Udi pebe mua kupeta bubanji
1. Mbimpe kujinga bua kulua mpanda-njila wa pa tshibidilu bua tshinyi?
1 Utuku musue kuikala ne disanka dia bungi? Utuku umvua bimpe pautu wambuluisha bantu anyi? Utuku musue kuvudija mudimu uudi wenzela Yehowa anyi? Biobi nanku, mbimpe ulue mpanda-njila wa pa tshibidilu. Kadi, bidi bikengela kuanji kutangila majitu atudi nawu mu dîku ne adi Dîyi dia Nzambi dituambika ne bukole buetu bua mubidi.
2. Udiku mua kutela amue malu mimpe anyi mabanji atu bampanda-njila ba pa tshibidilu bapeta anyi?
2 Nyuma wa Nzambi wakasaka Solomo bua kulamakaja mabenesha a Yehowa ne bubanji pamue. (Nsu. 10:22) Lelu eu, tutu tupetela bangabanga mabenesha a Yehowa ku bubanji mu malu a Nzambi. Bampanda-njila ba pa tshibidilu batu ne bubanji ebu bupite bungi. Tshilejilu, batu bumvua disanka dia bungi patubu ‘badisumbila tshikondo’ mu midimu yabu mikuabu bua kuambuluisha bantu. (Kolos. 4:5; Bien. 20:35) Yehowa utu usanka bikole patuye ubamona benza midimu mikole idi ileja dinanga. Bu mudi bubanji ebu butekela mu diulu, kabutu bukepela to. (Mat. 6:20; Eb. 6:10) Bu mudi bampanda-njila bikale kabidi ne ‘dîsu didi dimona bimpe,’ ne beyemena Yehowa bua kukumbaja majinga abu, bulunda buabu ne Nzambi butu buenda bukola.—Mat. 6:22, 25, 32; Eb. 13:5, 6.
3. Leja dishilangana didi pankatshi pa bubanji bua tshianana ne bubanji bua mu malu a Nzambi.
3 Kuditua mu dikeba dia bubanji bua pa buloba kudi kufikisha muntu misangu mivule mu ‘nkuka ya bungi idi mipote ne idi inyanga muntu.’ (1 Tim. 6:9, 10; Yak. 5:1-3) Kadi bubanji budi Yehowa ufila kabutu bulua ne malu mabi a nunku to. Bu mudi bampanda-njila bapitshisha dîba diabu dia bungi mu buambi, batu ne malanda mimpe ne Nzambi, batu kabidi batangila anu ku malu adi ne mushinga menemene. (Filip. 1:10) Tshilejilu, muanetu mukuabu wakalekela mudimu wende wa bu enjenyere bualu uvua umuangata dîba dia bungi, yeye kuluaye mpanda-njila. Muanetu eu wakamba ne: “Mudimu wanyi wa bianza uvua untonda. Kadi wa bumpanda-njila kawena untonda to! Mpindieu ndi ngambuluisha bantu, mbalongesha bulelela. Mvua ndiumvua bimpe be pamvua ngambuluisha bantu bua kumanya bulelela!”
4. Mmunyi mudi bampanda-njila bapeta disanka padibu bambuluisha bantu bakuabu bua kudipeta pabu?
4 Masanka adi bakuabu bapeta: Muntu yonso lelu eu utu ne ‘malu makole’ atu amukuata. (2 Tim. 3:1) Bantu ba miaba yonso batu bakeba wa kutekelabu muoyo, kadi kabena bamupeta to. Bambi ba lumu luimpe batu basanka bikole patubu bamona bantu bavua ne dibungama batuadija kusanka padibu bitaba lumu luimpe. Bampanda-njila ba pa tshibidilu badi ne disanka edi dipite bungi bualu batu benza mêba mapite pa 800 mu dienza mudimu wa kupandisha bantu tshidimu tshionso!—1 Tim. 4:16.
5, 6. Udi mua kuenza tshinyi bua kulua mpanda-njila wa pa tshibidilu?
5 Utuku wele meji bikole bua kulua pebe mpanda-njila wa pa tshibidilu anyi? Bidi mua kukulomba bua ‘kudisumbila tshikondo’ ku malu adi ne mushinga mukese. (Ef. 5:15, 16) Ke tshitu bantu bavule benze. Batu bapepeje nsombelu wabu, bakepeshe dîba dia mudimu wabu wa bianza bua kushala ne dîba dia bungi dia kuyisha. Kuenaku pebe mua kulongolola malu bua kulua pebe mpanda-njila anyi?
6 Lomba Yehowa akupe meji bua kuenza programe muimpe. (Yak. 1:5) Neupete bipeta kayi bimpe? Bubanji bua bungi mu ntendelelu webe! Yehowa neakupeshe kabidi bintu bia ku mubidi biudi nabi dijinga. (Mat. 6:33) Bantu batu bateta Yehowa mu diyisha lumu luimpe bikole nunku batu bapeta ‘masanka, kabatu bakengela bintu bikuabu kabidi.’—Mal. 3:10.