Tukoleshanganayi
1 Mupostolo Paulo wakenza muende muonso bua kukolesha bena kuitabuja nende. (Bien. 14:19-22) Bia muomumue, tudi basue kuambuluisha bana betu padibu bapeta ntatu. Bible udi utuleja ne: ki mbakulu nkayabu badi ne bua kutabalela bakuabu to, kadi mbantu bonso. (Lomo 15:1, 2) Mubelu eu udi wamba ne: “Nusambangane, nudiundishangane muntu ne muntu,” tudi mua kuutumikila mu mishindu ibidi idi ilonda eyi.—1 Tes. 5:11.
2 Tumanye majinga a bakuabu: Dîyi dia Nzambi didi dituambila ne: Dôka uvua ne ‘midimu mimpe ya bungi ne luse biakenzelanzelaye bantu.’ (Bien. 9:36, 39) Uvua umona aba bavua dijinga ne bintu ne uvua ubambuluisha bilondeshile muvuaye mukokeshe. Dôka mmutushile tshilejilu tshimpe be! Tshilejilu, udi mumanye mukulakaje kampanda udi ukengela kuambuluisha bua kuluaye mu bisangilu. Anyi mpanda-njila kampanda udi kayi ne muntu wa kuya nende mu buambi matuku a munkatshi mua lumingu ku dilolo. Wewe mumanye bantu badi ne ntatu ya mushindu eu ne mubambuluishe, nebibakoleshe ku muoyo bikole be!
3 Kuyukila malu a mu nyuma: Tudi mua kukolesha kabidi bakuabu ku ngakuilu wetu. (Ef. 4:29) Mukulu kampanda ukadi mumonamona malu udi wamba ne: “Wewe musue kukolesha bakuabu ku muoyo, akula malu a mu nyuma. Bua kutuadija muyuki wa nunku, udi mua kuela anu lukonko lukese bu mudi: ‘Mmunyi muwakamanya bulelela?’” Ikala utabalela kabidi bansonga badi mu tshisumbu. Keba aba badi batekete mu mikolo ne badi ne bundu bua kuakula. (Nsu. 12:25) Kulekedi miyuki ya malu a tshianana inuangata dîba dia bungi kupita malu a mu nyuma to.—Lomo 1:11, 12.
4 Kadi mmalu kayi audi mua kuamba bua kukolesha bakuabu? Kuenaku mua kuikala mupete bualu buimpe budi buvudije dinanga ne dianyisha diebe kudi Yehowa pauvua ubala Bible anyi udilongela anyi? Bualu kampanda bua mu muyuki wa patoke anyi mu Dilonga dia Tshibumba tshia Nsentedi buvua bukusankishe anyi? Anyi muyuki kampanda udibu balonde udi ukolesha ditabuja diebe anyi? Padi mutshima wetu muule tente ne malu a nunku, netuikale misangu yonso amu ne kabualu kimpe ka kuambila bakuabu.—Nsu. 2:1; Luka 6:45.
5 Tuetu tuambuluisha bana betu ne tuenza mudimu bimpe ne ludimi luetu, netukoleshangane bushuwa.—Nsu. 12:18.