TSHIENA-BUALU TSHIA KULONGA 21
MUSAMBU WA 107 Tshilejilu tshia Nzambi tshia dinanga
Muudi mua kupeta wa kubuela nende mu dibaka
“Udi mua kupeta mukaji wa tshitembu nnganyi? Mushinga wende ngua bungi kupita wa mabue a koraye.”—NSU. 31:10.
LUNGENYI LUNENE
Netuakule bua mêyi manene a mu Bible adi mua kuambuluisha muntu bua kupeta wa kubuela nende mu dibaka udi mukumbane ne mudi bena mu tshisumbu mua kuambuluisha bajike badi bajinga kubuela mu dibaka.
1-2. a) Mmalu kayi adi muena Kristo ne bua kuenza kumpala kua kutuadija kutantshila muntu? b) “Ditantshilangana” didi diumvuija tshinyi? (Tangila “diumvuija.”)
UDI musue kubuela mu dibaka anyi? Nansha mudibi anu kabiyi bikengela kubuela mu dibaka bua kupeta disanka, bena Kristo bajike ba bungi (batshidi bansonga ne bakadi bakole) badi dijinga ne kupeta wa kubuelabu nende mu dibaka. Kadi kumpala kua wewe kutantshila muntu, udi ne bua kuikala mu malanda makole ne Yehowa, kudimanya bimpe, ne kuikala mukumbane bua kuambula majitu a mu dibaka.a (1 Kol. 7:36) Wewe muenze nanku, dibaka diebe nedikale dimpe.
2 Kadi kabitu anu bipepele bua kupeta wa kubuela nende mu dibaka udi mukumbane to. (Nsu. 31:10) Nansha wewe mupete muntu uudi musue kumanya bimpe, kabitu anu bipepele bua kutuadija kumutantshila to.b Mu tshiena-bualu etshi, netuakule bua mudi muena Kristo mujike mua kupeta wa kubuelaye nende mu dibaka ne kutuadija kumutantshila. Netumone kabidi mudi bena mu tshisumbu mua kuambuluisha badi basue kubuela mu dibaka.
MUA KUPETA WA KUBUELA NENDE MU DIBAKA UDI MUKUMBANE
3. Mmalu kayi adi muena Kristo mujike ne bua kumanya padiye ukeba wa kubuela nende mu dibaka?
3 Kumpala kua kutuadija kutantshila wa wewe kubuela nende mu dibaka, udi ne bua kumanya ngikadilu iudi ujinga bua ikale nayi. Tshianana udi mua kulekela wa kubuela nende mu dibaka udi mukukumbanyine, anyi udi mufuane kutungunuka ne kutantshilangana ne udi kayi mukukumbanyine to. Manya ne: anu muena Kristo udi mubatijibue ke uudi ne bua kubuela nende mu dibaka. (1 Kol. 7:39) Kadi muena Kristo yonso udi mubatijibue ki ngudi mukumbane bua wewe kubuela nende mu dibaka to. Diebeja ne: ‘Ntshinyi tshindi njinga kuenza mu nsombelu wanyi? Nngikadilu kayi indi musue bua ungabuela nende mu dibaka ikale nayi? Ndiku ne kantshinkatshi bua ngikadilu indi nkeba kudiye anyi?’
4. Mmalu kayi adi bamue balombe Yehowa mu masambila?
4 Kakuyi mpata, ukadi musambile bua kupeta wa wewe kubuela nende mu dibaka biwikala ne dijinga adi. (Filip. 4:6) Nansha mudi Yehowa kayi mulaye bua kukukebela wa wewe kubuela nende mu dibaka, mmumanye dijinga diebe ne muudi umvua. Neakuambuluishe bua upete wa wewe kubuela nende mu dibaka udi mukukumbanyine. Nanku tungunuka ne kumuleja dijinga diebe adi ne muudi umvua. (Mis. 62:8) Mulomba lutulu ne meji. (Yak. 1:5) Johnc wa mu Etats-unis utshidi mujike udi uleja malu atuye wamba mu masambila ende. Udi wamba ne: “Ntu ngambila Yehowa ngikadilu indi nkeba kudi mukaji undi musue kusela, mmulombe bua ntuilangane ne mukaji au, ne bua mpete ngikadilu yamvuija mulume muimpe.” Tanya, muanetu wa bakaji wa mu Sri Lanka, udi wamba ne: “Mu tshikondo tshindi muindile mulume walua kunsela, ndi ndomba Yehowa bua nshale ne lulamatu kudiye ne ngikale ne disanka.” Nansha wewe kuyi mupete wa kubuela nende mu dibaka ne lukasa, Yehowa mmulaye ne: neatungunuke ne kukunanga ne kukutabalela.—Mis. 55:22.
5. Ndîba kayi didi muena Kristo mujike mua kutuilangana ne bajike bakuabu badi banange Yehowa? (1 Kolinto 15:58) (Tangila kabidi tshimfuanyi.)
5 Bible udi utulomba bua tuikale ne “bia bungi bia kuenza mu mudimu wa Mukalenge.” (Bala 1 Kolinto 15:58.) Wewe mudifile mu mudimu wa Yehowa ne usomba ne bena Kristo nebe ba mishindu yonso, neudie nabu bulunda bukole, ne neupete mpunga ya kutuilangana ne bajike bakuabu badi pabu badifile mu mudimu wa Yehowa. Wewe udienzeja bua kusankisha Yehowa, neupete disanka dilelela.
Wewe mudifile mu mudimu wa Yehowa ne usomba ne bena Kristo netu bashilashilangane, udi bua kutuilangana ne bakuabu badi basue kubuela mu dibaka (Tangila tshikoso 5)
6. Ntshinyi tshidi bena Kristo bajike ne bua kumanya padibu bakeba wa kubuelabu nende mu dibaka?
6 Kadi wamanya! Dikeba dia wa kubuela nende mu dibaka kadiangatshi muaba wa kumpala kuudi to. (Filip. 1:10) Bua muntu kupeta disanka dilelela, kabiena bikengela ikale mu dibaka anyi mujike to; kadi udi ne bua kuikala mu malanda makole ne Yehowa. (Mat. 5:3) Pautshidi mujike, udi ne mushindu wa kuenzela Yehowa mudimu wa bungi. (1 Kol. 7:32, 33) Enza malu bimpe mu tshikondo atshi. Jessica wa mu Etats-unis wakaluabu kusela pakavuaye ne bidimu bitue ku 40 udi wamba ne: “Pantshivua mujike mvua nyisha bikole, ke tshiakangambuluisha bua kuikala ne disanka nansha mumvua musue bua bansele.”
KEBA DÎBA DIA KUMULONGA
7. Bua tshinyi mbia meji bua kuangata tshikondo bua kulonga muntu uudi musue kubuela nende mu dibaka kumpala kua kumuambila dijinga diebe? (Nsumuinu 13:16)
7 Tshia kuenza ntshinyi wewe wela meji ne: muntu kampanda eu mmukumbane bua kubuela nende mu dibaka? Mbimpe umuambile diakamue dijinga diebe anyi? Bible udi wamba ne: muntu mudimuke utu wenza malu ne dimanya. (Bala Nsumuinu 13:16.) Nanku kumpala kua kuambila muntu uudi musue kubuela nende mu dibaka dijinga diebe, mbia meji bua wewe kuanji kuangata tshikondo tshia kumulonga kayi mumanye to. Muanetu wa balume Aschwin wa mu Pays-bas udi wamba ne: “Majinga atu atukuata ne lukasa, aya kabidi ne lukasa. Nunku wewe muangate dîba dia kulonga muntu bimpe, kuakutuadija kutantshilangana nende anu bualu udi ukusamina muoyo to.” Kupita apu, wewe mukebe dîba dia kumulonga bimpe, pamuapa neujingulule ne: ki mmukumbane bua wewe kubuela nende mu dibaka to.
8. Mmunyi mudi muanetu mujike mua kulonga udiye musue kubuela nende mu dibaka? (Tangila kabidi tshimfuanyi.)
8 Mmunyi muudi mua kulonga muntu uudi musue kubuela nende mu dibaka kayi umanya ne: udi umulonga? Panudi mu bisangilu anyi muaba mukuabu, udi mua kulonga bumuntu buende, bikadilu biende, ne kudienzeja bua kumanya malu ende a mu nyuma. Mmudie bulunda ne bantu ba mushindu kayi? Mmalu kayi atuye musue kuakula? (Luka 6:45) Nudi nende ne bipatshila bia muomumue anyi? Udi mua kuebeja bakulu ba mu tshisumbu tshiabu anyi bena Kristo bakuabu bashindame mu nyuma badi bamumanye bimpe. (Nsu. 20:18) Bebeja bakuambile lumu luende ne bikadilu biende. (Luta 2:11) Paudi wenda umulonga, wepuke dimutondesha nsombelu, tuambe ne: unemeke mudiye umvua, kuikadi anu padiye dîba dionso, ne kujingi kumanya kaalu ne kaalu konso kadi kamutangila to.
Keba dîba dia kulonga muntu uudi musue kubuela nende mu dibaka mu musokoko kumpala kua kumuambila dijinga diebe adi (Tangila tshikoso tshia 7-8)
9. Kumpala kua kuleja uudi ujinga kubuela nende mu dibaka dijinga diebe, udi ne bua kuikala mutuishibue ne bualu kayi?
9 Udi ne bua kulonga muntu mukantshi mua tshikondo bule kayi kumpala kua kumuleja dijinga diebe? Wewe muye ne malu mu tshiputuku, neamone ne: kuena wela meji bimpe kumpala kua kuangata mapangadika to. (Nsu. 29:20) Kadi bikalaye mujingulule ne: udi mumunange, wewe munengeshe malu, neamone ne: kuena mukumbane bua kudiangatshila mapangadika to. (Muam. 11:4) Wamanya! Kumpala kua kumuleja dijinga diebe, kabiena bikengela anu wikale mutuishibue ne: yeye ke uwabuela nende mu dibaka to. Kadi mbimpe wikale mutuishibue ne: ukadi pabuipi bua kubuela mu dibaka, ne uudi ujinga kubuelamu nende dibaka mmukukumbanyine.
10. Wewe mumone ne: muntu kampanda mmukunange pebe wewe kuyi mumunange, tshiudi ne bua kuenza ntshinyi?
10 Kadi tshia kuenza ntshinyi wewe mumone ne: muntu kampanda mmukunange? Wewe kuyi musue kunangangana nende, enza malu amuleja ne: kuena musue to; bualu kusaka muntu bua kuela meji ne: udi mumunange pebe mu bulelela kuyi mumunange, nkupanga kua dinanga.—1 Kol. 10:24; Ef. 4:25.
11. Wewe ne bua kukebelangana wa kubuela nende mu dibaka, mmalu kayi audi ne bua kumanya?
11 Mu amue matunga, baledi anyi bantu bakuabu bakole ke batu ne mudimu wa kukebela bena mu mêku abu batshidi bajike wa kubuelabu nende mu dibaka. Mu makuabu, bena mu dîku anyi balunda ke batu ne mudimu au, pashishe benza bua batuilangane bua kumona ni mbasue kutantshilangana. Muntu yeye mukulombe bua kumukebela wa kubuelaye nende mu dibaka, mbimpe umanye majinga ende ne a uudi umukebela, umanye kabidi bidibu basue. Wewe mumone ne: muntu uudi mupete mmukumbane, keba bua kumanya bumuntu buende ne bikadilu biende. Umanye nangananga bikalaye mu malanda makole ne Yehowa. Kuikala mu malanda makole ne Yehowa nkupite kuikala muntu wa makuta, wa milongo ya kuulu, anyi udi mulonge tulasa tua bungi. Nansha nanku, wikale mumanye ne: yonso wa ku bana betu abu ke udi ne bua kudiangatshila dipangadika dia ndekelu.—Gal. 6:5.
MUA KUTUADIJA DITANTSHILANGANA
12. Wewe musue kubangila muntu, mmunyi muudi mua kumuambila dijinga diebe?
12 Wewe musue kubangila muntu, mmunyi muudi mua kumuambila dijinga diebe?d Udi mua kumuambidiladi ku telefone anyi kumubikidila muaba wa kanuyi babidi to. Muleja patoke ne: udi mumunange ne udi musue kumumanya bimpe. (1 Kol. 14:9) Biobi bikumbana, udi mua kumushila tshikondo tshia yeye kuela meji bua kulua kukuandamuna. (Nsu. 15:28) Kadi yeye mubenge, unemeke dipangadika diende.
13. Tshia kuenza ntshinyi muntu yeye mukuambile ne: mmukunange? (Kolosayi 4:6)
13 Kadi tshia kuenza ntshinyi muntu yeye mukuambile ne: mmukunange? Manya ne: mbimulombe pamuapa dikima dia bungi bua kukuambila dijinga diende adi. Nanku muandamuna ne kanemu ne bukalanga. (Bala Kolosayi 4:6.) Muambila biwikala musue bua akushile tshikondo tshia wewe kuela meji. Kadi udienzeje bua kulua kumuandamuna ne lukasa. (Nsu. 13:12) Wewe kuyi musue, umuleje patoke ne dîyi dimpe. Mona muvua Hans wa mu Autriche muandamune muanetu wa bakaji uvua umulomba bua amusele. Udi wamba ne: “Ngakamuleja dipangadika dianyi patoke ne dîyi dimpe. Tshivua musue bua ashale muntekemene to. Bua bualu abu, ngakadisuika bua kubenga kumuambila dîyi anyi kumuenzela kabualu kavua mua kumufikisha ku diela meji ne: mvua mua kushintulula dipangadika dianyi adi.” Kadi muambila biwikala muitabe bua kutantshilangana nende, pashishe nuyukile nende bua malu anuenza mu tshikondo tshia ditantshilangana. Bua bilele bia kuenu anyi malu makuabu, biudi musue kuenza tshikondo atshi bidi mua kushilangana ne bidiye yeye musue.
MMUNYI MUDI BAKUABU MUA KUAMBULUISHA BENA KRISTO BAJIKE?
14. Mmunyi mudi mêyi etu mua kukankamija bena Kristo netu batshidi bajike?
14 Mmunyi mutudi mua kukankamija bena Kristo netu badi basue kubuela mu dibaka ne kubambuluisha? Umue mushindu utudi mua kuenza nanku ngua kutabalela bitudi tubambila. (Ef. 4:29) Tudi mua kudiebeja ne: ‘Ntuku nsaka bana betu bajike bua kubuela mu dibaka nansha mu bilele anyi? Pantu mmona bajike babidi bayukila, ntu ngela meji ne: bakadi banangangane anyi?’ (1 Tim. 5:13) Kupita apu, katufikishi bajike ku didimona bu bashadile bualu ki mbanji kubuela mu dibaka to. Hans utukadi batele udi wamba ne: “Bana betu bakuabu batu bangambila ne: ‘Utshidi muindile tshinyi bua kusela? Si ukadi mukumbane.’ Mêyi a buena aa adi afikisha bajike ku didimona kabayi ne mushinga ne ku didiumvua benzejibue bua kubuela mu dibaka ne lukasa.” Tuetu tukeba mpunga ya kuela bana betu bajike kalumbandi, netshikale bualu buimpe be!—1 Tes. 5:11.
15. a) Bilondeshile dîyi dinene didi mu Lomo 15:2, ntshinyi tshitudi ne bua kumanya kumpala kua kukebela muntu wa kubuelaye nende mu dibaka? (Tangila kabidi tshimfuanyi.) b) Mmalongesha kayi audi mupete mu filme?
15 Kadi tshia kuenza ntshinyi tuetu bamone ne: muanetu wa balume kampanda ne wa bakaji batshidi bajike badi mua kuenza dibaka dimpe? Bible udi utulomba bua kunemeka mmuenenu wa bakuabu. (Bala Lomo 15:2.) Bajike ba bungi kabatu basue bua babakebele wa kubuelabu nende mu dibaka to. Nanku, tudi ne bua kunemeka dipangadika diabu. (2 Tes. 3:11) Bakuabu badi mua kujinga bua tubakebele wa kubuelabu nende mu dibaka, kadi bobu kabayi batuambile, katubakebediye to.e (Nsu. 3:27) Bamue bajike kabatu basue kubatuangaja buludiludi ne muntu utudi babakebele to. Lydia wa mu Allemagne udi wamba ne: “Udi mua kubikila muanetu wa balume ne wa bakaji pamue ne bantu bakuabu ba bungi. Udi mua kukeba patupu mpunga idi muanetu wa balume ne wa bakaji mua kutuilangana ne kubalekela bua badiangatshile dipangadika.”
Kusombeshangana ne bena Kristo netu mu tshibungi kudi kupetesha bajike mpunga wa kutuilangana (Tangila tshikoso tshia 15)
16. Mmalu kayi adi bena Kristo bajike ne bua kumanya?
16 Tuetu bonso, bajike nansha basele, tudi mua kupeta nsombelu wa disanka! (Mis. 128:1) Biwikala ukeba wa wewe kubuela nende mu dibaka kadi kuyi muanji anu kumupeta, tungunuka ne kudifila mu mudimu wa Yehowa. Muanetu wa bakaji wa mu Macao diende Sin Yi udi wamba ne: “Patudi tufuanyikija tshikondo tshia bujike ne tshiwasomba ne muena dibaka nebe mu Mparadizu, tshia bujike ntshîpi bikole menemene. Nanku nanga tshikondo tshiebe tshia bujike ne udifile anu mu dienza malu mimpe.” Kadi netuambe tshinyi biwikala mupete wa wewe kubuela nende mu dibaka ne nuenu batuadije kutantshilangana? Mu tshiena-bualu tshialonda, netuakule bua tshia kuenza bua kutantshilangana bimpe.
MUSAMBU WA 137 Bakaji ba lulamatu ne bakaji bena Kristo
a Bua kumanya ni ukadi pabuipi bua kubuela mu dibaka, bala tshiena-bualu tshia “Ditantshilangana—Tshitupa 1: Ndi pabuipi bua kutantshilangana anyi?” tshidi mu jw.org.
b DIUMVUIJA: Mu tshiena-bualu etshi ne mu tshialonda, “ditantshilangana” didi diumvuija tshikondo tshidi mulume ne mukaji balongangana bikadilu bua kumona ni mbakumbanangane bua dibaka. Mu amue matunga, batu babikila tshikondo etshi ne: ntshikondo tshia dilongangana bikadilu. Ditantshilangana didi dituadija padi mulume ne mukaji bambilangana ne: mbanangangane, ne diya too ne ku dibaka anyi padibu badimanyika.
c Tudi bashintulule amue mêna.
d Mu imue miaba, mulume ke utu wela mukaji dîyi. Nansha nanku, ki mbibi bua muanetu wa bakaji kulomba wa balume bua amusele to. (Luta 3:1-13) Bua kumanya malu makuabu, bala tshiena-bualu tshia “Les jeunes s’interrogent . . . Comment lui dire ce que je ressens pour lui?” mu Tabulukayi! wa 22/10/2004 mu Mfualansa.
e Tangila filme wa Mu batshimunyi ba mvita ya ditabuja . . . Mudi bena Kristo batshidi bajike, mu jw.org.