Londayi tshilejilu tshia baprofete: Sefanya
1. Pavua Yehowa musungule Sefanya bua kulua muprofete, nsombelu uvua mushindu kayi mu Yuda? Bua tshinyi Sefanya udi tshilejilu tshimpe kutudi?
1 Tudi mu bidimu bia 600 kumpala ku Yezu. Bavua batendelela Bâla bikole mu Yuda. Bavua bafuma ku dishipa mukalenge mubi Amona, ke muanende Yoshiya kutuadijaye kukokesha. (2 Kul. 33:21–34:1) Tshikondo atshi Yehowa wakatuma muprofete Sefanya bua kuambila bantu mukenji wa kabutu. Nansha muvua Sefanya mua kuikala wa mu dîku dia bakalenge, kakatekesha mukenji au to, kadi wakaleja bantu bavua balombola ditunga malu abu mabi. (Sef. 1:1; 3:1-4) Tudi petu tudienzeja bua kuidikija dikima dia Sefanya, tubenga bua balela betu kabatupangishi bua kutendelela Yehowa bimpe. (Mat. 10:34-37) Sefanya uvua wamba tshinyi? Kuakapatuka bipeta kayi?
2. Bua kutusokokabu mu dituku dia tshiji dia Yehowa, tudi ne bua kuenza tshinyi?
2 Keba Yehowa: Anu Yehowa nkayende ke udi mua kupandisha bantu mu dituku dia tshiji tshiende. Ke bualu kayi Sefanya wakambila bena Yuda bua kukeba Yehowa, kukeba buakane, kukeba ne kalolo patshivuaku dîba. (Sef. 2:2, 3) Ke mudibi kabidi lelu. Tudi petu tuambila bantu bua bakebe Yehowa anu bu muvua Sefanya muenze; kadi tuetu petu tudi ne bua kumukeba, tudi ne bua kuangata dipangadika dia kubenga ‘kulekela Yehowa.’ (Sef. 1:6) Bua kukeba Yehowa, tudi ne bua kulonga Dîyi diende ne muoyo wonso, ne kumulomba bua atulombole. Bua kukeba buakane, tudi ne bua kuikala ne bikadilu bimpe. Bua kukeba kalolo, tudi ne bua kuikala ne lungenyi lua kukokela ne kuikala ba kumpala mu ditumikila malu adi bulongolodi bua Nzambi butulomba.
3. Bua tshinyi mbimpe tuikale ne mmuenenu muimpe bua mudimu wa buambi?
3 Bipeta bimpe: Bantu bakese bakalonda malu avua Sefanya ubambila, munkatshi muabu muvua Yoshiya. Yoshiya wakatuadija kukeba Yehowa patshivuaye muana. Wakalua kuluisha bikole ditendelela dia mpingu. (2 Kul. 34:2-5) Lelu, nansha mudi imue ntete imata ku muelelu wa njila, pa mabue, anyi mu mêba, mikuabu ntete idi yoyi imata pa buloba buimpe, ilua kukuama bimuma. (Mat. 13:18-23) Tudi bashindike ne: Yehowa neabeneshe mudimu mukole utudi tuenza bua kuyisha Bukalenge.—Mus. 126:6.
4. Bua tshinyi tudi ne bua kushala ‘bindile Yehowa’?
4 Bamue bena Yuda bavua bela meji ne: Yehowa kakuenza bualu nansha bumue to. Pabi, Yehowa uvua mujadikile bantu bonso ne: dituku diende dinene divua pabuipi. (Sef. 1:12, 14) Anu bantu bavua bamueyemena ke bavua mua kupanduka. (Sef. 3:12, 17) Bu mutudi ‘bindile Yehowa,’ tuikalayi ne disanka dia kuenzela Nzambi wetu munene mudimu mu bobumue ne bena Kristo netu!—Sef. 3:8, 9.