Mandamuna a nkonko yenu

▪ Mbiakanyine bua muntu kampanda anyi bisumbu kuenza mudimu ne kamanyinu kadi kaleja bulongolodi bua ku adi mamanyike kua mbulamatadi atu Bantemu benza nawu mudimu anyi?

Kamanyinu katudi tuamba aka kadi mua kuikala dîna anyi kantu kampanda kazola kadi kaleja bulongolodi kampanda anyi kumpanyi kansanga, kambuluisha bua kubimanya lukasa. Katshibumba katu kazola pamutu pa Tshibumba tshia Nsentedi nkamanyinu ka bulongolodi bua Watch Tower Bible and Tract Society of Pennsylvania ne malongolodi makuabu a Bantemu adi mamanyike kua mbulamatadi. Kamanyinu katu bulongolodi bua Christian Congregation of Jehovah’s Witnesses buzola kulu kua mikanda itubu bufundilangana nka Bible mubulula. Malongolodi makuabu atu Bantemu ba Yehowa benza nawu mudimu atu ne tuawu tumanyinu tushilashilangane.

Katuena tuanyishila tshisumbu nansha tshimue anyi muntu pa nkayende bua kuzola kamanyinu anyi kufunda dîna dia bumue bua ku malongolodi mamanyike kua mbulamatadi aa ku Nzubu wa Bukalenge, mu mikanda idibu bafundilangana, pa bintu biabu anyi ku bintu bikuabu kabidi nansha. Kubifunda mushindu eu kudi mua kukebesha tshibuejakaji kudi bena mbulamatadi, bambi ba lumu luimpe ne bantu bakuabu pa bidi bitangila malanda adi pankatshi pa tshisumbu ne malongolodi adi mamanyike kua mbulamatadi a Bantemu ba Yehowa. Bia muomumue, padi muntu wela kamanyinu aka mu mikanda idiye ufundilangana bidi mua kufila ngumvuilu wa ne: mukanda au mmufume ku biro bidi bilombola mudimu wa Bantemu pa buloba bujima anyi kudi Betele, nansha ne: biro abi mbiwanyishe.

Nanku, nansha mudi Nzubu ya Bukalenge mikale bintu bia bulongolodi bua Watch Tower, kanuakuzola kabidi miaba idi nzubu eyi katshibumba katu pamutu pa Tshibumba tshia Nsentedi anyi kakuabu kadi kakafuane to. Katuena tuamba ne: bisumbu bidi ne kamanyinu aka ku Nzubu wa Bukalenge bikumushe lelu lelu to, bualu mudimu eu udi mua kulomba bua kushintulula malu a bungi ne dîba dia bungi ne makanda, kabidi neutudishe makuta. Kadi bikala tumanyinu tuvuabu bazole katuyi tulomba mudimu wa bungi bua kutumbusha, bidi bikengela kutangila tshilumbu tshiatu. Biobi kabiyi nanku, nudi mua kuindila too ne dîba dinudi balongolole bua kuakajilula Nzubu wenu wa Bukalenge anyi kamanyinu aka.