Ambuluisha bantu bakuabu bua kudia bulunda ne Nzambi
1 Lelu eu, badi balongesha bantu ba mu bisamba bionso njila ya Yehowa. (Yesh. 2:2, 3) Kadi bua bantu ba mushindu eu ‘kuvudijabu maminu bua dinanukila diabu,’ badi ne bua kuanji kunanga Yehowa. (Luka 8:15; Mâko 12:30) Bobu kabayi bamunange, kabena mua kupeta bukole bua kukandamena malu mabi a bena panu anyi kuikala ne dikima dia kuenza malu mimpe to. Umue wa ku mishindu itudi mua kuambuluisha bakuabu bua kudia bulunda ne Yehowa ngua kubafikisha ku dinanga ngikadilu yende. Balomba bua kuelanganabu meji bimpe a malu adi mu mukanda wa Approchez-vous de Jéhovah.
2 Tshilejilu tshiebe: Malu audi wewe wenza adi ne bukole bua bungi kudi baudi ulonga nabu Bible. Padibu bamona muudi munange malanda ebe ne Yehowa, bamona kabidi mudiwu mashintulule nsombelu webe, nebakebe pabu bua kulua balunda bende. (Luka 6:40) Nunku, tshilejilu tshietu tshidi ne bukole bua bungi kudi bantu kupita bitudi tuamba mukana muetu.
3 Mushindu udi baledi mua kutamba kulongesha bana babu bua kunanga Yehowa ngwa kuikala tshilejilu tshimpe. (Dut. 6:4-9) Muanetu mukuabu wa balume ne mukajende bavua basue bua bana babu kuluabu bena Kristo pavuabu bakola bakalomba lungenyi kudi baledi bakuabu bakavua bakoleshe pabu bana mushindu eu. Muanetu wa balume au udi wamba ne: “Bantu bonso bamvua muyukile nabu bakangambila anu bualu bua muomumue ne: tshilejilu tshia baledi ke tshintu tshia kumpala. Nunku, mu malu onso adi baledi benza, mbimpe baleja bana tshidi kuikala “mulunda wa Nzambi” kumvuija.—Yak. 2:23.
4 Ikala usambila ne muoyo mujima: Udi mua kuambuluisha bakuabu bua kudiabu bulunda ne Yehowa paudi ubalongesha mua kusambila ne muoyo mujima. Udi mua kubaleja disambila dia tshilejilu dia Yezu ne makuabu adi mu Bible. (Mat. 6:9, 10) Masambila ebe adi mua kulongesha bana bebe ne bantu baudi ulonga nabu Bible mushindu udibu pabu mua kusambila. Padibu bumvua mêyi adi apatuka munda muebe paudi usambila, badi bamona muudi udiumvua kumpala kua Yehowa. Balongesha bua kuikalabu ‘bananukila’ mu masambila padibu mu ntatu. (Lomo 12:12) Padibu bamona mudi Yehowa ubambuluisha dîba dia dikenga, nebabange kumueyemena, kumunanga anu bu mulunda wabu wa pa muoyo.—Mus. 34:8; Filip. 4:6, 7.