‘Tungunuka ne kundonda’
1 Bantu ba bungi badi benza muabu muonso anu bua kudisankisha, pabi kabena anu bapeta disanka to. Kadi Yezu yeye wakamba ne: kudifila bua bakuabu ne muoyo mujima ke kudi kutupetesha disanka dilelela. (Bien. 20:35) Wakamba ne: ‘Biasua muntu kundonda, adipidie, andonde,’ kalekedi to. (Mâko 8:34) Kudipidia eku kakuena kumvuija anu kudipangisha amue malu atu atusankisha ku mpukapuka to. Kadi kudi kumvuija kuenza dituku dionso edi malu adi asankisha Yehowa pamutu pa kuenza adi atusankisha tuetu.—Lomo 14:8; 15:3.
2 Tuangatayibi tshilejilu tshia mupostolo Paulo. Wakitaba bua kujimija bintu biende bionso bua ‘bulengele butambe bua kumanya kua Kristo Yezu’ ne kudifilaye bua kuyisha malu a Bukalenge bua Nzambi kumpala. (Filip. 3:7, 8) Wakamba ne: “Nengikale ne disanka dia bungi bua kunyanga bintu bianyi bionso” bua kuenzela bakuabu mudimu. (2 Kol. 12:15) Nunku mbimpe muntu yonso adiebeje ne: ‘Tshindi ngenza ntshinyi ne dîba dianyi, bukole buanyi, dimanya dianyi ne bintu bindi nabi? Ndiku ngenza malu anu bua kukumbaja majinga anyi meme anyi? Peshi ndi nkebaku bua kusankisha Yehowa?’
3 Diakalenga dia kufila: Tshidimu tshionso, bantu ba Nzambi badi benza mêba mapite pa muliyare mujima mu diyisha dia lumu luimpe lua Bukalenge bua Nzambi bua kupandisha bantu. Mu tshisumbu tshionso mudi bakulumpe ne bana badi benza midimu mishilangane bua kuambuluisha bakuabu. Kudi kabidi midimu idibu benza bua mpuilu ne mpungilu ne bua kuibaka anyi kulama bimpe nzubu idibu benzela mudimu bua kuyisha ntendelelu mulelela kumpala. Kudi kabidi mudimu udibu benza kudi bana betu badi mu komite wa diumvuangana ne mpitadi ne wa tusumbu tua diya kutangila babedi. Bionso bidi bana betu aba badi badifila ne muoyo mujima benza bidi bituambuluisha bikole.—Mus. 110:3.
4 Tudi mua kuambuluisha bakuabu nangananga dîba didiku bipupu anyi masama. Kadi misangu ya bungi, tutu tujingulula ne: muena Kristo netu udi ukengela tshintu anyi dimukolesha mu maboko. (Nsu. 17:17) Patudi tudifila pa lukasa bua kuambuluisha bakuabu ne kuyisha malu a Bukalenge bua Nzambi kumpala, tudi tuidikija tshilejilu tshia Yezu. (Filip. 2:5-8) Tuditatshishayi bua kutungunuka ne kuenza nunku.