“Mpindieu ndi munange buambi!”

NGAKAJIMIJA DISANKA DIMVUA NADI

Bia dibungama, pangakakumbaja bidimu 13, bulunda buanyi ne Yehowa buakabanga kutata. Mvua mmona ne: balongi betu bavua bobu benza malu onso avua abasankisha, ne mvua panyi njinga kubafuana. Nkavua ngumvua mikenji ya baledi banyi ne mikenji ya buena Kristo intondesha nsombelu, ne malu a mu nyuma annemena bujitu. Mvua anu mumanye ne: Yehowa utuku, kadi tshivua kabidi ndiumvua pabuipi nende to.

Nkavua nyisha anu mu mpukapuka bua kabalu kumbala mu mulongo wa bamanyishi bakadi balekele kuyisha. Kumpala kua kuya mu buambi tshivua nansha ndilongolola to, nanku mvua mpatata bua kuasa muyuki ne muntu peshi bua kutungunuka nawu. Nkavua nyisha anu bua kumana mukenji ne kuyisha kuine kakutshivua kunsankisha to, kuakabanga kumfiikila ne ku muoyo. Mvua ndiebeja ne: ‘Mmunyi mudi muntu mua kuikala yeye anu uyisha ku lumingu ku lumingu, ku ngondo ku ngondo?’

Pangakakumbaja bidimu 17, ngakapeta dijinga dikole dia kudienzela malu mumvua musue. Ke meme kuvunga kanyi pa kanyi, kumbuka kua baledi kuya kusombela mu Australie. Diumbuka dianyi diakatonda baledi banyi. Bivua bibasamishe mutu, kadi bavua badiambila anu ne: nentungunuke ne kutendelela Yehowa.

Mu Australie mumvua muye amu, luya lukese lumvua nalu mu malu a ntendelelu kutalala kabidi bikole. Nkavua mpumbisha bisangilu. Meme kudia bulunda ne bansonga bavua banange pabu kuenza malu bu meme. Tubuela mu bisangilu dilolo kampanda, didi dilonda tuya mu nganda butuku bua kunua maluvu ne kuja maja. Pandi mvuluka bionso abi, ndi mmona ne: mvua dikasa mu bulelela dikuabu pambelu, tshivua ne kumvua munemenene to.

DILONGESHA DIA MUSHINGA DIMVUA TSHIYI MUELELE MEJI

Bidimu bu bibidi pashishe, ngakamonangana ne muanetu wa bakaji mukuabu uvua mutuadije kungeleshisha meji bua nsombelu umvua nende, kadi kayi mumanye to. Meme ne bana betu ba bakaji batanu bavua bajike tuvua basombele mu nzubu umue. Tuvua bakidile mutangidi wa tshijengu ne mukajende diende Tamara, bua kuluabu kusomba netu munkatshi mua lumingu lumue. Tamara uvua usomba netu, tuyukila nende tuseka, dîba divua bayende wenza malu a mu tshisumbu. Mvua munange nanku be! Uvua umvuilangana ne bivua bipepele bua kuakula nende. Tshivua ngela meji ne: muntu mukole mu nyuma muvuaye amu uvua mua kuikala munange kuela bilele to.

Tamara uvua muntu wa musangelu wa bungi. Uvua munange bulelela, munange ne buambi bikole, bifila ne dijinga dia kumuidikija. Uvua ne disanka dia kuenzela Yehowa mudimu ne muende muonso, pamvua meme eku tshiyi nadi nyisha bia tshidingishilu. Mmuenenu wende muimpe wa malu ne disanka divuaye nadi bivua binsake bua kuakaja malu mu nsombelu wanyi. Tshilejilu tshiende tshiakangelesha meji a bulelela bua mu Bible ebu: Yehowa mmusue bua yonso wa kutudi amuenzele mudimu “ne disanka” ne “mbila ya disanka.”​—Mis. 100:2.

NGAKAPETULULA DINANGA DIA BUAMBI DIMVUA MUJIMIJE

Mvua musue kupeta disanka dia buena divua nadi Tamara, kadi bivua bikengela nshintulule malu a bungi. Biakangangata matuku a bungi, ku shoo meme kutuadija kushintuluka ku kakese ku kakese. Meme kubanga kudilongolola kumpala kua kuya mu buambi, ngenza bumpanda-njila buambuluishi imue misangu. Kungambuluishabi bua kumbusha buôwa ne kuikala mutuishibue bua bindi ngamba. Bu mumvua ntamba kubadila bantu Bible mu buambi, ngakalua kunanga mudimu eu bikole. Matuku makese pashishe, meme kutuadija kuenza bumpanda-njila buambuluishi ngondo yonso.

Mvua mpindieu ne balunda ba milongo yonso bavua banange bulelela ne banange mudimu uvuabu benzela Yehowa. Tshilejilu tshiabu tshimpe tshivua tshingambuluishe bua kuteka bualu ne bualu pa muaba wabu ne kudienzela programe wa didilongela ne dibala dia Bible. Buambi buakabanga kunsankisha bikole, meme kulua mpanda-njila wa pa tshibidilu. Bua musangu wa kumpala panyima pa bidimu bia bungi, ngakadiumvua bimpe ne disanka mu tshisumbu.

NGAKAPETA MPANDA-NJILA NANYI WA KASHIDI

Tshidimu tshijima pashishe, tuakatuilangana ne Alex uvua muntu wa malu mimpe kayi usokoka tshivuaye. Uvua munange Yehowa, munange ne buambi. Uvua musadidi wa mudimu ne mpanda-njila kukavua bidimu bisambombo. Uvua kabidi muenze mudimu mu Malawi, muaba uvuabu dijinga ne bamanyishi ba bungi. Muomu amu uvua musombe ne bamisionere bavua tshilejilu tshimpe kudiye, bavua bamukankamije bua kutungunuka ne kuteka malu a Bukalenge pa muaba wa kumpala.

Tuakaselangana ne Alex mu 2003, ne katshia apu tudi anu mu mudimu wa ku dîba ne ku dîba. Tudi balonge malu a bungi a dikema, Yehowa pende mmutupongoluele mabenesha bungi kabuyi kubala.

MABENESHA MAKUABU A KUDI YEHOWA

Mu 2009, bakatutuma mu mudimu wa bumisionere mu Timor-Oriental, kaditunga kakese ka mu bidiila bia Indonésie. Bivua bitubazule, tshibi tumvua disanka dia kumuya eku bikale kabidi ne buôwa. Ngondo itanu pashishe, tuetu kuya ku Dili, tshimenga tshikulu tshia ditunga adi.

Dimuangala edi diakenza bua tushintulule malu a bungi atuvua bibidilangane nawu kumpala. Bivua bikengela tuibidilangane ne bilele bikuabu, muakulu mukuabu, biakudia bikuabu, ne malu makuabu a mu nsombelu wa mu ditunga adi. Patuvua mu buambi, tuvua tutamba kumona muvua bantu mu bupele, kabayi bamanye mukanda peshi bawumanye anu kakese, tumona ne bavuabu bakengesha. Bua mvita yakenzeka mu ditunga adi ne bua malu a tshikisu avuabu benzele bantu, ba bungi bavua ne bibangu pambidi, bakuabu pabu ne tunyinganyinga mu mioyo.a

Mudimu wa buambi uvua utusankisha bikole! Tshilejilu, musangu kampanda ngakatuilangana ne muana wa bakaji mukuabu wa bidimu 13 diende Maria. Muana au uvua anu mubungame.b Mamuende uvua mufue kukavua bidimu ndambu, ne uvua umona tatuende anu mu mpukapuka. Maria kavua ne wa kumulombola mu nsombelu to, anu bu muvua bana bakuabu ba bungi ba mulongo wende. Ndi mvuluka muvuaye mudile dituku divuaye undondela yende ya munda. Tshivua ngumvua malu avuaye ulonda to, bualu tshivua muanji kumanya muakulu wabu bimpe to. Ngakasambila Yehowa, meme kumulomba bua angambuluishe mmanye mua kumukankamija. Pashishe meme kumubadila mvese ivua ikolesha ku muoyo. Mu bidimu bikese biakalonda, ngakamona muvua bulelela bushintulula Maria. Wakashintulula bikadilu biende, mvuadilu ne tshimuenekelu tshiende, ne nsombelu wende mene mujima. Yeye kubatijibua, ne ukadi mpindieu ne bende bantu badiye ulongesha Bible. Lelu eu Maria udi mu dîku dinene dia bantu ba Yehowa, mumone mudibu bamunange yeye muine.

Yehowa udi ubenesha mudimu wa buambi mu Timor-Oriental. Nansha mudi bamanyishi ba bungi badimu babatijibue anu mu bidimu dikumi bishale ebi, ba bungi mbampanda-njila, basadidi ba mudimu, anyi bakulu. Bakuabu badi benza mudimu ku biro bia mudimu wa dikudimuna bua kuambuluisha mu dipatula biakudia bia mu nyuma mu miakulu ya kuabu. Bivua binsankisha bikole pamvua mbumvua bimba misambu mu bisangilu, mbamona muvuabu batua mimuemue, ne muvuabu benda bakolesha malanda abu ne Yehowa.

NSOMBELU UDI MUTUSANKISHE MUMVUA TSHIYI MUELELE MEJI

Nsombelu utuvua nende mu Timor-Oriental uvua mushilangane bikole ne wa mu Australie, kadi tshivuaku muanji kuela meji ne: uvua ulua kutusankisha nanku to. Imue misangu tuvua tudipaya mu kamashinyi kuule tente ne bantu bavua bafumina mu tshisalu, bambule mishipa miume ne mabuki a bisekiseki. Matuku makuabu tuvua tulonga ne bantu mu kazubu muvua luya ne mutelela, panshi manyanu eku nzolo yenda yendakanamu. Kadi nansha muvuaku malu atatshisha, misangu mivule mvua ndiambila ne: ‘Bimpe be!’

Pandi mvuluka malu akadi mapite, ndi ngela baledi banyi tuasakidila bua muvuabu benze ne muabu muonso bua kundongesha mikenji ya Yehowa ne kuntabalela, nansha mu tshikondo tshivua malanda anyi ne Yehowa matuadije kutata. Nsumuinu 22:6 mmukumbane mu bualu buanyi meme. Papa ne mama badi badisua buanyi meme ne Alex; badi ne disanka dia kumona mudi Yehowa ukuata netu mudimu. Tudi mpindieu mu mudimu wa butangidi bua tshijengu mu Australasie katshia ku 2016.

Mbikole bua kuitaba ne: kudi tshikondo tshimvua mmona mudimu wa buambi munnemene bujitu. Bua mpindieu ndi munange mudimu wa buambi! Ndi mufike ku dimona ne: nansha muntu mu bikondo bia masanka anyi bia ntatu, bua yeye kupeta disanka dilelela anu yeye muenzele Nzambi mudimu ne muoyo mujima. Bushuwa, bidimu 18 bitudi benze ne Alex mu dienzela Yehowa mudimu ebi mbimpeteshe disanka dintu tshiyi muanji kupeta to. Mpindieu ndi mujingulule bimpe bualu buvua Davidi mufundi wa misambu muambile Yehowa ne: “Bantu bonso badi banyemena kuudi nebasanke; nebikale bela mbila ne disanka misangu yonso. . . . Ne bantu badi banange dîna diebe nebasankile mu wewe.”​—Mis. 5:11.