Tudi tukengela balunda balelela

JENNY ne Sue badi benza diyukidilangana dikanzabale. Mimuemue idi ifukunyibua, mêsu adi abalakana​—tshintu kayi tshionso mu ngenzelu wabu tshidi tshisokolola ntema mivule ku tshidi mukuabu wamba. Nansha mudibu ne nshidimukilu mishilangane, badi kakuyi mpata ne bivule bidi bibatuangaja ne badi ne kanemu ka bungi bua umue ne mukuabu.

Muaba mukuabu, Eric ne Dennis badi batumika pamue mu mudimu kampanda, umue wa ku mivule idibu benze mu bule bua bidimu. Badi badiolola, ne tuseku tudi tulua mu mushindu mupepele. Padi muyuki ubuela mu biena-bualu binene, badi ne bululame buonso bashintakajangana mmuenenu. Badi balejangana kanemu umue ne mukuabu. Anu bu Jenny ne Sue, Eric ne Dennis mbalunda balelela.

Mumvuija aa adi mua kusanguluja mutshima webe, pa kukufikisha ku diela meji pa bidi bitangila balunda bebe nkayebe. Ku luseke lukuabu, adi mua kukufikisha ku dizukila bua kuikala ne malunda a mushindu’eu. Udi pebe mua kuapeta!

Bua tshinyi tudi tukengela balunda balelela

Malunda mimpe adi ne mushinga bua dikala-bimpe dia lungenyi luetu ne mubidi wetu. Kadi, patudi tumvua bunkaya, ebi kabiena biumvuija ne: kudi tshintu kampanda tshibi ku luetu luseke. Bamue bakebuludi badi bamba ne: bunkaya budi nzala, tshifunkunyi tshia ku tshilelelu tshia se: tudi tukengela bulunda. Mu mushindu wonso, anu bu mudi biakudia bipolesha anyi bijikija nzala, mushindu muimpe wa malunda udi mua kukepesha bunkaya anyi mene kubujimija. Kupita apu, kuikala ne balunda bimpe badi batuangata ne mushinga ki ntshintu tshidi katshiyi mua kuenzeka.

Bantu bakafukibua ne dijinga dia bulunda. (Genese 2:18) Bible udi wamba ne: mulunda mulelela, anyi nyânà, ‘udi muanenu udi ukenga nebe mu makenga onso.’ (Nsumuinu 17:17, MMM) Nunku, balunda balelela badi ne bua kuikala bakumbane bua kulombangana diambuluisha umue ne mukuabu padidi dikengedibua. Kadi bulunda budi bumvuija bivule kupita ne kule kuikala patupu ne muntu udi mua kukuambuluisha udi nyanebe mu mudimu anyi dinaya. Balunda bimpe badi balubulujangana ngikadilu milenga umue ne mukuabu. Nsumuinu 27:17 udi wamba ne: ‘Bu mudi tshiamu tshisakisha tshinga tshiamu, mbu mudi muntu ulengeja tshikadilu tshia mulunda wende.’ Anu bu mudi tshitupa kampanda tshia tshiamu mua kuambuluisha bua kusakisha tshituidi tshia tshiamu tshia muomumue, mulunda umue udi mua kulubuluka mu disakisha ngikadilu wa lungenyi ne wa mu nyuma bia mukuabu. Bikala diedibua mâyi ku makasa ditubungamija, ditangila dia dinanga ne dikankamija diashila pa Mifundu bia mulunda bidi mua kuikala bisanguluja bikole.

Mu Bible, bulunda mbusuikakaja ku dinanga, dimanyangana, dikuatshilangana malu, ne bunyânà. Malunda adi mua kukonga bena mutumba netu, bena mudimu netu, ne bakuabu kabidi. Bakuabu badi babala kabidi bamue ba ku balela babu munkatshi mua balunda babu ba pa muoyo. Kadi, bua bavule matuku adi panshi aa, mbikole bua kupeta ne kunenga ne balunda balelela. Bua tshinyi bidi nunku? Udiku mua kulabula malunda malelela ne adi anenga anyi?