Tutabalelayi bakuabu: Pa kuikala bena malu mimpe ne kuikala ne kanemu
1 Nansha mudi Yehowa muikale Mfumu Mutambe Bunene, udi muena malu malenga, ututua mushinga ne utunemeka kabidi. (Gen. 13:14; 19:18-21, 29) Netulengeje mushindu utudi tuyisha lumu luimpe tuetu tuidikija Nzambi wetu udi mumanye mua kunemekangana. (Kolos. 4:6) Kuikala ne kanemu kakuena kumvuija anu kuikala patupu ne bukalanga ne kuakula ne dîyi dimpe to.
2 Patudi tuyisha ku nzubu ne ku nzubu: Ntshinyi tshitudi mua kuenza patudi mu buambi, mpindieu tupeta muntu udi dîba adi kayi ne mushindu wa kutuakidila anyi kayi ne dîba dia kuyukila netu? Mbimpe tuetu kuditeka pa muaba wende ne kuipidija muyuki wetu anyi kumulaya bua kulua kuyukila nende musangu mukuabu. Padi muntu kayi musue kuangata mikanda yetu, katumuenzeji to. Tuetu tuangata bakuabu ne mushinga, netunemeke nzubu yabu, pa kuenza malu bu mudi: kubenga kudibuelelamu, kushiya bisabata pambelu, kututula ku makasa kumpala kua kubuela mu nzubu ne kulongesha kabidi bana betu bakese bua kuikalabu pabu ne tshilele etshi. Patudi tushila muntu utudi katuyi basangane kumbelu mukanda, tuuteke muaba udi bapitshi ba njila kabayi mua kuumona to. Kanemu nekatusake bua kuenzela bakuabu malu atudi basue ne: batuenzele.—Luka 6:31.
3 Patudi tuyisha mu njila: Bua kuleja mutudi ne kanemu patudi tuyisha mu njila, katuena ne bua kupangisha bantu bakuabu mua kupitabu ne katuena ne bua kunguila kumpala kua makazen a bende to. Tudi ne bua kuditeka pa muaba wa bakuabu ne kukeba bua kuyukila amu ne bantu badi mua kuyukila netu nansha bua minite mikese ne kulekela badi bamueneka kabayi ne dîba. Patudi tuyisha muaba udi mutoyi wa bungi, nebikengele bua tuetu kuakula ne dîyi dikole. Kadi tuamanya, katukebi bua kukoka ntema ya bantu bonso kutudi to.—Mat. 12:19.
4 Patudi tuyisha ku telefone: Kuangata bakuabu ne mushinga nekutusake bua kuyisha ku telefone anu miaba idi kayiyi mutoyi to. Bua kuleja bukalanga, mbimpe kudimanyisha ne lukasa ne kuambila muntu diakamue tshiudi mumubikidile. Wewe mukuate telefone webe bimpe mukana mutangija muaba udi ka mikro, ne mutungunuke ne kuakula ne dîyi dimpe, neufike ku diyukila bimpe ne bantu pa Dîyi dia Nzambi. (1 Kol. 14:8, 9) Tudi tuidikija Yehowa Nzambi wetu patudi tuleja bakuabu bulenga, tubatua mushinga ne tubanemeka mu mishindu mishilashilangane.