Ikala witabujija bantu
1. Kuyisha bimpe ne Bible kudi kulomba tshinyi?
1 Anu bu mupostolo Paulo, bamanyishi ba lumu luimpe bimpe mbamanye ne: ‘kuludikila bantu njila mululame mu dîyi dia Nzambi dia bushuwa’ kakuena anu kulomba kubapesha mvese wa mu mukanda wa Nzambi to. (2 Tim. 2:15) Patudi tulongesha bantu Bible, mmushindu kayi utudi mua ‘kubitabujija’ malu adiye wamba?—Bien. 28:23.
2. Mmunyi muudi mua kuambuluisha bantu bua kunemekabu Dîyi dia Nzambi?
2 Ikala ubadila bantu Dîyi dia Nzambi: Tshia kumpala, koka ntema ya muntu ku Bible mu mushindu udi mua kumufikisha ku dimunemeka ne kumona ne: mudi meji a Nzambi. Mushindu utudi tuangata Bible udi mua kuambuluisha muntu bua kuteleja mvese itudi tubala ne ntema. (Eb. 4:12) Tshilejilu tudi mua kumuambila ne: “Kumanya tshidi Nzambi wamba bua bualu ebu nkungambuluishe bikole. Tangila tshidi Dîyi diende diamba.” Padiku mushindu, ikala ubadila bantu Dîyi dia Nzambi.
3. Nuenu bamane kubala mvese, ntshinyi tshiudi mua kuenza bua kuambuluisha muntu bua kumumvua bimpe?
3 Tshibidi, umvuija mvese unudi babale. Bantu ba bungi kabatu bumvua mvese padibu bamubala bua musangu wa kumpala to. Tudi ne bua kubumvuija mudi mvese au upetangana ne bualu butudi tuyikila. (Luka 24:26, 27) Leja miaku idi yumvuija tshiudi wamba patoke. Udi mua kuela muntu lukonko bua kumanya ni mmumvue bimpe tshidi mvese au wamba.—Nsu. 20:5; Bien. 8:30.
4. Bualu kayi bua ndekelu butudi mua kuenza bua kuitabujija bantu patudi tubayisha?
4 Elesha muntu meji bilondeshile mvese: Tshisatu, dienzeja bua kulenga mutshima wa muntu. Muambuluisha bua kumona mudi mvese au umutangila. Kueleshisha muntu meji bilondeshile mvese unudi babale kudi mua kumufikisha ku dishintulula meji ende. (Bien. 17:2-4; 19:8) Tshilejilu, nuenu babale Musambu wa 83:18 udi mua kumueleshisha meji bua kumona mudi kumanya dîna dia muntu kuikale ne mushinga bua kudia nende malanda. Pashishe, udi mua kumuebeja ne: “Udi wela meji ne: muudi mumanye dîna dia Nzambi, nebikuambuluishe bua kusambila bimpe anyi?” Mvese unudi babale udi mua kuambuluisha muntu paudi umuleja mudiye umvuangana ne nsombelu wende. Wewe witabujija bantu ne Dîyi dia Nzambi mu mushindu eu, newambuluishe badi banange bulelela bua kulua kutendelela Yehowa Nzambi mulelela udi ne muoyo.—Yel. 10:10.