Mmalu kayi autu uditekela kumpala?

¹ Mmunyi muudi mua kuandamuna lukonko elu? Ntshia bushuwa bua se: tuetu bonso tutu basue kuteka malu a Bukalenge bua Nzambi pa muaba wa kumpala. (Mat. 6:33) Kadi diebeja ne: ‘Malu antu ngenza adiku aleja ne: ntu nteka Bukalenge bua Nzambi pa muaba wa kumpala mu nsombelu wanyi anyi?’ Bible udi utuambila ne: “Nudijadike” anyi nuleje tshinudi nuenu bine. (2 Kol. 13:5) Mmunyi mutudi mua kuleja ne: tutu tuteka malu a Bukalenge bua Nzambi pa muaba wa kumpala mu nsombelu wetu?

² Dîba dietu: Tudi mua kuanji kukonkonona malu atutu tuenza ne dîba ditudi nadi. (Ef. 5:15, 16) Lumingu luonso elu, mmêba bungi kayi autu upitshisha ne bakuabu, utangila televizion, utangila malu ku Internet anyi ujikija lutetuku? Wewe muafunde ne mulue kuafuanyikija ne autu wenza midimu yetu ya buena Kristo, nebikukemeshe! Utuku wenza mêba mapite pa audi ne bua kuenza ku mudimu webe wa bianza anu bua kupetaku bintu kampanda bia mushinga mukole kuyi nansha uvuluka bualu bua mudimu wetu wa tshijila anyi? Mmisangu bungi munyi itutu tupumbisha bisangilu anyi tubenga kuyisha anu bua kumona mua kujikijaku lutetuku ku ndekelu kua lumingu?

³ Teka malu malondangane bilondeshile mushinga wawu: Ba bungi ba kutudi kabatu bapeta dîba dikumbane dia kuenza malu onso adibu basue to. Nunku bua kuteka malu a Bukalenge bua Nzambi pa muaba wa kumpala, tudi ne bua kuanji kumanya malu atudi ne bua kuteka kumpala kua makuabu ne kuteka adi ‘mapite bulenga’ kumpala kua wonso. (Filip. 1:10, MMM) Amue a ku malu aa ke: kulonga Dîyi dia Nzambi, kuyisha, kutabalela bena mu dîku dietu ne kubuela mu bisangilu. (Mus. 1:1, 2; Lomo 10:13, 14; 1 Tim. 5:8; Eb. 10:24, 25) Makuabu malu, bu mudi kuibidija kua mubidi kua kukumbanyinaku ne kujikija lutetuku, adi pawu atuambuluisha. (Mâko 6:31; 1 Tim. 4:8) Kadi tudi ne bua kuteka malu adi kaayi ne mushinga wa bungi aa pa wawu muaba.

⁴ Muanetu wa balume mukuabu utshivua nsonga uvua ukeba kuteka malu a Bukalenge bua Nzambi pa muaba wa kumpala wakabanga kuenza mudimu wa ku dîba ne ku dîba pamutu pa kulonga tulasa tua bungi bua kumona mua kupeta mudimu wa makuta a bungi. Wakalonga muakulu mukuabu ne kuya muaba uvuabu dijinga ne bamanyishi ba bungi. Wakamba ne: “Ke meme kutshionkomoka munemu eku. Buambi mbulenga bua lufu! Ndi nkeba bua nsonga yonso enze pende mundi muenze emu bua kumvuaye mundi ngumvua emu. Kakuena bualu bukuabu buimpe budi mua kupita kuenzela Yehowa mudimu ne bionso bitudi nabi to.” Eyowa, kuteka malu a Bukalenge bua Nzambi pa muaba wa kumpala mu nsombelu wetu kudi kutupetesha malu malenga a bungi, kadi tshidi nangananga ne mushinga ntshia mudiku kusankisha Tatu wetu wa mu diulu Yehowa.​—Eb. 6:10.