Kuata mudimu bimpe ne Bible
1. Ntshinyi tshiudi mua kuenza bua kudilongolola ku mudimu wa buambi?
1 Nansha tuetu tufila mukanda kayi wonso mu mudimu wetu wa buambi, tudi ne bua kusungula mvese kampanda muimpe udi weleshisha meji bua kubadila bonso bikala ne bua kututeleja. (Eb. 4:12) Kukeba mvese kampanda udibu batela mu mukanda uudi upesha muntu kudi mua kuambuluisha bu tshilamba pankatshi pa muyuki ne difila dia mukanda. Miaba mikuabu, bamanyishi batu bamona ne: mbimpe kuikala ne Bible ku bianza padibu bapetangana ne muntu anyi padibu bayisha ku nzubu ne ku nzubu.
2. (a) Mmunyi muudi mua kutuadija muyiki ne muntu ne mvese kampanda? (b) Mmalu kayi a mu Bible adi atamba kusankisha bantu mu teritware wenu?
2 Tuadija muyiki ne mvese kampanda: Bamue bamanyishi batu batuadija muyiki ne muntu pa kumukonka mudiye wela meji pa mvese kampanda udibu bamubadila mu Bible. Kuenza nanku kudi kukoka diakamue ntema ya muntu mu Dîyi dia Nzambi. Ku mishindu ya kutuadija miyuki idi ilonda eyi, kudiku eyi idi miakanyine teritware wenu anyi?
▪ “Wewe muikala ne bukokeshi bua kuenza malu a mushindu eu, kuenaku mua kuenza anyi?” Bala Buakabuluibua 21:4.
▪ “Bua tshinyi mu matuku etu aa kudi nsombelu mikole?” Bala 2 Timote 3:1-5.
▪ “Udiku wela meji ne: nsombelu udi mua kuikala mulenga bu bantu bonso mua kulonda mubelu eu anyi?” Bala Matayo 7:12.
▪ “Udiku mumone ne: bana bebe badi mua kupeta nsombelu udibu bumvuije mu mvese eu anyi?” Bala Musambu 37:10, 11.
▪ “Udiku wela meji ne: mêyi adi mu mvese eu nealue malelela dituku dikuabu anyi?” Bala Yeshaya 33:24.
▪ “Ukadiku mumvue bakula bua dishintuluka dia mbulamatadi dia buena didibu baleje muaba eu anyi?” Bala Danyele 2:44.
▪ “Ukadiku muela meji bua kukonka Nzambi lukonko lua buena elu anyi?” Bala Yobo 21:7.
▪ “Udi wela meji ne: tudi mua kupetangana kabidi ne bantu batudi bafuishe anyi?” Bala Yone 5:28, 29.
▪ “Bafue batuku bamanye malu atu ba-muoyo benza anyi?” Bala Muambi 9:5.
3. Mmunyi mutudi mua kuambuluisha bantu bua kumvuabu bimpe mvese itudi tubabadila mu Bible?
3 Umvuija mvese, fila tshilejilu ne leja mushindu wa kumutumikila: Pikala muntu yeye musue bua kuyikila nende, kuditu anu mu dimuambila malu patupu to. Kadi umumvuije mvese, ufile bilejilu ne umuleje mushindu wa kutumikila mvese uudi mubale bua amumvue bimpe. (Neh. 8:8) Padi bantu bumvua bimpe ne bitaba malu adi Dîyi dia Nzambi dilongesha, nsombelu wabu udi mua kushintuluka biakane.—1 Tes. 2:13.
4. Mmunyi mutudi mua kuenza mudimu bilenga ne Bible patudi tupinganyina muntu?
4 Tungunuka ne kukuata mudimu bilenga ne Bible paudi ujula bantu dijinga dia kumanya bia bungi. Udi mua kulonda ngenzelu umue umue eu paudi upinganyina bantu bauvua muyikile nabu: (1) Sungula mvese idi mikumbanyine. (2) Jula lukonko lupepele ludi lulomba mmuenenu wa muntu pa mvese au. Pashishe umubale. (3) Umvuija mvese, fila tshilejilu ne leja mushindu wa kumutumikila. Uditatshishe bua musangu wonso uudi uya kutangila muntu, ashalaku ne bualu kampanda bupiabupia busakidila ku dimanya diende dia Dîyi dia Nzambi. Wewe muenza nanku, abidi asatu udi mua kutuadija kulonga Bible ne muntu au!