Mudimu wa pa buawu wa dibikila bantu mu Tshivulukilu
1. Kubangila dia 21 ngondo muisatu 2009 bamanyishi ba Bukalenge nebenze tshinyi pa buloba bujima? Mbua tshinyi?
1 Mu Dinayi dia 9 ngondo muinayi 2009 batendeledi ba Yehowa Nzambi bonso ba buloba bujima nebadisangishe bua kuvuluka bualu bunene bua dinanga budiye muenzele bantu. (Lomo 5:6-8) Tudi batekemene ne: bantu miliyo mivule badi basue bulelela nebadisangishe netu bua kuvuluka lufu lua Yezu. Kutuadijila dia 21 ngondo muisatu, netubange kuabanya mabeji a dibikila nawu bantu mu Tshivulukilu pa buloba bujima.
2. Mmalu kayi audi ne bua kuvuluka paudi upesha bantu mabeji a dibikila?
2 Malu a kuvuluka: Umvuija bantu mvese ne nkonko ne bimfuanyi bidi mu dibeji dia dibikila edi bimpe. Tshilejilu, udi mua kuleja tshimfuanyi tshidi pamutu padi, wewe kuamba ne: “Ndi mulue kukubikila bua ulue kuvuluka netu lufu lua Yezu mu Dinayi dia 9 ngondo muinayi 2009.” Pashishe udi mua kuleja muntu tshiena-bualu tshidi pa dibeji edi ne nkonko idi mielapu. Wambile muntu au ne: yeye udi mua kubikila pende bena mu dîku diabu anyi bakuabu bonso badiye musue kulua nabu.
3. Munyi muudi mua kulondolola bauvua mushile mabeji a dibikila ku mbangilu kua mudimu eu?
3 Tshisumbu tshienu tshiotshi ne teritware munene, bakulu badi mua kunuambila bua kushila badi kabayi ku nzubu yabu mabeji a dibikila. Mu matuku a Disambombo, nenufile mabeji a dibikilangana nawu pamue ne bibejibeji. Difundila tshipatshila tshia kubikila bantu bawapinganyina, balongi ba Bible, balela bebe, balongi benu, bena mudimu nebe, bena mutumba benu ne bakuabu bamanyangana nabu. Tshidimu tshishale etshi, muanetu mukuabu wa bakaji uvua mubikile balela bende 30, ke kushalaye anu ubavuluija mushinga wa kubuela mu Tshivulukilu. Wakumvua disanka divule pakamonaye balela bende 25 balue mu Tshivulukilu atshi, ne banayi ba kudibu kuluabu kuitaba bua kulonga Bible.
4. Tudi ne bua kuenza tshinyi kubangila ku mpindieu? Mbua tshinyi?
4 Dilongolola ku mpindieu: Bamanyishi ba bungi badi mua kuvudija mudimu wabu wa buambi mu ngondo muisatu ne muinayi. Wewe muikale ne bana anyi balongi ba Bible badi balubuluka bimpe, etshi si ntshikondo tshimpe menemene tshia bobu kulua bambi ba lumu luimpe badi kabayi banji kutambula. Mpindieu ke tshikondo tshia tuetu kudilongolola bua kuenza petu mudimu eu wa dimanyisha bantu ne muoyo mujima mutuavuluka mishindu mitambe bunene ibidi ya dinanga.—Yone 3:16; 15:13.