kansanga bunene kakukumbana pamu’apa mua kuleja musangelu bu wa pa tshibidilu. Nunku, mu bikondo bia mushindu’eu, enza madikolela bua kuikala muditeki wa pa muaba wa bakuabu ne mulekeledianganyi.

Jikijayi ntatu ne lukasa mu bulenga buonso. Enzayi nunku pa nkayenu bikalaku mushindu. (Matayo 5:23, 24; 18:15) Keba mua kujadika bikala mulunda webe mumanye ne: udi musue bua kukuba malanda mimpe. Balunda bena mpoko badi bafuilangana luse umue ne mukuabu. (Kolosai 3:13) Newikale mulunda wa mushindu au​—eu udi utamba kulamata kupita muanabu ne muntu anyi?

Kubala ne kuela meji pa bidi bitangila bulunda nntuadijilu patupu. Bikala bunkaya butukuate, tuangatayi dipangadika diakanyine, bua bunkaya kabunengi. Bituenza madikolela, tudi mua kupeta balunda balelela. Ne bamue ba kudibu, netuenze tshisuikidi kampanda tshia pa buatshi. Kadi muntu nansha umue kêna mua kuangata muaba wa Nzambi, Mulunda mutambe bunene. Anu Yehowa ke udi mua kutumanya, kutumvua, ne kututua nyama ku mikolo mu mushindu wa tshishiki. (Musambu wa 139:1-4, 23, 24) Kupita apu, Dîyi diende didi dileja ditekemena dia mpatshi bua matuku atshilualua​—bulongolodi bupiabupia muikala mushindu wa kupeta balunda balelela bua kashidi.​—2 Petelo 3:13.

[Bimfuanyi mu dibeji 5]

Davidi ne Yonatane bakalabula bulunda bulelela, tuetu petu tudi mua kubulabula