Tuakajayi mishindu yetu ya kuyisha: Kulongolola mêyi etu a mbangilu

Mushinga: Mêyi etu a mbangilu wowu kaayi ajula muntu dijinga dia kuteleja, adi mua kumufikisha ku dikosa muyuki katuyi banji kumuyisha. Nanku, bamanyishi ba bungi batu bamona ne: mêyi abu a mbangilu adi ne mushinga wa bungi padibu bakeba kuyisha muntu. Nansha mutubu batuleja mua kubanga muyuki mu Mudimu wetu wa Bukalenge ne mu mukanda wa Comment raisonner, kabatu baleja bionso bia kuamba bua kutuadija muyuki to, bua muntu yonso aubange bilondeshile nsombelu. Nansha bobu batuleje mua kubanga muyuki ku ntuadijilu too ne ku ndekelu, bamanyishi badi mua kushintulula amue malu anyi kulongolola wabu mushindu wa kubanga muyuki. Nanku, netupatule bipeta bimpe tuetu tulongolola bimpe menemene mêyi etu a mbangilu pamutu pa tuetu kuamba tshionso tshidi tshituluila mu lungenyi patudi tupetangana muntu.—Nsu. 15:28.

Mushindu wa kuenza nanku:

Usungule tshiena-bualu. Tshidi ne bua kuikala tshiangatshila mu mukanda uudi musue kupesha muntu ne tshidi ne bua kusankisha bantu ba mu teritware wenu.
Ulongolole tshiambilu tshimue anyi bibidi biwambila muntu panyima pa wewe mumane kumuela muoyo mutubu bawelangana muaba unudi. Udi mua kutuadija ne: “Ndi mulue kukutangila bualu. . . ,” “Bidi bitonda bantu ba bungi bua. . . ,” “Udi wela meji kayi bua. . . ,” anyi udi mua kuamba bualu bukuabu. Biambilu bîpi ne bipepele bitu bitambe buimpe. Bamue bamanyishi batu basue kukuata mêyi abu a mbangilu mu mutu.
Ukebe lukonko ludi mua kusaka muntu bua kuleja wende mmuenenu bua nuenu kuyukila nende. (Mat. 17:25) Umanye ne: kumpala kua wewe kufika, muntu uvua mua kuikala wela meji ku malu makuabu, nanku lukonko luebe kaluikadi lukole anyi ludi lumusamisha mutu to.

Tshitudi mua kuenza mu ngondo eu:

Panudi nuenza ntendelelu wa mu dîku, nukebe dîba dia kulongolola mêyi a mbangilu ne kuenza manaya a mua kubanga muyuki.
Paudi mu buambi, wambile bamanyishi bakuabu tshiudi mulongolole bua kuamba. (Nsu. 27:17) Ushintulule mêyi ebe a mbangilu bikalawu kaayi apatula bipeta bimpe.