Dikankamijangana
1. Dikumbula dia batangidi bena ngendu ditu ditupetesha mishindu ya kuenza tshinyi?
1 Mupostolo Paulo wakafundila tshisumbu tshia mu Lomo ne: ‘Bualu bua ndi njinga bua kunumona bua kunupesha kupa kukuabu kua nyuma, bua nuenu nujadikibue. Bualu budi nunku, bua meme ne nuenu kusambibua munkatshi muenu, muntu ne muntu ku ditabuja dia mukuabu, ne dienu ne dianyi.’ (Lomo 1:11, 12) Tutu tupeta petu mishindu ya kukankamijangana nunku patu batangidi bena ngendu ba matuku etu aa balua kukumbula tshisumbu tshietu.
2. Bua tshinyi batu bamanyisha dikumbula dia mutangidi wa tshijengu kumpala kua dîba?
2 Tshisumbu: Mutangidi wa tshijengu utu pa tshibidilu umanyisha dilua diende mu tshisumbu ngondo isatu kumpala. Bualu ebu budi butupesha mushindu wa tuetu kuakaja programe wetu bua kumona mua kuikalapu mu lumingu alu lujima. (Ef. 5:15, 16) Biwikala muena mudimu, pamuapa udi mua kulomba dikisha bua kumona mua kuyisha mu lumingu alu. Bamue batu badilongolola bua kuikala bampanda-njila bambuluishi mu ngondo udi mutangidi wa tshijengu ulua mu tshisumbu tshiabu. Biwikala ukavua mulongolole luendu, kuenaku mua kuakaja programe webe bua wikalaku lumingu alu anyi?
3. Ntshinyi tshidi muntu yonso mua kuenza bua dikumbula dia mutangidi wa tshijengu kumukankamijadi?
3 Bualu bunene butu mutangidi uluila mu tshisumbu mbua kunkankamija bana betu ne kubalongesha mua kuyisha. Kuenaku mua kulomba bua kuyisha nende anyi kuyisha ne mukajende bikalaye ukadi musele anyi? Mutangidi wa tshijengu utu musue kuyisha ne bamanyishi bashilangane, nansha badi kabayi ne dimanya dia bungi anyi badi kabayi bamanye mishindu mimpe ya kuyisha. Bantu bonso badi mua kulongela ku mishindu yende ya diyisha ne kuitaba mibelu mimpe yonso idiye ubapesha. (1 Kol. 4:16, 17) Wewe mumubikile kuebe bua nuenu kudia nende, nenupete mushindu wa nuenu kukankamijangana. (Eb. 13:2) Bu mudi miyuki yende mimanyine pa majinga a tshisumbu, uyiteleje bimpe.
4. Mmunyi mutudi mua kukankamija mutangidi wa tshijengu tshietu?
4 Mutangidi wa tshijengu: Mupostolo Paulo kavua mushilangane ne bana babu bavuaye wenzela mudimu to, bualu uvua pende upeta ntatu ne tunyinganyinga ne uvua musue bua bamukankamije pende. (2 Kol. 11:26-28) Pakumvua bena mu tshisumbu tshia mu Lomo ne: Paulo uvua mpindieu muena buloko ne uvua ne bua kulua mu tshimenga tshiabu, bamue bakamata mu njila kuenda kilometre 74 bua kulua kumuakidila ku Tshisalu tshia Apio. ‘Pakabamona Paulo, wakasakidila Nzambi, mutshima wende wakakankamana.’ (Bien. 28:15) Mushindu eu ke uudi pebe mua kukankamija mutangidi wa tshijengu. Udi ne bua ‘kunemeka tshiakabidi’ mutangidi wa tshijengu, mbuena kuamba ne: kumuleja kanemu pa kuikalaku mu lumingu lua pa bualu. (1 Tim. 5:17) Leja muudi ne dianyisha dia bungi bua bionso bidiye wenza bua kunuambuluisha. Yeye ne mukajende nebikale ne disanka padibu bamona ditabuja, dinanga ne dinanukila dienu.—2 Tes. 1:3, 4.
5. Bua tshinyi tuetu bonso tudi dijinga ne dikankamija lelu eu?
5 Mu “matuku a malu makole” aa, nnganyi udi kayi dijinga ne dikankamija? (2 Tim. 3:1) Disuike kutuadijila ku mpindieu bua kuikalaku mu lumingu lua pa bualu ne kuyisha ne mutangidi wa tshijengu. Tuetu bonso, mmumue ne: batangidi bena ngendu ne bamanyishi bonso, tudi mua kukankamijangana ne disanka dionso. Dîba adi, netutungunuke ne ‘kusambangana, kudiundishangana muntu ne muntu.’—1 Tes. 5:11.