Mua kufikisha bakuabu ku ditaba malu atudi tuamba
1 Mupostolo Paulo uvua mumanyike bu muyishi uvua mumanye mua kufikisha bakuabu ku ditaba malu avuaye ubambila. (Bien. 19:26) Nansha Mukalenge Agipa wakamuambila ne: ‘Wewe udi wamba kungitabujija bua meme kulua muena Kristo tshitupa tshîpi.’ (Bien. 26:28, MML) Ntshinyi tshivua tshifikishe bantu ku ditaba diyisha dia Paulo bikole nunku? Uvua welangana meji ne bantu pa Dîyi dia Nzambi, umvuija malu bilondeshile lumvu lua bavuaye uyikila nabu.—Bien. 28:23.
2 Bua kuidikija Paulo, tuetu petu tudi ne bua kumanya mua kufikisha bantu ku ditaba malu atudi tubayisha. Tuenza tshinyi? Tukeba mua kuikala nebujinguludi patudi tuyikila ne tuteleja bakuabu. (Nsu. 16:23) Malu manene asatu neatuambuluishe mu muanda eu.
3 Teleja ne ntema: Padi muntu mukuabu wakula, umuteleje bimpe bua umone pa wewe kubuelela. Padiye ubenga kuitaba bualu kampanda, uditatshishe bua kujingulula tshidi tshimusaka bua kubenga. Nebikuambuluishe bua kumanya malu atuye witabuja, bua tshinyi utu uitabuja, ne ntshinyi tshidi tshimufikishe ku ditaba malu aa. (Nsu. 18:13) Utete ne bukalanga bua kumumbusha lungenyi elu mu mutu.
4 Muela nkonko: Tshilejilu, padi muntu witaba dilongesha dia Busatu Bunsantu, udi mua kumuebeja ne: “Katshia kuonso eku utu anu witaba dilongesha dia Busatu Bunsantu anyi?” Umuele lukuabu lukonko ne: “Uvuaku mutete kulonga bia bungi bua kumanya tshidi Bible wamba bua dilongesha edi anyi?” Udi kabidi mua kumukonka ne: “Bikala Nzambi uvua umue wa ku bantu badi benza Busatu Bunsantu, katuvuaku mua kupeta bualu ebu bufunda patoke mu Bible anyi?” Mushindu wakuandamunaye neukuambuluishe bua kuelangana nende meji ne kumuleja tshidi Bible wamba.
5 Welangana nende meji bimpe: Ntemu mukuabu wakela munga mamu uvua witaba se: Yezu udi Nzambi lukonko elu: ‘Wewe musue kuleja ne: bantu babidi ba mu dîku dimue badi bukole bumue, mmiaku kayi iudi mua kuangata bua kuleja malanda adi pankatshi pabu?’ Mamu au kuandamunaye ne: “Bana ba muntu babidi ba balume.” Muanetu au kuambaye kabidi ne: “Pamu’apa newambe nansha ne: mmapasa a menemene. Kadi pavua Yezu utulongesha bua kuangata Nzambi bu Tatu ne yeye bu Muana, ntshinyi tshivuaye usua kutulongesha?” Mamu au e kufikaye ku dijingulula bimpe ne: umue wa kudibu mmukulumpe ne kabidi bumfumu buende mbupite bua mukuabu. (Mat. 20:23; Yone 14:28; 20:17) Ngelelu wa meji eu wakalenga mutshima ne lungenyi lua mamu au.
6 Bushuwa, kabiena bisua kumvuija ne: nansha tuetu bamanye mua kuelangana meji ne bantu anyi kubaleja malu majalame, bonso nebitabe bulelela. Kadi anu bu Paulo, tudituayi ne tshisumi mu dikeba mu teritware wetu bantu batu banange mua kututeleja, ne tubafikishe ku ditaba mukenji wa Bukalenge.—Bien. 19:8.