Udi wenza mudimu wa buambi ne muoyo webe mujima anyi?
1 Mukanda wa Bienzedi udi wamba ne: bayidi ba Yezu bakenza mudimu wa buambi, e ‘kuyishabu bantu ne muoyo mujima.’ (Bienzedi 2:40, NW; 8:25; 28:23) Ke tshivua kabidi tshipatshila tshia mupostolo Paulo. (Bienzedi 20:24) Bu muudi mumanyishi wa lumu luimpe, tshipatshila etshi ki ntshiudiku pebe natshi anyi? Neutshikumbaje munyi?
2 Longolola mêyi awamba: Bua wewe kumona mua kuyisha bimpe, kudianjila kudilongolola kudi ne mushinga. Bidi nanku nangananga paudi ufila bibejibeji kudi bantu, bualu biena-bualu bitumu bitu bishintuluka misangu yonso. Bua kutuambuluisha bua tudilongolole bimpe, Mudimu wetu wa Bukalenge eu udi ne malu mapiamapia; mu mulongo udi ku dia bakaji, mudi bilejilu bia mêyi a kuamba patudi tujinga kufila Tshibumba tshia Nsentedi ne Réveillez-vous! kudi bantu. Nebasungule tshiena-bualu tshidi ne malu adi mua kusankisha bantu ba bungi mu nimero ne nimero yonso wa Mudimu wetu wa Bukalenge. Mmushindu kayi uudi mua kuenza mudimu ne mêyi makese aa?
3 Sungula mêyi a kubangisha nawu audi mumone ne: adi mua kupatula bipeta bimpe mu teritware wenu. Bala tshiena-bualu tshidibu baleje ne ntema yonso, pashishe ufunde malu masunguluke adi mua kukoka ntema ya bantu bawayikila nabu. Keba mvese udibu batele mu tshibejibeji udi upetangana ne bualu bunudi nuyikila ne uudi mua kubadila muntu unuayikila nende. Sakidila tu-mêyi tukese tua kuoya natu diyuki ne kankamija unudi nuyikila nende bua kubalaye tshibejibeji atshi. Pikalabi bikumbanyine, umuambile mu mêyi makese ne: muntu yonso udi musue udi mua kufila diende dipa bua kukuatshisha mudimu udi Bantemu ba Yehowa benza pa buloba bujima. Teta kuambulula misangu ya bungi tu-mêyi tuebe tua kuamba bangabanga ne kufila tshibejibeji kudi muntu.
4 Difundila tshipatshila tshia kubadila bantu mu Bible: Paudi mudilongolole bimpe, udi mua kuenza mudimu ne mvese misangu ya bungi paudi wakula ne bantu. Tshilejilu, bamanyishi bapiluke ba bungi badi bakumbaja mudimu wabu ne disanka pa kuya ku nzubu kua muntu ne Bible mukuata ku bianza, kuela muntu muoyo ne pashishe kuamba ne:
▪ “Tudi tuenda tukonka bantu bua kumanya ni batu pabu bitaba bualu ebu . . .” Bala mu Genese 1:1, pashishe umukonke ne: “Tshiena mumanye ni udi pebe witaba bualu ebu?” Pikala muntu muitabe bualu abu, utungunuke ne: “Ne meme panyi ndi mbuitaba. Kadi, udi wela meji ne: bu mudi Nzambi ke udi mufuke bintu bionso, nanku tudi mua kuamba ne: yeye ke udi mukebeshe bubi anyi?” Umulekele andamune, ne pashishe ubale Muambi 7:29. Kunyima, bulula mukanda wa Dimanya mu dibeji dia 71, ne bala tshikoso 2. Lomba muntu bua abale mukanda eu. Bikala muntu kayi witaba tshidibu bambe mu Genese 1:1, umulombe bua kubalaye mukanda wa La Bible: Parole de Dieu ou des hommes?
5 Tupinganyinayi muntu yonso udi muleje dijinga dia kumanya bia bungi: Kuena mua kuamba ne: udi wenza mudimu webe ne muoyo mujima pawikala kuyi upinganyina muntu yonso uvua muleje dijinga nansha dikese dia kumanya malu makuabu to. Paudi uyikila bimpe ne muntu bienza ne disanka, nansha yeye kayi muanyishe bua kubala tshibejibeji ta mukanda mukuabu uudi mumuleje, tshidiku kupu muoyo bua kufunda dîna diende ne muaba udiye usombela. Udienzeje bua kupinganyina muntu eu ne lukasa bua kukolesha dijinga diende adi. Ku ndekelu, kuelakanyi bua kumulomba bua kutuadija kulonga nende Bible.
6 Bayidi ba Kristo ba mu bidimu lukama bia kumpala bavua bamanye ne: Yezu uvua mubatumine dîyi bua ‘kuyisha bikole’ malu avua amutangila. (Bien. 10:42, NW) Dîyi dimue dimue adi nditutangile ne tuetu petu, bualu, bua kuvuija bantu bayidi, tudi ne bua kuyisha bikole. (Mat. 28:19, 20) Tuenzayi muetu muonso bua kuenza mudimu wetu ne muoyo mujima.—2 Tim. 4:5.