Tshikondo tshia Tshivulukilu ke dîba dia kuvudija mudimu
1. Bikondo bia ‘bibilu’ bivua bifikisha muena Isalele yonso mutshinyi wa Nzambi ku tshinyi?
1 Ku tshidimu tshionso mu bikondo bijadika, bena Isalele wa kale bavua ne matuku avuabu basekelela ‘bibilu bia [Yehowa].’ (Lew. 23:2, MMM) Kuela meji bua buimpe bua Nzambi kuvua kubatuadila disanka divule ne kubasaka bua kuikala ne tshisumi bua ntendelelu mukezuke.—2 Kul. 30:21–31:2.
2, 3. Bua tshinyi mbiakanyine bua tuetu kuvudija mudimu wetu wa mu nyuma mu tshikondo tshia Tshivulukilu, ne ndituku kayi dituenza tshibilu etshi?
2 Mu bikondo bietu ebi, mudimu wetu wa Nzambi utudi tuenza ne disanka utu uvula tshidimu tshionso mu tshikondo tshia Tshivulukilu. Tshitu tshikondo tshitutu tuela meji bikole bua dipa dia mushinga mupite bukole didi Yehowa mufile bua bualu buetu, mbuena kuamba ne: lufu lua Muanende umuepele mulela. (Yone 3:16; 1 Pet. 1:18, 19) Patudi tuelangana meji bua dinanga didi Nzambi ne Muanende batuleje, tudi tudiumvua basakibue bua kutumbisha Yehowa ne bua kudienzeja bua kuenza tshidi disua diende.—2 Kol. 5:14, 15.
3 Tshidimu etshi, Tshivulukilu netshienzeke mu Dinayi dia matuku 24 a ngondo muisatu kunyima kua dibuela dia dîba. Mmunyi mutudi mua kuvudija mudimu wetu wa buambi mu ngondo muisatu, muinayi ne muitanu?
4, 5. (a) Ntshinyi tshivua bamue bantu benze bua kuyisha bantu ba bungi lumu luimpe? (b) Ntshinyi tshiudi mumone pebe tshikumbane kuenza muetu munemu bua tuetu kufika ku diambuluisha bantu ba bungi nunku?
4 Kukeba bantu ba bungi: Keba mishindu ya kupetangana ne bantu ba bungi paudi uyisha. Kuenaku mua kuyisha ku nzubu ne ku nzubu padi bantu ba bungi ku mbanza yabu, bu mudi mu mapingaja anyi ku dilolo menemene anyi? Bikala bamue bantu ba mu kasumbu kenu ka dilonga dia mukanda bajinga bua kuyisha kumpala kua dilonga, mutangidi wa dilonga dia mukanda neenze tshisangilu tshikese tshia mudimu, utuma bantu mu teritware wa pabuipi ne muaba wa dilonga dia mukanda.
5 Mushindu mukuabu wa kupetangana ne bantu ba bungi ngua kuyisha miaba itu bantu ba bungi bendela. Muanetu mukuabu wa bakaji wa mu ditunga dia Japon wakajinga bua kuikala mpanda-njila muambuluishi nansha muvuaye ne mudimu uvua umuangata dîba dia bungi. Mukulu mukuabu kumupesha lungenyi bua kuikalaye uyisha mu njila dituku dionso pabuipi ne muaba utu bantu bangatshila kawulu kumpala kua kuyaye ku mudimu wende. Yeye mumane kumusha bundu buvuaye nabu ne mutantamene tuseku tua bena ngendu bavua bapita ne njila, wakalua kupeta bantu batue ku 40 bakavuaye ushila bibejibeji pa tshibidilu, ne mu bobu emu muikale bavua bena ngendu, bena mudimu ba mu ngala wa kawulu ne bena makazen bavua pabuipi apu. Uvua ufila wa bibejibeji bitue ku 235 ku ngondo yonso. Bu muvuaye uyukila ne bantu dituku dionso mu minite mikese tshianana, wakatuadija kulonga Bible ne bantu basambombo.
6. Mmunyi mudi bansonga mua kuvudija mudimu wabu wa mu nyuma?
6 Kuyisha padi mpunga umueneka: Bambi ba lumu luimpe ba bungi batshidi mu kalasa batu ne bikondo bitubu bapeta dikisha. Mu matuku a dikisha aa se badi mua kuikala bampanda-jila bambuluishi. Kabidi, bansonga bena Kristo badi mua kubandisha mudimu wabu pa kuyisha mu bilongelu biabu. Pamuapa neukeme pawamona dijinga dikole didi balongi nebe mua kuikala nadi bua kumvua malongesha etu. Kuenaku mua kukeba mua kuyisha bikondo bu mudi bia padi mulongi yonso ulonda bualu mu kalasa nubuyukila anyi padi yonso wa kunudi udifundila bualu pa biena-bualu kampanda bu mudimu mulomba kudi mulongeshi anyi? Bamue mbafike ku diyisha nanku pa kulejangana bande yetu ya video. Banga pabu mbatuadije kulonga Bible ne balongi nabu ne babafikishe too ne ku didilambula ne ku batismo. Eyi mmishindu milenga itudi nayi bua ‘kutumbisha dîna dia Yehowa.’—Mus. 148:12, 13.
7. (a) Mmunyi muvua muanetu wa balume mukuabu mufike ku diyisha pavua mpunga mimueneke? (b) Ukadiku pebe muenze bualu bua mushindu’eu anyi?
7 Mu midimu yebe ya dituku dionso, keba mpunga ya kuyisha bantu malu malenga adi Nzambi mulaye. Muanetu wa balume mukuabu utu ne tshibidilu tshia kuya ku mudimu ne kawulu utu uyisha bantu badiye wenza nabu luendu padiku mushindu. Tshilejilu, pavuaye windila kawulu kibidi bua kutungunuka ne luendu luende, uvua uyisha nsonga kampanda minite bu itanu dituku dionso. Ke nsonga au ne mulunda wende kuitababu bua kulonga Bible. Bavua balongela Bible mu luendu luabu elu mu kawulu. Panyima pa matuku makese, mamu mukuabu mukulakaje uvua muteleje muyuki wabu ne ntema ya bungi wakalomba muanetu wa balume eu bua kumulongeshaye Bible. Bakadi bamulongeshela pende Bible mu kawulu matuku adiye wenza luendu. Mu mushindu’eu, muanetu au mmufike ku dilonga ne bantu dikumi anu mu kawulu.
8. Mmushindu kayi udi bana betu badi bakulakaje anyi badi ne masama mua kuyisha bua kumona mua kuvudija mudimu wabu?
8 Kadi newenze tshinyi bikala bukulakaje anyi masama akupangisha mua kuenza malu makuabu? Mishindu ya bungi idi anuku iudi mua kutumbisha Yehowa bikole. Ukadiku mutete bua kuyisha ku telefone anyi? Wewe kuyi mumanye tshia kuenza, udi mua kuyukila ne mutangidi wa dilonga dienu dia mukanda. Udi mua kulongolola bua wewe kuenza mudimu wa nunku pamue ne bamanyishi bakuabu batu bawenza bimpe. Panudi nuenza mudimu pamue, nudi nuenda nulongeshangana ne muinebe ne nuambuluishangana bua kuyisha bimpe. Ngenyi mikuabu mimpe ya mushindu wa kuyisha ku telefone idi mu Mudimu wetu wa Bukalenge wa Luishi 2001, dibeji 5-6.
9. Mmunyi mutudi mua kuambuluisha balongi ba Bible bua kukumbaja ngikadilu milomba bua kutuadijabu kuyisha bantu pamue ne tshisumbu tshijima?
9 Kubuela mu Tshivulukilu kudi mua kukolesha dijinga dia bapiabapia bua kutumbishabu Yehowa bikole. Tudi ne bua kubambuluisha bua kumushabu bundu budi mua kubenza bua kuyisha padibu baya mu buambi pa kulondaku malu adi akolesha mamona mu mudimu wa buambi ne pa kubalongesha bimpe mua kumvuija malongesha a mu Bible ne kubingisha ditabuja diabu kumpala kua bantu. (1 Pet. 3:15) Bikala mulongi wa Bible uleja dijinga dia kulua muambi wa lumu luimpe, ambila mutangidi-muludiki. Yeye nealongolole bua kuyukila ne mulongi eu bua kujadika bikalaye mukumbaje ngikadilu milomba bua kubanga kuyisha patoke ne tshisumbu tshijima. Yehowa udi usanka bikole padiye umona bantu basungula bua kulamata ku bumfumu buende butambe bunene.—Nsu. 27:11.
10. (a) Mmunyi mudi programe muimpe mua kutuambuluisha bua kuikala bampanda-njila bambuluishi? (b) Uvuaku muenze mudimu wa bumpanda-njila buambuluishi tshidimu tshishale mu tshikondo tshia Tshivulukilu anyi? Mmunyi muwakaukokesha?
10 Kuenaku mua kulua mpanda-njila muambuluishi anyi? Mêba 50 adibu balombe mpanda-njila muambuluishi mbualu bua wewe kuelela meji a bungi ne muoyo mujima. (Mat. 5:37) Bidi bikulomba bua wewe kuyisha ku lumingu luonso mêba 12 owu mikale makese. Kakuenaku programe umue wa mudimu wa bumpanda-njila buambuluishi ku idi mu dibeji 5 ayi udi ukukumbanyina anyi? Bikalabi kabiyi nanku, udiku mua kuenza webe programe bua kulua mpanda-njila muambuluishi mu ngondo muisatu, muinayi anyi muitanu anyi? Lomba Yehowa bua akuambuluishe mu bionso biudi wenza bua kuvudija mudimu webe.—Nsu. 16:3.
11. Mmunyi mudi bakulu ne basadidi ba mudimu mua kuambuluisha bantu bonso bikala bampanda-njila bambuluishi?
11 Bakulu ne basadidi ba mudimu nebenze muabu muonso bua kukuambuluisha mu tshikondo etshi tshia pa buatshi tshia Tshivulukilu bua wewe kutumbisha Yehowa. Pamuapa ba bungi ba kudibu nebikale bampanda-njila bambuluishi. Bakulu nebalongolole bua kuikale bisangilu bia bungi bia mudimu wa buambi mu mêba: bu mudi a mu mapingaja, ku dilolo munkatshi mua lumingu ne ku ndekelu kualu bikalabi bikengedibua. Bua kumanya muaba ne dîba dienzeka bisangilu ebi ne muntu wikala mua kubilombola, bakulu nebayukile ne bantu bakadi badilongolole bua kuenza bumpanda-njila mushindu’eu anyi bakuabu bonso batshidi bela meji a kubuenza. Bakulu badi ne bua kudienzeja bua kulongolola malu bua bamanyishi bakuabu bikaleku banudi mua kupatuka nabu mu matuku ne mêba anudi bateke bua kuyisha. Mushindu’au, programe idi mua kukumbana bimpe, nunku nuenu kukumbaja malu a bungi mimpe.—Nsu. 20:18.
12. Ntshinyi tshidi ne bua kutusaka bua kutumbisha Yehowa misangu yonso?
12 Enza muebe muonso: Bikala nsombelu webe kayi ukupetesha mushindu wa kulua mpanda-njila muambuluishi, ikala mumanye ne: Yehowa udi wanyisha mudimu utudi tuenza ne muoyo wetu mujima ne milambu yetu bilondeshile ‘bitudi nabi, ki mbitudi katuyi nabi’ to. (2 Kol. 8:12) Tudi ne malu a bungi adi ne bua kutusaka ku diela Yehowa tuasakidila. Davidi uvua muambilamu pakafundaye ne: ‘Nemvudijile Yehowa disanka bikondo bionso, kumutumbisha kuanyi nekuikale mukana muanyi misangu yonso.’ (Mus. 34:1) Tuetu bonso, tuangatayi dipangadika dia kuenza nunku mu tshikondo etshi tshia Tshivulukilu.
[Kazubu mu dibeji 3]
Mmunyi muwavudija mudimu webe?
▪ Uyishe padi bantu ku nzubu yabu
▪ Uyishe miaba idi bantu ba bungi bendela
▪ Uyishe ku mudimu anyi mu kalasa
▪ Uyishe ku telefone
▪ Wikale mpanda-njila muambuluishi
[Kazubu mu dibeji 5]
Programe mikumbane bua bampanda-njila bambuluishi—Mushindu wa kuyisha mêba 12 ku lumingu luonso
Mu dinda—Dimue too ne ku Disambombo
Dia lumingu didi mua kupingana pa muaba wa dikutu dikuabu dionso mu programe.
Dituku Tshikondo Mêba
Dimue Mu dinda 2
Dibidi Mu dinda 2
Disatu Mu dinda 2
Dinayi Mu dinda 2
Ditanu Mu dinda 2
Disambombo Mu dinda 2
Mêba onso masanga: 12
Matuku abidi majima
Udi nansha mua kudisunguila ebe matuku abidi mu lumingu. (Bilondeshile matuku audi musungule, programe eu udi mua kupatula anu mêba 48 ku ngondo.)
Dituku Tshikondo Mêba
Disatu Dituku dijima 6
Disambombo Dituku dijima 6
Mêba onso masanga: 12
Dilolo matuku abidi ne ku ndekelu kua lumingu
Udisunguile ebe matuku abidi a munkatshi mua lumingu bua kuyisha ku dilolo.
Dituku Tshikondo Mêba
Dimue Dilolo 11⁄2
Disatu Dilolo 11⁄2
Disambombo Dituku dijima 6
Dia lumingu Tshitupa tshia dituku 3
Mêba onso masanga: 12
Matuku asatu mu mapingaja ne mu Disambombo
Dia lumingu didi mua kupingana pa muaba wa dikutu dikuabu dionso mu programe.
Dituku Tshikondo Mêba
Dimue Mu mapingaja 2
Disatu Mu mapingaja 2
Ditanu Mu mapingaja 2
Disambombo Dituku dijima 6
Mêba onso masanga: 12
Programe wanyi nkayanyi wa mudimu
Difundila bungi bua mêba buudi musue kuenza tshikondo tshionso tshiudi uyisha.
Dituku Tshikondo Mêba
Dimue
Dibidi
Disatu
Dinayi
Ditanu
Disambombo
Dia lumingu
Mêba onso masanga: 12