Tulombolayi malonga a Bible mimpe
1. Bamanyishi badi balombola malonga a Bible badi ne mudimu kayi?
1 Kakuena muntu udi mua kuenzela Nzambi mudimu padiye “kayi mumukoke nansha.” (Yone 6:44) Nansha biobi nanku, bamanyishi badi balombola malonga a Bible badi ne tshiabu tshidibu ne bua kuenza bua kuambuluisha bantu bua kusemenabu pabuipi ne Tatuabu wa mu diulu. (Yak. 4:8) Kuenza nanku kudi kulomba kudilongolola. Kubala patupu bikoso ne kuela balongi nkonko kakuena kukumbana bua kubambuluisha bua kumvua mukenji wa mu Bible ne kuya kumpala to.
2. Bua kufika ku dilombola malonga a Bible mimpe, bidi bikengela kuenza malu kayi?
2 Bua kulombola malonga a Bible mimpe, bamanyishi badi ne bua kuambuluisha balongi babu ba Bible bua 1) bumvue malu adi Bible ulongesha, 2) baitabe, ne 3) baatumikile. (Yone 3:16; 17:3; Yak. 2:26) Kuambuluisha muntu mushindu eu, kudi mua kuangata ngondo ya bungi. Kadi malu onso aa adi ambuluisha muntu bua kukoleshaye malanda ende ne Yehowa ne kudilambula kudiye.
3. Bua tshinyi mulongeshi muimpe utu wela nkonko bua kumanya tshidi mulongi wela meji?
3 Mulongi wa Bible udi wela meji kayi?: Bua wewe kumanya bikala mulongi wa Bible umvua ne witaba bidiye ulonga, ki mbimpe kuikala kadimbila kadijila, kadi mbimpe kupesha mulongi mpunga wa kuakula pende. (Yak. 1:19) Udiku umvua tshidi Bible wamba bua bualu bunudi nulonga anyi? Udiku pende mua kubumvuija mu ende mêyi anyi? Mmushindu kayi udiye udiumvua bua bidiye mulonge? Udiku witaba ne: malu adi Bible ulongesha mmalelela anyi? (1 Tes. 2:13) Udiku umvua ne: malu adiye ulonga adi ne bua kushintulula nsombelu wende anyi? (Kolos. 3:10) Bua wewe kupeta mandamuna a nkonko eyi, bidi bikengela kuela mulongi nkonko ne bukalanga buonso bua kumanya tshidiye wela meji, pashishe ushale mumuteleje.—Mat. 16:13-16.
4. Ntshinyi tshitudi ne bua kuenza bikala mulongi ne lutatu lua kumvua anyi lua kutumikila malu adiye ulonga mu Bible?
4 Misangu ya bungi, balongi ba Bible batu balamata bikole meji ne bibidilu bidibu nabi, ne bidi mua kuangata dîba dia bungi bua kubilekelabu. (2 Kol. 10:5) Kadi tshiakuenza tshinyi bikala mulongi kayi witaba anyi utumikila bidiye ulonga? Bidi bikengela kuikala ne lutulu bua kushila Dîyi dia Nzambi ne nyuma muimpe tshikondo tshikumbane bua bienze mudimu mu muoyo wende. (1 Kol. 3:6, 7; Eb. 4:12) Bikalaye ne lutatu lua kumvua anyi lua kutumikila dilongesha kampanda dia mu Bible, ki mbimpe kumuitabijija ku bukole to, kadi misangu ya bungi mbimpe kupita nende mu tshiena-bualu tshikuabu. Bu mutudi tutungunuka ne kumulongesha malu a mu Bible ne lutulu luonso ne dinanga, bidi mua kulua kumusaka bua kulua kushintuluka.