TSHIENA-BUALU TSHIA KULONGA 10
MUSAMBU WA 13 Kristo udi tshilejilu kutudi
‘Tungunuka ne kulonda’ Yezu panyima pa batismo webe
“Biasua muntu kundonda, adibenge, ambule mutshi wende wa makenga ku dituku ne ku dituku ne atungunuke ne kundonda.”—LUKA 9:23.
LUNGENYI LUNENE
Tshiena-bualu etshi tshidi tshileja mudi didilambula dietu kudi Yehowa diakaja nsombelu wetu. Netshiambuluishe nangananga bantu badi bafuma ku dibatijibua bua bashale ne lulamatu.
1-2. Padi muntu ubatijibua, mmasanka kayi adiye upeta?
TUTU tusanka patutu tubatijibua tulua ba mu dîku dia Yehowa. Ndiakalenga ditudi nadi dia kudia bulunda ne Yehowa. Tudi tuitaba tshivua Davidi mufundi wa Misambu muambe tshia ne: “Wa diakalenga mmuntu uudi [wewe Yehowa] usungula ne usemeja pabuipi bua kusombaye mu mbanza yebe.”—Mis. 65:4.
2 Yehowa katu ubueja muntu yonso tshianana tshianana mu dîku diende to. Tshiena-bualu tshishale tshivua tshileje ne: udi usemena pabuipi ne bantu badi basue kudia nende bulunda bukole. (Yak. 4:8) Paudi udilambula kudi Yehowa ne ubatijibua, udi usemena pabuipi nende menemene mu mushindu wa pa buawu. Ikala mumanye ne: panyima pa batismo webe, Yehowa ‘neakulokeshile dibenesha too ne padiku kakuyi kupangika tshintu nansha tshimue.’—Mal. 3:10; Yel. 17:7, 8.
3. Bena Kristo badi badilambule ne babatijibue badi ne bua kuenza bualu kayi bunene? (Muambi 5:4, 5)
3 Batismo ntuadijilu patupu. Wewe mumane kubatijibua, mbimpe udienzeje bua kukumbaja mutshipu webe, nansha mu ntatu anyi mu mateta. (Bala Muambi 5:4, 5.) Bu muudi muyidi wa Yezu, udi ne bua kumuidikija ne kutumikila mikenji yende bimpe bimpe. (Mat. 28:19, 20; 1 Pet. 2:21) Tshiena-bualu etshi netshikuleje mua kuenza nanku.
‘TUNGUNUKA NE KULONDA’ YEZU NANSHA MU NTATU NE MU MATETA
4. Mmu ngumvuilu kayi mudi bayidi ba Yezu bambula ‘mutshi wa makenga’? (Luka 9:23)
4 Ntatu idi mua kukuata muntu nansha panyima pa batismo wende. Yezu uvua muambe ne: bayidi bende bavua ne bua kuambula ‘mutshi wa makenga.’ Bavua ne bua kuwambula “ku dituku ne ku dituku.” (Bala Luka 9:23.) Uvuaku usua kuamba ne: bavua ne bua kushala bena dikenga anyi? Tòo. Kadi uvua usua kuleja ne: pa kumbusha masanka avuabu ne bua kupeta, bavua ne bua kupeta kabidi ntatu. Imue ya kudiyi ivua mene mua kubatatshisha bikole.—2 Tim. 3:12.
5. Mmasanka kayi avua Yezu mulaye bantu badi badipangisha amue malu?
5 Pamuapa ukadi mupete buluishi mu dîku, peshi mulekele amue malu audi munange bua kukeba tshia kumpala Bukalenge bua Nzambi. (Mat. 6:33) Biobi nanku, manya ne: Yehowa mmumone bionso abi. (Eb. 6:10) Pamuapa ukadi mumone mudi mêyi a Yezu aa makumbane: “Kakuena muntu udi mushiye nzubu anyi bana babu ba balume anyi bana babu ba bakaji anyi mamuende anyi tatuende anyi bana anyi madimi bua bualu buanyi ne bua bualu bua lumu luimpe wapanga kupeta misangu lukama kupita, mpindieu mu tshikondo etshi, nzubu, bana babu ba balume, bana babu ba bakaji, bamamu, bana ne madimi, pamue ne makenga, ne mu ndongoluelu wa malu udi ulua, muoyo wa tshiendelele.” (Mâko 10:29, 30) Masanka atudi tupeta mmapite malu atudi badipangishe kule ne kule.—Mis. 37:4.
6. Bua tshinyi udi ne bua kutungunuka ne kuluisha “majinga a mubidi” panyima pa batismo webe?
6 Udi ne bua kutungunuka ne kuluisha “majinga a mubidi” panyima pa batismo webe. (1 Yone 2:16) Bidi nanku bualu udi anu mupange bupuangane. Imue misangu, udi mua kumvua anu bu mupostolo Paulo wakafunda ne: “Ndi nsanka bulelela bua mikenji ya Nzambi bilondeshile tshindi munda muanyi, kadi ndi mmona mu mubidi wanyi mukenji mukuabu uluangana ne mukenji wa mu meji anyi ne uya nanyi munkuate mutangile ku mukenji wa mpekatu udi mu mubidi wanyi.” (Lomo 7:22, 23) Meji ebe a kuenza mpekatu adi mua kukutshiokesha. Kadi wewe welangana meji a mutshipu uuvua muenzele Yehowa pauvua mudilambule kudiye, neukoleshe dipangadika diebe dia kubenga kukuluka mu diteta. Mutshipu au neukuambuluishe kumpala kua diteta. Mushindu kayi?
7. Mmunyi muakuambuluisha didilambula kudi Yehowa bua kushala ne lulamatu kudiye?
7 Paudi udilambula kudi Yehowa, udi udibenga. Tuambe ne: udi ne bua kulekela majinga anyi malu mabi onso adi kaayi asankisha Yehowa to. (Mat. 16:24) Dîba adi pakutetabu, kuakusamisha mutu bua tshia kuenza to. Newikale mumane kudisuika bua kushala ne lulamatu kudi Yehowa. Neudisuike anu bua kumusankisha. Newikale anu bu Yobo. Nansha muvuaye mupete ntatu mitambe bubi, wakamba ne muoyo mujima ne: “Tshiakulekela muoyo wanyi mutoke!” to.—Yobo 27:5.
8. Mmunyi mudi kuvuluka mutshipu uudi muenzele Yehowa kukuambuluisha bua kutantamena mateta?
8 Wewe uvuluka mutshipu webe kudi Yehowa, neupete bukole bua kutantamena mateta. Tshilejilu, udiku mua kusaka mananga ne mulume anyi ne mukaji wa bende anyi? Tòo. Ukavua mulaye Yehowa ne: kuakuenza bualu bua nanku to. Wewe kuyi mulekele majinga mabi ela miji munda muebe, kuakulua kudimona muenzejibue bua kuluangana nawu to. ‘Neumbuke mu njila wa bantu babi.’—Nsu. 4:14, 15.
9. Mmunyi mudi kuvuluka mutshipu uudi muenzele Yehowa kukuambuluisha kabidi bua kuteka malu a ntendelelu wende kumpala?
9 Newenze tshinyi muntu yeye mukukebele mudimu udi ukupangisha bua kubuela mu bisangilu pa tshibidilu? Newikale mumanye tshia kuenza bualu pauvua mudilambule, uvua muangate dipangadika dia kubenga mudimu wa nanku. Dîba adi, kuakuwitaba ne meji a ne: neulue anu kudienzeja bua kuteka malu a Yehowa kumpala to. Wewe uvuluka muvua Yezu mudisuike bua kusankisha Tatuende, neubenge tshintu tshionso tshiudi mumanye ne: ntshifuane kunyingalaja Nzambi.—Mat. 4:10; Yone 8:29.
10. Mmunyi muakuambuluisha Yehowa bua ‘utungunuke ne kulonda’ Yezu panyima pa batismo webe?
10 Tshiwenza kumpala kua ntatu ne mateta netshileje biwikala musue ‘kutungunuka ne kulonda’ Yezu. Wewe muenze malu bimpe, Yehowa neakuambuluishe bua kutungunuka ne kulonda Yezu. Bible udi wamba ne: “Nzambi ngua lulamatu, ne kakulekela bua nutetshibue ne diteta dinudi kanuyi mua kutantamena, kadi mu diteta adi yeye nealongolole kabidi njila wa kupatukila, bua numone mua kunanukila mu diteta adi.”—1 Kol. 10:13.
MUA KUTUNGUNUKA NE KULONDA YEZU
11. Ngumue mushindu kayi mutambe buimpe wa kutungunuka ne kulonda Yezu? (Tangila kabidi tshimfuanyi.)
11 Yezu uvua ne tshisumi, ne uvua usambila bua kushala pabuipi ne Yehowa. (Luka 6:12) Umue mushindu mutambe buimpe wa kutungunuka ne kulonda Yezu panyima pa batismo webe ngua kutungunuka ne kuenza malu adi akusemeja pabuipi ne Yehowa. Bible udi wamba ne: “Mu mushindu utudi baye kumpala, tutungunuke ne kuenda mu bulongame mu njila wa muomumue eu.” (Filip. 3:16) Nebakuambile malu a bena Kristo netu bavua badifile bikole mu mudimu wa Nzambi. Pamuapa bavua baye mu Kalasa ka bamanyishi ba Bukalenge anyi baye kuambuluisha muaba udibu dijinga ne bamanyishi ba bungi. Wewe ne mushindu wa kuenza malu aa, uenze pebe. Bantemu ba Yehowa batu basue kuenzela Yehowa mudimu wa bungi. (Bien. 16:9) Netuambe tshinyi biwikala kuyi mua kuenza malu au mpindieu? Kuedi meji ne: udi mushadile kudi badi baenza to. Tshia mushinga ntshia kutungunuka ne kunanukila. (Mat. 10:22) Kupu muoyo ne: udi usankisha Yehowa bikole paudi udifila mu mudimu wende bilondeshile nsombelu webe to. Au ke mushindu muimpe wa kutungunuka ne kulonda Yezu panyima pa batismo webe.—Mis. 26:1.
Wewe mumane kubatijibua, difundila malu a kuenza akusemeja pabuipi ne Yehowa (Tangila tshikoso tshia 11)
12-13. Tshisumi tshiebe tshiotshi tshituadije kukepela, mbimpe wenze tshinyi? (1 Kolinto 9:16, 17) (Tangila kabidi kazubu ka “Shala mu lubilu.”)
12 Tshia kuenza ntshinyi wewe mumone ne: kutshiena usambila ne muoyo mujima, mudimu webe wa buambi kautshiena ukusankisha, ne dibala diebe dia Bible dikadi dikutonda? Biobi bituadije kukuenzekela nanku panyima pa batismo webe, kudiambidi ne: kutshiena ne nyuma wa Yehowa to. Meji etu atu ashintuluka bu mutudi bena mpekatu. Tshisumi tshiebe tshiotshi tshituadije kukepela, uvuluke mupostolo Paulo. Nansha muvuaye udienzeja bua kuidikija Yezu, kuvua misangu ivua dijinga diende dia kuenza malu mimpe diteketa. (Bala 1 Kolinto 9:16, 17.) Wakamba ne: “Nansha meme ngenza nunku kabiyi ku disua dianyi, ntshidi anu ne bulami budibu bampeshe.” Mêyi aa adi aleja ne: uvua mudisuike bua kuenza mudimu wende kayi wimanyina pa mushindu uvuaye umvua to.
13 Wewe pebe, kuangatshi mapangadika mimanyine pa muudi udiumvua to. Ikala mudisuike bua kuenza malu mimpe kuyi wimanyina pa muudi udiumvua to. Wewe wenza anu malu mimpe, meji ebe adi mua kulua kuakana. Wewe mulame tshibidilu tshiebe tshia kudilongela, kusambila, kubuela mu bisangilu, ne kuyisha, neutungunuke ne kulonda Yezu panyima pa batismo webe. Tshilejilu tshiebe netshikoleshe kabidi bena Kristo nebe.—1 Tes. 5:11.
‘TUNGUNUKAYI NE KUDITETA . . . TUNGUNUKAYI NE KUDIPIMA’
14. Ntshinyi tshiudi ne bua kuikala ukonkonona? Bua tshinyi? (2 Kolinto 13:5)
14 Wewe mumane kubatijibua, mbia mushinga bua kutungunuka ne kudikonkonona. (Bala 2 Kolinto 13:5.) Ikala udikonkonona bua kumona ni utu usambila dituku dionso, udibadila Bible ne umulonga, ubuela mu bisangilu ne uyisha. Ikala wenza malu aa ne disanka, wenza bua akuambuluishe. Tshilejilu, diebeja ne: ‘Ndiku mukumbane bua kumvuija bakuabu malongesha a nshindamenu a mu Bible anyi? Kudiku tshindi mua kuakaja bua mudimu wa buambi wikale unsankisha bikole anyi? Ntuku nsambila ne muoyo mujima, bileja ne: ndi mueyemene Yehowa bikole anyi? Ntu mbuela mu bisangilu pa tshibidilu anyi? Mmunyi mundi mua kushala ne ntema ya bungi mu bisangilu ne kufilamu mandamuna mimpe?’
15-16. Bualu bua Robert budi bukulongesha tshinyi bua kutantamena mateta?
15 Mbimpe wikale kabidi mumanye matekete ebe. Ke tshivua Robert muenze. Udi wamba ne: “Pantshivua ne bidimu bu 20, mvua ngenza mudimu wa mêba makese. Dimue edi panyima pa mudimu, muena mudimu wetu mukuabu wa bakaji wakambikila kuende. Kungambilaye ne: netuikale anu nende babidi ne ‘netupitshishe tshikondo tshimpe.’ Ngakanji kubenga bienze bu ne: mvua ngelakana. Kadi ngakalua kubenga ne muoyo mujima, meme kumumvuija kabidi tshimvua mubengele.” Robert ngua kuela diboko muulu bua muvuaye mutantamene diteta adi. Kadi pakaluaye kuela meji a bualu abu, wakamona ne: uvua muenze katshilema. Udi wamba ne: “Tshivua mubenge dilomba dia mukaji au ne lukasa ne muoyo mujima bu muvua Jozefe mubenge dia mukaji wa Potifâ to. (Gen. 39:7-9) Ke bualu kayi ngakalua kukema bua muvuabi binkolele bua kubenga dilomba diende. Bualu ebu mbuenze bua mmone ne: bidi bikengela nkoleshe bulunda buanyi ne Yehowa.”
16 Anu bu Robert, kudikonkonona mushindu eu kudi mua kukuambuluisha pebe. Nansha wewe mutantamene diteta, mbimpe anu udiebeje ne: ‘Mbingangate tshikondo bule kayi bua kubenga bualu abu?’ Wewe mumone ne: kudi tshia kuakaja, kudipishi to. Sanka bua muudi mumanye butekete buebe. Buleje Yehowa mu disambila, ne udisuike bikole bua kutumikila mikenji yende ya malu a bikadilu.—Mis. 139:23, 24.
17. Mmushindu kayi uvua tshivua Robert muenze tshitumbishisha Yehowa?
17 Bualu bua Robert ebu budi ne dilongesha dikuabu. Udi wamba ne: “Pangakabenga dibikila dia muena mudimu wetu au, wakangambila ne: ‘Udi mukuate diteta!’ Meme kumuebeja ne: ‘Ngusua kuamba tshinyi?’ Yeye kundeja ne: mulunda wende mukuabu wa balume uvua katshiyi Ntemu uvua mumuambile ne: bansonga bonso Bantemu ba Yehowa batu benza mpekatu mu musokoko padibu bapeta mushindu wa kumuenza. Ke yeye kuambila mulunda wende au ne: ‘Nentete Robert bua kumona ni utu pende nanku.’ Bivua binsankishe bikole bua mumvua mutumbishishe Yehowa.”
18. Udi mudisuike bua kuenza tshinyi panyima pa batismo webe? (Tangila kabidi kazubu ka “Biena-bualu bibidi biakuambuluisha.”)
18 Paudi udilambula kudi Yehowa ne ubatijibua, udi uleja muudi musue kujidila dîna diende nansha bia kumona lufu. Manya ne: Yehowa udi umona ntatu ne mateta audi nawu. Neakubeneshe paudi udienzeja bua kushala ne lulamatu. Neakupeshe nyuma muimpe bua upete bukole bua kushala mumulamate. (Luka 11:11-13) Yehowa neakuambuluishe bua utungunuke ne kulonda muanende Yezu panyima pa batismo webe.
NEWANDAMUNE MUNYI?
Mmu ngumvuilu kayi mudi bena Kristo bambula ‘mutshi wa makenga ku dituku ne ku dituku’?
Ntshinyi tshiudi ne bua kuenza bua ‘kutungunuka ne kulonda’ Yezu panyima pa batismo webe?
Mmunyi mudi mutshipu uudi wenzela Yehowa ukuambuluisha bua kushala ne lulamatu?
MUSAMBU WA 89 Teleja, utumikile, bua bakubeneshe