Mudimu utudi tuangata ne mushinga wa bungi
1. Mmunyi muvua Yezu muleje ne: uvua wangata mudimu wa buambi ne mushinga wa bungi?
1 Yezu uvua wangata mudimu wa buambi ne mushinga wa bungi. Wakenza ngendu ya ntanta mile lua makasa mu Palestine mujima bua kuyisha bantu ba bungi. Wakabenga bua kudikebela bintu bia bungi bua kumonaye mua kudifila bikole mu mudimu wa kuyisha. (Mat. 8:20) Pavua bena mu musoko kampanda bakeba bua ashale muabu bua kuondopaye babedi babu, wakamba ne: ‘Bundi nabu mbua kuambila misoko mikuabu lumu luimpe lua bukalenge bua Nzambi; buakantuminabu mbualu ebu.’—Luka 4:43.
2. Bua tshinyi mudimu wa buambi uvua ne mushinga wa bungi kudi Yezu?
2 Bua tshinyi mudimu wa buambi uvua ne mushinga wa bungi kudi Yezu? Uvua utamba kuditatshisha bua dîna dia Yehowa ditumbishibue. (Mat. 6:9) Bu muvuaye munange Tatuende wa mu diulu, uvua musue kuenza disua diende ne kutumikila mikenji yende yonso. (Yone 14:31) Uvua kabidi utabalela bantu bikole ne uvua musue kubambuluisha.—Mat. 9:36, 37.
3. Mmunyi mutudi mua kuleja ne: tudi tuteka mudimu wa buambi pa muaba wa kumpala?
3 Idikija Yezu: Bidi mua kutukolela bua kuteka mudimu wa buambi pa muaba wa kumpala bu Yezu bualu malu a pa buloba ebu adi mua kutuangata dîba dietu dionso ne kutupesha ditanaji. (Mat. 24:37-39; Luka 21:34) Nunku, tudi ne bua kusungula malu adi ne mushinga wa bungi, kuakaja programe wetu bua kuikala kudilongolola bua mudimu wa buambi ne kuyisha pa tshibidilu. (Filip. 1:10) Tudienzeje bua kuikala ne nsombelu udi utuambuluisha bua kuyisha bimpe ne kubenga kudina mu malu a pa buloba ebu ne kasuki.—1 Kol. 7:31.
4. Bua tshinyi mbimpe bua tuetu kuenza malu adi ne mushinga kutuadijila ku mpindieu?
4 Padi muntu udi ne meji umona ne: dîba didiye nadi ndikese, udi wenza malu adi ne mushinga wa bungi kumpala. Tshilejilu, yeye mumvue ne: tshipepele tshikole tshikadi pa kuenzeka, kena ujimija dîba to, kadi udi udifila ne muende muonso bua kupandisha bena mu dîku diende ne kudimuija bena mutumba. Dîba adi udi wanji ulekela malu adi kaayi ne mushinga wa bungi. Bia muomumue, dîba didi dishale bua kabutu ka Armagedone kulua ndikese. (Sef. 1:14-16; 1 Kol. 7:29) Bua tuetu kudisungila ne kusungila badi batuteleja, tudi ne bua kudilama tuetu bine ne diyisha dietu mu tshisumbu anyi miaba mikuabu. (1 Tim. 4:16) Bushuwa, bua tuetu kupanduka tudi ne bua kuteka mudimu wa buambi pa muaba wa kumpala.