Udi pebe mua kulua mulongeshi!
1. Muambi wa lumu luimpe yonso udi ne diakalenga kayi dia pa buadi?
1 Bumue bua ku malu atu atusankisha mu mudimu wa buambi, mpatutu tulongesha muntu Bible. Patudi tumona muntu witaba malu adi Bible wamba, patudi tumuambuluisha bua kudia bulunda ne Mfumu wa bintu bionso, bitu bituenza disanka be! (Yak. 4:8) Kulongesha muntu udi ne nzala ya kumanya bulelela, kumumona ubanga kushintulula ngikadilu ne malu ende makuabu bikole, ke bualu budi mumanyishi yonso wa Bukalenge bua Nzambi ne bua kudifundila.—Mat. 28:19, 20.
2. Bamue bantu batu batshina bua kulombola dilonga dia Bible bua tshinyi? Tshidi mua kubambuluisha ntshinyi bua kujikija buôwa?
2 Eyemena Yehowa: Mu bikondo bia kale, batendeledi balelela ba Yehowa kabavua badimona bakumbane bua kuenza mudimu uvua Yehowa ubapesha to. Kadi pabi pavua Mose ne Yelemiya ne Amosa ne bakuabu bantu bavua pabu bantu tshianana beyemene Yehowa, buôwa buabu buakakepela, bakenzela Yehowa mudimu wa bungi. (Ekes. 4:10-12; Yel. 1:6, 7; Amo. 7:14, 15) Mupostolo Paul ‘wakakolesha mutshima.’ Mushindu kayi? Yeye nkayende wakandamuna ne: “Mu Nzambi wetu.” (1 Tes. 2:2) Nunku, tuetu bonso tudi mua kueyemena Yehowa bua atukuatshishe, atupeshe meji ne bukole bua kulombola malonga a Bible adi enda bimpe.—Yesh. 41:10; 1 Kol. 1:26, 27; 1 Pet. 4:11.
3, 4. Ntshinyi tshidibu balongolole bua kutuambuluisha bua kulongesha Dîyi dia Nzambi?
3 Itaba bua kulonga: Yehowa Nzambi udi Mulongeshi wetu munene. Utu utulongesha lumingu luonso bua tulue balongeshi bimpe. (Yesh. 54:13; 2 Tim. 3:16, 17) Bua kuleja ne: udi witaba bua Yehowa akulongeshe, ikala udienzeja muebe muonso bua kukeba mua kumvua Bible bimpe ne bua kulengeja ndongeshilu webe. Nansha mudi Kalasa ka Mudimu wa Nzambi ne Tshisangilu tshia Mudimu bikale bilongolola nangananga bua bualu ebu, bisangilu bietu bikuabu bitu bituambuluisha pabi bua kulongesha Bible.
4 Udienzeje bikole bua kumanya mishindu mipepele ya kulongesha malu makole adi mu Bible. Mukanda wa Kalasa ka mudimu udi wamba mu dibeji dia 227 ne: “Paudi umvua bimpe menemene tshintu tshiudi wamba, nebikale bipepele bua kumvuija bakuabu bua tshinyi bidi nanku.” Tuetu ne tshibidilu tshia kuandamuna mu bisangilu, nebituambuluishe bua kukuata malu a mushinga mukole alua kutuambuluisha pashishe. Nunku, wewe udilongolola bimpe, neudiumvue mukumbane bua kulongesha.
5. Mmushindu kayi mukuabu udi tshisumbu tshitulongesha bua kulua balongeshi bimpe?
5 Ku mbangilu, bena Kristo bavua balongela kudi bena Kristo nabu pavuabu baya mu buambi. (Luka 10:1) Ikala uyisha ne bena Kristo badi ne dimanya dia bungi, uyisha kabidi ne bampanda-jila, ne bakulu, ne batangidi ba bijengu anyi ba distrike, uya nabu mu dilongesha bantu Bible. Ikala utangila mushindu udibu bumvuija Bible ne bilejilu bipepele ne foto ne bintu bikuabu bidi mu mikanda itutu tulongesha nayi bantu. Ikala ubebeja malu audi ne bua kuenza bua wewe kulua mulongeshi muimpe. (Nsu. 1:5; 27:17) Ikala ne dianyisha bua malu onso audi umanyina kudi bana betu, bualu adi afumina kudi Nzambi.—2 Kol. 3:5.
6. Ntshintu kayi tshinene tshiudi ne bua kuenza bua kulua mulongeshi wa Dîyi dia Nzambi?
6 Eyemena Yehowa, itaba dilongesha diende. Ikala usambila. (Mus. 25:4, 5) Newikale pebe ne disanka pawambuluisha muntu mukuabu bua kuluaye pende mulongeshi wa Dîyi dia Nzambi.