Tutumayi ntema ya bantu ku ‘munya wa ba pa buloba’

1. Mmunya munene udibu batele mu Dîyi dia Nzambi ntshinyi? Ntshikondo kayi tshishilangane ne bikuabu tshitubu batangija ntema ya bantu ku munya eu?

¹ Yehowa wakambila muprofete Yeshaya bua kufunda ne: ‘Bakadi benda mu mîdima bakumona munya munene; pa bantu bakadi bashikame mu buloba bua mîdima mikole pakatemena munya au.’ (Yesh. 9:2) “Munya munene” eu wakamuenekela ku malu akenza Yezu Kristo Muana wa Nzambi. Mudimu wa kuyisha uvuaye muenze pa buloba ne malu mimpe adi afumina ku mulambu wende biakambuluisha bantu bavua mu mîdima ya mu nyuma. Bantu badi dijinga ne butoke bua mushindu’eu mu tshikondo tshietu etshi tshia mîdima. Tshikondo tshia Tshivulukilu tshia lufu lua Yezu tshidi tshitupetesha mushindu wa kutuma ntema ya bantu ku ‘munya wa ba pa buloba.’ (Yone 8:12) Tshidimu tshishale, bantu miliyo mivule bavua baleje ditabuja anu bu tuetu bualu bakatumikila mukenji wa Yezu udi wamba ne: “Nuikale nuenza nenku bua kumvuluka”. (Luka 22:19, MMM) Bu mudi Tshivulukilu tshia tshidimu etshi tshienda tshisemena, mmunyi mutualeja ne: tudi tutuma ntema ya bantu ku munya munene udi Yehowa mufile bua kukenkawu?​—Filip. 2:15.

2. Mmunyi muudi mua kukolesha dianyisha diudi nadi bua mulambu wa Yezu? Nebikufikishe ku tshinyi?

² Ikala ne dianyisha: Tshikondo tshia Tshivulukilu ke tshikondo tshia kuela meji bua dinanga dinene didi Yehowa ne Yezu batuleje pakafilabu mulambu bua kupandisha bantu. (Yone 3:16; 2 Kol. 5:14, 15) Diela meji dia mushindu’eu, nedivudije dianyisha dietu bua tshikondo etshi. Basadidi ba Nzambi bonso badi ne bua kuenza programe wa kubala ne kuela meji pa mvese idibu bafile bua tshikondo tshia Tshivulukilu mu kakanda ka Tukonkononayi Mifundu dituku dionso. Patudi tuela meji pa ngikadilu mimpe mitambe idi nayi Yehowa idi imuenekela bimpe mu mulambu wakafila Yezu, netufike ku diumvua disanka bua mudiye Nzambi wetu. Wewe wela meji pa tshidi mulambu eu ukuenzela neunange Nzambi ne Muanende bikole, ne neufike ku dienza disua dia Nzambi ne muoyo mujima.​—Gal. 2:20.

3. Mmushindu kayi utudi mua kuleja dianyisha dietu bua Tshivulukilu?

³ Tuetu bavudije dianyisha dietu bua tshidi Yehowa muenze bua kutusungila, bantu batutu tupinganyina kabidi, balongi betu ba Bible, balela betu, bena mutumba betu, balongi netu, bena mudimu netu pamue ne bakuabu bantu batuabikila mu tshibilu etshi nebapete pabu disanka dia buena ditudi nadi. (Luka 6:45) Nanku, enza muebe muonso bua kubikila bantu aba bonso, ubapeshe kabeji ka dibikila naku bantu bua kubuela mu Tshivulukilu bua kabapu muoyo to. Bua kubenga kupua bantu aba muoyo, bana betu ba bungi batu balama mêna a bantu batubu babikila mu Tshivulukilu ne basakidilaku makuabu tshidimu tshionso. Kuenza bualu ebu mu bulongame buonso ne kuditatshisha bua kubikila bantu bonso batudi mua kubikila, mmushindu muimpe wa kuleja dianyisha ditudi nadi kudi Yehowa Nzambi bua ‘kupa kuende kudi kakuyi kuamba.’​—2 Kol. 9:15.

4. Ntshinyi tshidi mua kutuambuluisha bua kuvudija mêba mu mudimu wetu wa buambi mu ngondo muisatu ne muinayi?

⁴ Vudija mêba mu mudimu wa buambi: Udiku mua kuyisha bikole mu ngondo muisatu ne muinayi anyi? Kakuyi mpata, Nzambi neabeneshe bionso biudi wenza bua kuambila bakuabu ‘lumu luimpe lua butumbi bua Kristo.’ Bu mudi Yehowa ke utu ufila butoke buonso bua mu nyuma, udi wamba ne: ‘Munya uteme mu mîdima.’ (2 Kol. 4:4-6) Padibi bikengedibua, mbimpe bakulu kusakidilabu bikuabu bisangilu bia mudimu wa buambi miaba mishilangane ne kufilabu tshilejilu mu tshikondo etshi. Nudi mua kuyisha mu misesu anyi miaba idi bantu bapanyishila bintu mu dinda ne kuyisha ku nshinga mu mapingaja anyi ku dilolo menemene. Mushindu mukuabu wa kuvudija mêba mu mudimu wa buambi, nkudifundila bungi kampanda bua mêba ne kuenza muetu muonso bua kuakumbaja. Ba bungi mbalue bampanda-njila buambuluishi bua kupesha Yehowa bintu biabu bia mushinga.​—Kolos. 3:23, 24.

5. Mmunyi mudi dikepesha dia bungi bua mêba a bampanda-njila bambuluishi diambuluishe bantu ba bungi?

⁵ Udiku mua kulua mpanda-njila muambuluishi anyi? Mbakepeshe bungi bua mêba a bampanda-njila kukadi mpindieu bidimu bipite pa 7. Dikepesha bungi bua mêba edi ndiambuluishe bantu ba bungi bua kumvua pabu buimpe bua mudimu eu. Ukadiku muutete pebe anyi? Bamue mbadifundile tshipatshila tshia kuenza mudimu eu tshidimu tshionso. Mu bisumbu bivule, bamanyishi ba bungi batu bumvuangana bua kuenza mudimu eu pamue ne patubu benza nunku, tshitu tshishala tshikondo tshilenga bua tshisumbu tshijima tshidimu atshi. Kuenaku mua kuenza programe wa kulua mpanda-njila muambuluishi bua ngondo umue mu tshikondo tshia Tshivulukilu anyi? Ngondo muinayi neikale muakanyine bua bamue bualu udi ne matuku a Disambombo atanu ne a Dia lumingu atanu.

6. Mbualu kayi buimpe budibu balongolole matuku aa mu lumingu lua pa bualu?

⁶ Mutangidi wa tshijengu nealue mu tshisumbu tshienu mu ngondo muisatu peshi muinayi anyi? Biobi nanku, ndiakalenga dikuabu diudi nadi. Anu bu mukavuabu batumanyishe, mu tshidimu tshia mudimu tshia 2006, aba bikala bampanda-njila bambuluishi mu ngondo udi mutangidi wa tshijengu ulua mu tshisumbu tshiabu nebabuele mu tshitupa tshia kumpala tshia tshisangilu tshienzaye ne bampanda-njila ba pa tshibidilu. Kakuyi mpata, mibelu mimpe yafilabu mu tshisangilu etshi neyisake bampanda-njila bambuluishi ba bungi bua kulua bampanda-njila ba pa tshibidilu. Mu ngondo muisatu, netuambuluishe kabidi bantu bua kupeta butoke bua mu nyuma ne mukanda wetu mupiamupia wa Bible utu ulongesha tshinyi menemene? Kuenaku mua kukeba ne muoyo mujima bua kutuadija kulonga Bible ne bantu mu mukanda mupiamupia eu anyi?

7, 8. (a) Ntshinyi tshiakuambuluisha bua kuenza programe bua kulua mpanda-njila muambuluishi? (b) Mmunyi mudi dikuatshishangana dia bena mu dîku bonso mua kuikala ne mushinga mukole? Bena dîku nebapete tshinyi?

⁷ Sungula programe udi mua kukufikisha ku dienza mêba 12 lumingu luonso bua kukenkesha butoke budi nabu bulelela ne kukumbaja mêba 50 adibu balomba bampanda-njila bambuluishi. Yukila ne bantu bakadi benze mudimu eu bimpe ne bakuabu bantu kabidi. Nunku badi mua kumvua disanka dia kuenza nebe mudimu eu. Bamanyishi bakadi batambule, nansha bikale bakulumpe anyi bana, mbafike ku dimona ne: mbitekete bua kuenza mudimu mulenga eu pavuabu badilongolole bimpe. Sambila bua bualu ebu. Nunku pikalaku mushindu, enza programe bua kulua mpanda-njila muambuluishi.​—Mal. 3:10.

⁸ Bena mu mêku mavule batu badienzeja bikole bua kuambuluisha nansha umue wa kudibu bua alue mpanda-njila muambuluishi. Tshilejilu, mu dîku dikuabu bakalongolola bua bantu bonso batanu bavua bamanyishi ba lumu luimpe bavuamu balue bampanda-njila bambuluishi. Bana bakuabu babidi bavua kabayi banji kutambula bakenza muabu muonso bua kuyisha pabu bikole. Dîku edi diakapeta tshinyi? Bakamba ne: “Uvua ngondo muimpe be! Tuakalua kunangangana bikole mu dîku dietu. Tudi tuela Yehowa tuasakidila bua muvuaye mutubeneshe!”

9. Mmunyi mutudi mua kukenkesha butoke buetu mu tshikondo tshia Tshivulukilu?

⁹ Tuditatshishayi bua mudimu mulenga eu utuenza mu ngondo muisatu ne muinayi utukoleshe ne utusemeje pabuipi ne Tatu wetu wa mu diulu. Bua tuetu kuwenza bimpe, tunange Nzambi ne Muanende bikole ne tuvudije mêba atudi tuenza mu mudimu wetu wa buambi. Tudisuikayi bonso anu bu mufundi wa Misambu, wakamba ne: ‘Nensakidile Yehowa bikole ne mêyi a mukana muanyi, nemmutumbishe munkatshi mua bantu ba bungi.’ (Mus. 109:30) Yehowa neabeneshe mudimu wa tshikondo tshia Tshivulukilu utuenza ne muoyo umue. Nunku, tukenkeshayi butoke bikole bua bantu ba bungi bapatuke mu mîdima ne ‘bikale ne munya wa muoyo.’​—Yone 8:12.