Dilonga dia mukanda wa Semena pabuipi ne Yehowa didi dituadija mu lumingu lua dia 6 ngondo wa 1
1. Kutuadija mu lumingu lua dia 6 ngondo wa 1, mpunga kayi utuapeta bua kusemena pabuipi ne Yehowa?
1 Yehowa mmusue bua tusemena bapuipi nende. (Yak. 4:8) Bua kutuambuluisha mu bualu ebu, netutuadije kulonga mukanda wa Semena pabuipi ne Yehowa mu lumingu lua dia 6 ngondo wa 1, mu Dilonga dia Bible dia Tshisumbu. Badi bamba bua tshipatshila tshia mukanda eu mu dibeji diawu dia ntuadijilu ne: “Tuetu tuelangana meji a mudi Yehowa uleja ngikadilu yende, tukeba kumanya muvua Yezu muyileje bimpe menemene ne bumvue mutudi petu mua kuyipeta, nebituambuluishe bua kusemena pabuipi ne Nzambi menemene.” Bisumbu bikavua bilonge mukanda eu mu tshidimu tshia 2004 ne tshia 2005. Kadi, bua bamanyishi ba bungi batue ku miliyo ibidi badi balue bantemu ba Yehowa too ne mpindieu, nebikale musangu wabu wa kumpala bua kulonga ngikadilu mimpe ya Yehowa idibu bumvuije mu katoba ne mu katoba. Bua aba bakavua balonge mukanda eu, kuwulonga kabidi nekubambuluishe bua kukolesha dianyisha diabu bua ngikadilu ya Yehowa.—Mus. 119:14.
2. Leja mutuikala mua kulonga mukanda wa Semena pabuipi ne Yehowa.
2 Mua kuwulonga: Mulombodi neatuadije ne mêyi makese, pamuapa mu tshiambilu tshimue anyi bibidi. Mu mukanda eu kamuena mvese idibu bafunde ne: bala to, nunku mbimpe mulombodi asungule mvese minene ya kubala mu dilonga. Ku ndekulu kua dilongesha dionso mulombodi udi mua kuela lukonko lumue anyi ibidi bua kuenza diambulula. Pikala tshitupa kampanda tshikale ne kazubu ka: “Nkonko ya kuelela meji,” neakuate naku mudimu bua kuenza diambulula. Pikalaku dîba, mulombodi udi mua kubadisha imue mvese idi mu kazubu aku ne pashishe ele tunkonko tua pa mutu bua bantu bumvuije.
3. Patuikale tuenda tulonga mukanda eu, ntshinyi tshitudi ne bua kuikala tuenza? Bua tshinyi?
3 Enza bua mukanda eu ukuambuluisha: Nansha bikalabi ne: ukavua mulonge mukanda eu, ikala udilongolola kumpala kua dîba. Ikala wandamuna, bualu kuenza nunku kudi kutumbisha Yehowa, kukuambuluisha bua kuvuluka malu ne kuambuluisha bantu bakuabu. (Mus. 35:18; Eb. 10:24, 25) Paudi welangana meji bua ngikadilu milenga ya Yehowa, neusemene pabuipi nende. (Mus. 77:11-13) Dîba adi, neupete dijinga dikole dia kutumikika mikenji yende ne nebikusake bua kuambila bakuabu malu ende.—Mus. 150:1-6.