Ambuluisha bampofu bua balonge malu a Yehowa

1. Mmunyi muvua Yezu muleje bampofu luse?

¹ Dituku divua Yezu ne bua kufua dikavua disemene. Pavuaye uya mu tshimenga tshia Yeleko, balombi ba ka pa luse babidi bavua bampofu bakela mbila bamba ne: ‘Mukalenge, tumvuilaku luse!’ Nansha muvua Yezu welangana meji bua ntatu mikole ivua mimuindile, wakimana, kubabikila, kubondopaye. (Mat 20:29-34) Mmunyi mutudi mua kuidikija luse luvua nalu Yezu bua bampofu?

2. Mmunyi mutudi mua kuyisha mpofu tuetu tuyisha muaba udi bantu ba bungi?

² Bambuluisha: Wewe mupetangane ne mpofu pamuapa paudi uyisha muaba udi bantu ba bungi, udimanyishe kudiye ne umuambile ne: udi musue kumuambuluisha. Mpofu udi mua kuanji kuelakana bualu batu batamba kubakengesha. Kadi wewe umutabalela ne muoyo mujima ne udienzeja bua kuikala mulunda muimpe kudiye, bidi mua kumusaka bua kudiumvua bimpe. Umanye kabidi ne: bumpofu butu mishindu mishilangane, bualu ebu budi mua kukuambuluisha bua kubenzela malu bilondeshile majinga abu. Wewe mumane kumuambuluisha, pamuapa udi mua kumuambila ne: udi wenda wenza mudimu wa dilongesha bantu Bible. Umubadile mvese bu mudi Musambu wa 146:8 anyi Yeshaya 35:5, 6. Yeye mumanye mua kubala mfundilu wa bampofu, umuebeje bikalaye musue kupeta mikanda yamuambuluisha bua kulonga malu a mu Bible a bungi. Udi kabidi mua kumuambuluisha bua kupetaye mêyi makuata a mikanda eyi adi mu jw.org. Yeye ne ordinatere udi ne programe udi umuambuluisha bua kubalaye malu, udi mua kuanyisha bikole biena-bualu bia kupatula pa mabeji bia mu jw.org ne mikanda inudi mua kuambula mu site wetu mu mfundilu wa RTF.​—Bala kazubu ka “Paudi wambuluisha mpofu”

3. Leja mutudi mua kukeba bampofu badi mu teritware wetu.

³ Ukebe bampofu: Tutu tupetangana ne bampofu mu mpukapuka patutu tuyisha ku nzubu ne ku nzubu bualu ba bungi kabatu basue kuyukila ne benyi badi balua kuabu to. Nanku bidi bikengela kudienzeja ne muoyo umue bua ‘kukeba’ bampofu bua kubayisha. (Mat 10:11) Udiku ne muena mudimu wenu peshi mulongi wenu udi mpofu anyi? Keba mushindu wa kuyukila nende. Koku tshilongelu tshia bampofu mu teritware wenu, bapeshe mikanda yetu ya mu mfundilu wa bampofu bua bikale nayi mu tshilaminu tshiabu tshia mikanda. Udiku mumanye muntu kampanda udi ne muena mu dîku diabu udi mpofu anyi? Mu teritware wenu mudiku bulongolodi kampanda budi ne mudimu wa kuambuluisha bampofu anyi miaba idibu babalongoluele bua kusombela anyi? Umvuija muena mu dîku dia bampofu peshi muntu udi wakidilangana anyi mulombodi wa muaba udi bampofu basombele ne: Bantemu ba Yehowa badi badifila bikole bua kuambuluisha bampofu, umuambile bua kumutuadila mikanda yetu ya mu mfundilu wa bampofu anyi mêyi ayi makuata. Umuleje mulayi wa mu Bible wa ne: Nzambi ukadi pa kujikija bumpofu bua kashidi. Udi kabidi mua kumuleja kafilme kadi mu jw.org ka ne: “Sans elle, je serais perdu” kadi kalonda bualu bua mpofu kampanda uvua Bible wa mu mfundilu wa bampofu muambuluishe. Wewe mumumvuije tshiudi muluile, bidi mua kukupetesha mushindu wa kumonangana ne bampofu nkayabu.

4. Bualu bua Janet budi butulongesha tshinyi?

⁴ Muanetu wa bakaji kampanda udi mpofu, diende Janet, uvua muye muaba kansanga uvua bampofu basombele. Wakatuadija kuyukila ne nsongakaji mukuabu. Janet wakamuambila ne: “Yezu uvua muondope bampofu bua kuleja tshikalaye mua kuenzela bampofu bonso.” Bakabala nende Buakabuluibua 21:3, 4, Janet kumumvuijaye muakumbaja Bukalenge bua Nzambi mulayi eu. Nsongakaji au kushala mupuwe vii pashishe kuambaye ne: “Tshitu muanji kumvua mpofu wamba bualu bua nunku to. Bantu ba bungi batu bamona badi bamba ne: Bamue bantu mbalue bampofu bualu bobu anyi bankambua babu bavua mbenze bualu kampanda.” Janet wakamutumina mesaje ku Enternete makuatakaja ne mukanda wa Bible ulongesha, mpindieu badi balonga Bible misangu ibidi ku lumingu.

5. Nansha mutudi katuyi mua kuondopa bampofu bu muvua Yezu muenze, kubatabalela ne muoyo mujima nekutupeteshe masanka kayi?

⁵ Bushuwa, katuena mua kuondopa bampofu bu muvua Yezu muenze to, kadi tudi mua kuambuluisha aba bonso badi nzambi wa ndongoluelu wa malu eu mufofomije mêsu a meji, ne aba badi bampofu bena dîna bua kumvuabu bulelela budi mu Dîyi dia Nzambi. (2 Ko 4:4) Yezu uvua muondape bantu babidi pabuipi ne Yeleko bualu ‘wakabumvuila luse.’ (Mat 20:34) Tuetu batabalele bampofu ne muoyo mujima mushindu eu, netupete disanka dia kuambuluisha bamue ba kudibu bua kulongabu malu a Yehowa, Nzambi wajikija bumpofu bua kashidi.