Mandamuna ku nkonko yenu

▪ Mmushindu kayi muimpe utudi mua kufila mapa a mfranga bua bana betu badi bakenga mu matunga makuabu?

Mu kupita kua matuku, tutu tumvua lumu bua bana betu badi mu matunga makuabu badi dijinga ne diambuluisha ne bintu bua buluishi, bipupu anyi nsombelu mikole bidi bibafikile. Bamue bana betu mbafika ku dituma diakamue makuta ku biro bia filiale ya matunga aa balomba bua se: makuta abu adibu batuma bambuluisha nawu muntu kampanda anyi tshisumbu kansanga peshi benza nau mudimu wa luibaku muaba kankenga.​—2 Kol. 8:1-4.

Nansha mudi diditatshisha ne dinanga mushindu’eu bua bena Kristo netu dikala ne mushinga, misangu ya bungi kutu kumueka dijinga dia lukasa lukasa kudi bantu bakuabu kupita dia aba badibu batumina diambuluisha. Mu imue nsombelu, aba badibu batumina diambuluisha bakadi bamane kujikija dijinga diabu. Nansha nanku, tuikala bashindike ne: padi muntu utuma mapa ku biro bia filiale wa ditunga didiye musombele bua mudimu wa buambi udi wenzeka pa buloba bujima, bua luibaku lua Nzubu ya Bukalenge, anyi bua kuambuluisha bantu badi makenga makuate, nebenze nawu mudimu anu bu mudi muntu udi muatuma musue.

Bana betu ba mu biro bionso bia filiale mbalongesha bimpe bua kuandamuna ku majinga onso a mu tshimpitshimpi ne lukasa luonso. Mu bualu buonso budi bumueneka, biro bia filiale bidi mua kumanyisha Kasumbu Kaludiki. Bikalabu dijinga ne dikuatshisha dia pa mutu kabidi, Kasumbu Kaludiki kadi mua kulomba biro bia filiale bidi pabuipi apu bua kubambuluisha anyi biro bidi bilombola mudimu pa buloba bujima bidi mua kutuma makuta biobi nkayabi.​—2 Kol. 8:14, 15.

Nunku, mapa kayi onso adi mafila bua mudimu wa buambi wa pa buloba bujima, bua luibaku lua Nzubu ya Bukalenge mu matunga makuabu, anyi bua kuambuluisha bantu badi makenga makuate, badi ne bua kuatuma ku biro bia filiale wa ditunga dinudi kupitshila mu tshisumbu anyi buludiludi. Mu mushindu’eu, “mupika wa lulamatu ne wa budimu” udi ukumbaja majinga a bana betu pa buloba bujima bimpe mu bulongame ku butuangaji bua ndongoluelu miakaja kudi Kasumbu Kaludiki.​—Mat. 24:45-47, NW; 1 Kol. 14:33, 40.