Mua kulongolola mêyi mimpe a kutuadija nawu
1. Kutuadija ne mêyi mimpe nkuimpe bua tshinyi?
1 Anu bu mudi bintu bidi mua kupesha muntu nzala ya muakulaye kudia biakudia, mêyi mimpe a mbangilu adi afikisha ku muyuki muimpe wa malu a mu Bible. Mêyi mimpe a mbangilu adi mua kushintuluka bilondeshile bungi buawu ne tshidiwu amba, kadi anu bu biakudia bia muenya, bidi bikengela kualongolola misangu yonso kumpala kua dîba. (Nsu. 15:28) Ntshinyi tshidi mua kuvuija mêyi a mbangilu mimpe?
2. Leja mutudi mua kulongolola mêyi a mbangilu adi asankisha.
2 Usungule biena-bualu bidi bikoka ntema: Mêyi etu a mbangilu adi ne bua kujula muntu dijinga, anyi muntu utudi tuyukila nende udi mua kujikija muyuki. Nunku paudi udilongolola, ela meji bua malu atu asankisha bantu ba muabu unudi. Bantu ba muaba unudi, batuku dijinga ne mbulamatadi muimpe, nsombelu wa disanka mu dîku anyi dijika dia mvita anyi? Bantu mu kabujima batu basue kuleja mmuenenu wabu, nunku ulongolole lukonko ludi ne lungenyi kampanda ludi mua kubasaka bua kulejabu mmuenenu wabu. Kuenaku mua kuenza mudimu ne umue wa ku mishindu ya mua kubanga muyuki idi mu Mudimu wetu wa Bukalenge ne kuyenza bilondeshile teritware wenu anyi? Kanuenaku imue misangu mua kudibidija ne amue mêyi a mbangilu panudi nuenza Ntendelelu wa mu dîku anyi?
3. Mmunyi mutudi mua kuenza bua ne: mêyi etu a mbangilu umvuangane ne bilele anyi miaba ya bantu ba mu teritware wetu?
3 Wele meji bua bilele ne muaba: Mu imue miaba bidi bilomba bua kuambila muntu diakamue kendela ketu. Mu miaba mikuabu, batu bamona muntu udi uyukila ne muena kumbelu kampanda kayi muanji kumuebeja bua kumanya mudi makanda ende a mubidi ne pamuapa bua kumanya malu adi amutangila, bu mupange bukalanga. Mu imue miaba, bilondeshile bilele bia mu bitendelelu bia bantu bitu bipepele bua kutuadija ne mêyi a mu Bible. (Bien. 2:14-17) Kadi miaba idi bantu kabayi mu bitendelelu bia mu bukua-buena Kristo, anyi kabayi mene mu tshitendelelu nansha tshimue, bidi mua kuikala bimpe kubabadila mvese patudi tubapinganyina, pamutu pa kubabadila nayi patudi tutuilangana nabu bua musangu wa kumpala.—Bien. 17:22-31.
4. Miaku ya kutuadija nayi mêyi etu idi ne bua kuikala mushindu kayi?
4 Miaku ya kutuadija nayi: Ulongolole miaku ya kutuadija nayi bimpe menemene. Biambilu bîpi ne bipepele bitu bimpe bitambe. Mushindu utudi tutuadija muyuki utu ne mushinga wa bungi. Ikala ne musangelu. Utue mimuemue bua kuleja muudi usanka bua kumonangana ne muntu uudi mulue kutangila. Kutumikila mibelu eyi nekutuambuluishe bua kulongolola mêyi mimpe a kutuadija nawu muyuki ikala mua kujula bantu ba mu teritware wetu nzala ya kudia ku “mêsa a Yehowa.”—1 Kol. 10:21.