Broshire wa Tukonkononayi Mifundu dituku dionso utu ukuambuluisha anyi?

Mu malu a mu nyuma autu wenza, utu kabidi ubala mvese wa ku dituku ne diumvuija diende mu broshire wa Tukonkononayi Mifundu dituku dionso anyi? Biwikala kutu wenza nanku, mbimpe utuadije. Ba bungi batu bakonkonona mvese mu dinda menemene bua bamuelele meji padibu mu midimu yabu ya dituku adi. (Yos 1:8; Mis 119:97) Udi mua kuenza tshinyi bua mvese wa ku dituku kukuambuluishaye bikole? Bala mvese idi ku mutu ne kuinshi kuende bua kumumvua bimpe. Ela meji a miyuki ya mu Bible idi yumvuangana ne dîyi dinene didi mu mvese au. Pashishe ukebe muudi wewe mua kutumikila dîyi adi. Dîyi dia Nzambi diodi diludika mapangadika audi wangata, nediludike nsombelu webe mujima, ne nedikuambuluishe bikole.​—Mis 119:105.

Mu Betele ya pa buloba bujima, batu bakonkonona Mifundu dituku dionso dîba dia biakudia bia mu dinda. Bidimu bishale ebi mbele filme ya muvuabu bumvuije mvese ya bungi ku Betele ku TV wa JW mu tshitupa tshia MALU MANENE NE MIYUKI. Ndîba kayi diuvua mumone umue anyi ya bungi ya ku filme eyi? Pamuapa amue malu adibu bakuilamu adi alenga nsombelu uudi nende menemene. Tshilejilu: Bualu bua Lota budi bukulongesha tshinyi bua mapangadika audi wangata?

NUTANGILE FILME WA KANUNANGI MALU A BA PA BULOBA (1YN 2:15), PASHISHE NUANDAMUNE NKONKO EYI:

• Ntendelelu wa mu dinda eu uvua mushindamene pa dîyi dinene kayi dia mu Bible?

• Muyuki wa bualu bua Lota udi utulongesha tshinyi bua njiwu ya dinanga malu a ba pa buloba anyi bintu bia pa buloba?​—Gen 13:12; 14:12; 19:3, 12, 13, 24-26

• Mmushindu kayi utudi mua kuleja ne: tudi banange Yehowa, kadi katuena banange malu a ba pa buloba anyi bintu bidipu?