Bua tshinyi lukuna ludi anu luenda kulunguluka?

Bua tshinyi lukuna ludi anu luenda lulunguluka mushindu eu pa buloba? Bua kumanya tshidi tshienza bua bikale nanku, bidi bikengela tumanye tshidi lukuna lumvuija, tshitu tshisaka bantu bua kukina bakuabu, ne bua tshinyi lukinu ludi miaba yonso.

Lukuna ntshinyi?

Lukuna nkubipisha muntu bikole anyi kuluisha muntu kampanda peshi tshisumbu tshia bantu bikole menemene. Ludi kabidi lumvuija kuelela muntu meji mabi dîba dionso.

TSHITU TSHISAKA BANTU BUA KUKINA BAKUABU

Kudi malu a bungi adi enza bua bantu bafike ku dikina bakuabu. Misangu ya bungi batu benzela bakuabu malu ne lukinu kabiyi anu bua bualu bubi kampanda budibu benza to, kadi anu bualu mba tshisamba tshikuabu. Badi mua kubakina bela meji ne: bantu bonso ba mu tshisamba atshi mbantu babi badi ne tshikisu badi kabayi mua kushintuluka to. Badi mua kubamona bu bantu bashadile, benzedianganyi ba bibi anyi bakebeshi ba bilumbu. Bantu batu bakine bakuabu bualu badi mua kuikala babenzele malu a tshikisu, a kansungansunga, anyi batuilangane ne bualu kampanda buvua bubafikishe ku dikala ne meji mabi.

MUDI LUKUNA LUTAMPAKANA

Muntu udi mua kukina mukuabu nansha yeye kayi muanji kumonangana nende. Tshilejilu, bantu batu bamona bakuabu anu mushindu utu bena mu dîku diabu anyi balunda babu babamona. Nanku, umue wa mu dîku diabu yeye mukine tshisumbu kampanda tshia bantu, bena mu dîku adi bonso badi pabu pamuapa mua kutuadija kukina bantu abu.

Tuetu bamanye mudi lukuna luenda lutampakana, netumone bua tshinyi bantu ba bungi mbakine bakuabu. Kadi bua kutshimuna lukuna ludi luase miji mu mioyo ya bantu tudi ne bua kuanji kumanya muvua lukuna lutuadije. Bible udi utuleja muvualu lutuadije.

BIBLE UDI ULEJA MUVUA LUKUNA LUTUADIJE

Miketa ibidi mikobame inyunguluka mitangilangane, ileja malu adi enza bua lukuna luenda anu lulunguluka. 1. Ngumu ya dishima, tusumbu tua bantu, miaba ya dipetelangana ku Enternete, mu ngumu anyi mu bikandakanda. 2. Bantu ki mbamanye bantu babisamba bikuabu, dikoba dikuabu, anyi ba tshitendelelu tshikuabu. 3. Bantu badi ne buôwa bualu bakuabu badi mua kushintulula nsombelu wabu, kubanyenga bintu bidibu nabi, anyi bua tshidi mua kubafikila. 4. Lukinu ludi mua kukebesha kansungasunga, disungulujangana, ne tshikisu.

LUKUNA KALUVUA LUTUADIJILE MU BANTU TO. Luakatuadija musangu uvua muanjelu uvuabu balue kubikila ne: Satana Diabolo, mutombokele Nzambi. Diabolo “uvua mushipianganyi pakabangaye” buntomboji. Yeye “mmuena dishima ne tatu wa dishima.” Ke bualu kayi mmutungunuke ne kusaka bantu ku dienza malu a lukinu ne a tshikisu. (Yone 8:44; 1 Yone 3:11, 12) Bible udi wamba mudiye ne meji a kuenzelangana bibi, muikale ne tshiji ne muena tshikisu.—Yobo 2:7; Buakabuluibua 12:9, 12, 17.

MBIPEPELE BUA BANTU BAPANGE BUPUANGANE KUKINANGANA. Adama muntu wa kumpala wakalonda njila mubi wa Satana. Mpekatu ne dipanga bupuangane biakabuela mu bantu bua tshivuaye muenze atshi. (Lomo 5:12) Kayina muanende wa kumpala wakashipa muanabu Abel ne lukinu luonso. (1 Yone 3:12) Bushuwa, bantu ba bungi mbanange bakuabu ne badi babumvuila luse. Kadi bua dipanga bupuangane, bantu ba bungi mbalue badinangi, badibandishi, bikale kabidi ne mukawu udi ubasaka kudikina bakuabu.—2 Timote 3:1-5.

LUKUNA LUDI LUENDA LUVULA BUA KANSUNGANSUNGA. Lukuna ludi luenda anu luvula pa buloba apa bualu bantu badi basaka bakuabu ku dikala ne ngikadilu mibi ne bienzedi bibi bia tshikisu. Kansungansunga, meji mabi, bipendu, dikengeshangana, ne tshinyangu bidi bienda anu bivula bualu “ba pa buloba bonso badi ku bukokeshi bua mubi,” Satana Diabolo.—1 Yone 5:19.

Kadi Bible kena uleja anu patupu muvua lukuna lutuadije to. Udi uleja kabidi tshiakuenza bua kulutshimuna.