TSHIENA-BUALU TSHIA KULONGA 20
MUSAMBU WA 67 ‘Ambila bantu Dîyi dia Nzambi’
Dinanga dikusake bua kutungunuka ne kuyisha
“Badi ne bua kuanji kuyisha lumu luimpe mu bisamba bionso.”—MÂKO 13:10.
LUNGENYI LUNENE
Mudi dinanga ditusaka bua kuamba lumu luimpe ne tshisumi ne muoyo mujima.
1. Mmalu kayi avuabu batuambile mu tshisangilu tshia ku tshidimu tshia mu 2023?
MU TSHISANGILU tshia ku tshidimu tshia mu 2023,a bavua bakajilulamu ngumvuilu wa malongesha etu ne batumanyisha malu avua matusankishe bua mudimu wa buambi. Tshilejilu, tuvua balongamu ne: pamuapa bantu nebalue batendeledi ba Yehowa nansha panyima pa dibutuka dia Babilona Munene. Bavua batumanyishe kabidi ne: kutuadijila mu ngondo wa 11 wa 2023, kabakuikala batulomba bua kufunda bionso bitudi benze mu buambi mu luapolo to. Malu adibu bashintulule aa adiku enza bua tukepeshe tshisumi tshietu mu mudimu wa buambi anyi? Tòo!
2. Bua tshinyi dituku dionso didi dipita edi didi divuija mudimu wetu wa buambi wa kuenza ne mitalu ya bungi? (Mâko 13:10)
2 Dituku dionso didi dipita edi, didi dienza bua tumanyishe lumu luimpe ne mitalu ya bungi. Bua tshinyi? Bualu nshikidilu ukadi mulembelele. Tumonayi tshivua Yezu muleje bua mudimu wa buambi mu matuku a ku nshikidilu aa. (Bala Mâko 13:10.) Mukanda wa Matayi udi uleja ne: Yezu uvua muambe ne: lumu luimpe luvua ne bua kuyishibua pa buloba bujima kumpala kua “nshikidilu” kulua. (Mat. 24:14) Nshikidilu au ngua ndongoluelu wa malu mubi eu. Yehowa ukadi mukose “dituku ne dîba” dialua nshikidilu. (Mat. 24:36; 25:13; Bien. 1:7) Dituku dionso didi dipita edi didi ditusemeja pabuipi ne dituku dia nshikidilu. (Lomo 13:11) Mu dindila dituku adi, tudi ne bua kutungunuka ne kuyisha.
3. Tshidi tshitusaka bua kuamba lumu luimpe ntshinyi?
3 Monayi lukonko lua mushinga lutudi ne bua kuelela meji: Tshitu tshitusaka bua kuamba lumu luimpe ntshinyi? Ndinanga. Patudi tuyisha, tudi tuleja mutudi banange lumu luimpe, mutudi banange bantu netu, ne nangananga mutudi banange Yehowa ne dîna diende. Tukonkononayi malu aa ku bumue ku bumue.
TUDI TUYISHA BUALU TUDI BANANGE LUMU LUIMPE
4. Ntshinyi tshitutu tumvua patubu batumanyisha lumu luimpe?
4 Elabi meji muuvua mumvue pavuabu bakuambile lumu lua disanka lua ne: muanenu mmulele, peshi lua ne: mbakupetele mudimu uuvua ukeba. Pamuapa disanka diuvua mumvue divua dikusake bua kulumanyisha bena mu dîku dienu anyi balunda bebe. Pavuabu bakuambile lumu luimpe lua Bukalenge bua Nzambi ludi lupite ngumu yonso ku buimpe, uvua mumvue disanka dia muomumue adi anyi?
5. Ntshinyi tshiwakumvua pakakuambilabu lumu luimpe bua musangu wa kumpala? (Tangila kabidi bimfuanyi.)
5 Vuluka muwakumvua pavuabu bakuambile lumu luimpe bua musangu wa kumpala. Wakamanya ne: Tatuebe wa mu diulu mmukunange, mmusue bua ulue mulunda wende, mmulaye bua kujikija ntatu yebe, bua kujula bantu baudi mufuishe, ne malu makuabu a bungi. (Mâko 10:29, 30; Yone 5:28, 29; Lomo 8:38, 39; Buak. 21:3, 4) Malu aa akakuenza disanka dia bungi. (Luka 24:32) Wakaananga, wewe kupeta ne dijinga dia kuambila bakuabu.—Fuanyikija ne Yelemiya 20:9.
Pakatuambilabu lumu luimpe bua musangu wa kumpala, tuakumvua disanka dia bungi; tuetu kupeta kabidi dijinga dia kuluambila bakuabu! (Tangila tshikoso 5)
6. Bualu bua Ernest ne Rose budi butulongesha tshinyi?
6 Tumonayi bualu buakenzekela Ernest.b Tatuende wakafua patshivuaye ne bidimu bu dikumi. Ernest udi wamba ne: “Mvua ndiebeja ne: ‘Mmuye mu diulu anyi? Mmufuilamu bua kashidi anyi?’ Mvua ngumvuila bana bavua ne batatuabu mukawu.” Ernest uvua uya pa lukita lua tatuende, utuapu binu, usambila ne: “Nzambi wanyi, ngambilaku muaba udi tatuanyi.” Bidimu bu 17 panyima pa lufu lua tatuende, Ntemu wa Yehowa wakamulomba bua atuadije kulonga nende Bible; yeye kuitaba. Wakasanka pakamanyaye ne: bafue ki mbamanye bualu nansha bumue, badi anu bu balale tulu tukole. Bakamulongesha kabidi bua dibishibua dia bantu ku lufu dienzeka kumpala eku. (Muam. 9:5, 10; Bien. 24:15) Ndekelu wa bionso, wakapeta mandamuna a nkonko ivuaye mudiele munkatshi mua bidimu bia bungi. Ernest uvua ne disanka bua malu avuaye ulonga, ne uvua uzuka bua kumanya makuabu. Mukajende Rose wakatuadija pende kulonga Bible ne kunanga malu avuaye ulonga. Bubidi buabu bakabatijibua mu 1978. Malu a mushinga avuabu balonge au, bakaambila balela babu, balunda babu, ne bantu bakuabu ne tshisumi tshionso. Ernest ne Rose bakafikisha bantu bapite pa 70 ku dimanya Yehowa ne ku dibatijibua.
7. Tuetu banange malu atudi tulonga mu Bible, ntshinyi tshituenza?
7 Tuetu banange malu atudi tulonga mu Bible, netupete dijinga dia kuambila bakuabu. (Bala Luka 6:45.) Netumvue anu bu bayidi ba Yezu bakamba ne: “Katuena mua kulekela kuakula bua malu atudi bamone ne bumvue to.” (Bien. 4:20) Bu mutudi banange lumu luimpe bikole, tudi ne dijinga dia kulumanyisha bantu ba bungi menemene.
TUDI TUYISHA BUALU TUDI BANANGE BANTU
8. Tshidi tshitusaka bua kuambila bakuabu lumu luimpe ntshinyi? (Tangila kazubu ka “Nanga bantu ubavuije bayidi.”) (Tangila kabidi tshimfuanyi.)
8 Tudi banange bantu anu mudi Yehowa ne Muanende babanange. (Nsu. 8:31; Yone 3:16) Tudi tumvuila bantu badi “kabayi ne Nzambi” ne badi kabayi ne “ditekemena” luse lua bungi. (Ef. 2:12) Badi ne ntatu ya bungi, kadi tudi ne lumu luimpe lua Bukalenge bua Nzambi ludibu nalu dijinga. Bu mutudi babanange ne tubumvuila luse, tudi tudienzeja bikole bua kubambila lumu luimpe. Lumu luimpe elu ludi lubapetesha ditekemena, disanka, ne mpunga wa kuluabu kupeta “muoyo wa bushuwa,” tuambe ne: muoyo wa tshiendelele, mu bulongolodi bupiabupia bua Nzambi.—1 Tim. 6:19.
Tudi tudienzeja bikole bua kuambila bantu lumu luimpe bualu tudi babanange ne tubumvuile luse (Tangila tshikoso tshia 8)
9. Tudi tudimuija bantu bua malu kayi enzeka kumpala eku? Bua tshinyi? (Yehezekele 33:7, 8)
9 Tudi kabidi tudimuija bantu bua nshikidilu ukadi musemene bualu tudi babanange. (Bala Yehezekele 33:7, 8.) Tudi tumvuila bantu bonso luse, too ne balela betu badi kabayi Bantemu. Ba bungi ba kudibu mbaditue mu malu abu kabayi bamanye tshidi tshienda tshilua to. Tshidi tshienda tshilua si ‘ndikenga dinene dia buena ditu kadiyi dianji kuenzeka katshia ku tshibangidilu tshia buloba too ne mpindieu, tòo, kadiakuenzeka kabidi to.’ (Mat. 24:21) Tudi ne bua kubamanyisha tshienzeka mu tshikondo tshia dilumbuluisha tshia ne: nebanji kubutula bitendelelu bionso bia dishima ne nebalue kubutula ndongoluelu mubi wa malu eu ku Armagedone. (Buak. 16:14, 16; 17:16, 17; 19:11, 19, 20) Tudi tusambila bua bantu ba bungi bitabe tshitudi tubambila ne balue kudisangisha netu mu ntendelelu mukezuke. Kadi netuambe tshinyi bua balela betu ne bantu bakuabu badi kabayi bitaba mukenji wetu mpindieu?
10. Bua tshinyi mbia mushinga bua tuetu kutungunuka ne kudimuija bantu bua malu akadi pa kuenzeka?
10 Tuvua balonge mu tshiena-bualu tshishale ne: Yehowa udi mua kusungila bantu bamuitabuja pamonabu dibutuka dia Babilona Munene. Ke bualu kayi mbia mushinga bua kutungunuka ne kubambila malu au mpindieu. Tumanyayi ne: Malu atudi tubambila lelu ke ikala mua kubatabuluja tshikondo atshi. (Fuanyikija ne Yehezekele 33:33.) Pamuapa nebavuluke mutuvua babadimuije, ne nebangate dipangadika dia kubuela mu ntendelelu mukezuke kumpala kua nshikidilu kulua. Anu bu mulami wa buloko wa mu Filipoyi wakalua kuitaba lumu luimpe panyima pa ‘dikanka dikole dia buloba,’ pamuapa bantu badi kabayi bitaba lumu luimpe lelu nebalue kuluitaba panyima pa dibutuka dibi dia Babilona Munene.—Bien. 16:25-34.
TUDI TUYISHA BUALU TUDI BANANGE YEHOWA NE DÎNA DIENDE
11. Mmunyi mutudi tupesha Yehowa butumbi, bunême, ne bukole? (Buakabuluibua 4:11) (Tangila kabidi bimfuanyi.)
11 Bualu bunene budi butusaka bua kuyisha budi ne: tudi banange Yehowa Nzambi ne dîna diende dia tshijila. Tudi tumona mudimu wa buambi bu mushindu wa kutumbisha Nzambi wetu utudi banange. (Bala Buakabuluibua 4:11.) Tudi tuitaba ne: Yehowa Nzambi mmukumbane bua kuangata butumbi ne bunême ne bukole kudi batendeledi bende ba lulamatu. Tudi tumupesha butumbi ne bunême patudi tuleja bakuabu bijadiki bia ne: yeye ke udi ‘mufuke bintu bionso’ ne tuetu bantu. Tudi tumupesha bukole buetu patudi tudienzeja bua kufila dîba dietu, makanda etu, ne bintu bietu mu mudimu wa buambi. (Mat. 6:33; Luka 13:24; Kolos. 3:23) Mu tshikoso, tudi ne dijinga dia kuambila bantu malu a Nzambi utudi banange. Tudi kabidi ne dijinga dia kubamanyisha dîna diende ne tshidiye menemene. Bua tshinyi?
Tudi tupesha Yehowa bukole buetu patudi tufila dîba dietu, makanda etu, ne bintu bietu bua kuambila bantu lumu luimpe padiku mushindu (Tangila tshikoso tshia 11)
12. Mmunyi mutudi tujidila dîna dia Yehowa mu buambi?
12 Tutu tujidila dîna dia Yehowa bualu tudi bamunange. (Mat. 6:9) Tudi ne bua kumanyisha bantu ne: malu adi Satana muambe bua Yehowa nga dishima. (Gen. 3:1-5; Yobo 2:4; Yone 8:44) Patudi tuyisha bantu, tutu tubambila tshidi Yehowa ne tshidi bumuntu buende. Tudi basue bua bantu bamanye ne: dinanga ke ngikadilu wende munene, udi ukokesha bantu ne buakane, ne Bukalenge buende bukadi pa kujikija ntatu yetu ne kutuadila bantu bonso ditalala ne disanka. (Mis. 37:10, 11, 29; 1 Yone 4:8) Patudi tuamba malu aa mu buambi, tudi tubingisha dîna dia Yehowa. Tutu kabidi ne disanka bualu tudi tuenza malu adi Yehowa utulomba tuetu Bantemu bua kuenza. Bua tshinyi tudi tuamba nanku?
13. Bua tshinyi kuikala Ntemu wa Yehowa ndiakalenga ditambe bunene? (Yeshaya 43:10-12)
13 Yehowa mmutusungule bua tuikale “Bantemu” bende. (Bala Yeshaya 43:10-12.) Kukadi bidimu ndambu bivua mukanda wa kudi Kasumbu kaludiki muambe ne: “Kakuena tshintu tshikuabu tshidi tshipite tshia kuikala batubikila ne: Bantemu ba Yehowa to.”c Bua tshinyi bidi nanku? Tuangatabi tshilejilu etshi. Mbakufunde kua mbulamatadi ne: udi muenze bualu bubi. Nebikulombe bua ukebe ntemu udi mua kukuakuila, udi mua kujadika ne: udi muntu muimpe udi kayi mua kuenza bidibu bakubanda abi to. Bidi bikengela ne: ntemu au ikale muntu uudi mumanye ne uudi weyemena, ne ikale ne lumu luimpe bua bakuabu bitabe bidiye wamba bipepele. Padi Yehowa mutusungule bua tuikale Bantemu bende, bidi bileja mudiye mutumanye bimpe ne mudiye utueyemena bua kujadikila bakuabu ne: anu yeye ke Nzambi mulelela. Mbunême kutudi bua kuikala Bantemu bende, bienza bua tubabidile mpunga yonso itudi nayi bua kujadikila bantu ne: malu mabi onso adibu bamubanda nawu nga dishima. Mushindu eu ke utudi tuenza malu mu diumvuangana ne dîna dietu dia Bantemu ba Yehowa.—Mis. 83:18; Lomo 10:13-15.
TUYISHAYI TOO NE PALUA NSHIKIDILU
14. Mmalu kayi mimpe akadi pa kuenzeka?
14 Malu a katshia mmatuindile kumpala eku! Bu mudi Yehowa utubenesha, tudi batekemene bua kumona bantu ba bungi balua kudisangisha netu mu ntendelelu mukezuke kumpala kua dikanga dinene kutuadija. Tudi kabidi ne disanka dia ne: nansha mu dikenga dinene, tshikondo tshia ntatu itu kayiyi mianji kukuata bantu, bantu ba bungi badi mua kupatuka mu bulongolodi bua Diabolo ebu ne kudisangisha netu bua kutumbisha Yehowa.—Bien. 13:48.
15-16. Netutungunuke ne kuenza tshinyi? Too ne dîba kayi?
15 Tudi ne mudimu wa kuenza tshikondo etshi. Mmudimu utuikala katuyi mua kuenza kabidi to. Tudi ne diakalenga dia kuambila bantu lumu luimpe lua Bukalenge bua Nzambi pa buloba bujima. Tutungunukayi kabidi ne kubadimuija bua malu akadi pa kuenzeka. Mbimpe bantu bamanye ne: nshikidilu wa ndongoluelu wa malu mubi eu udi wenda ulua ne lukasa. Nunku palua dîba dia dilumbuluisha, bantu nebamanye ne: mukenji wa kudi Nzambi ke utuvua tubamanyisha.—Yeh. 38:23.
16 Mbimpe tudisuike bua kuenza tshinyi? Bu mutudi banange lumu luimpe, banange bantu netu, ne nangananga banange Yehowa ne dîna diende, netuikale ne dijinga dia kuyisha ne mitalu ne tshisumi too ne pamba Yehowa ne: “Kuajiki!”
MUSAMBU WA 54 “Njila nyeye eu”
a Tshisangilu tshia ku tshidimu atshi tshivua tshienzeke mu dia 7/10/2023, mu Nzubu wa mpuilu wa Bantemu ba Yehowa wa mu Newburgh, mu New York, mu États-Unis. Bakalua kuela tshitupa tshia kumpala tshia tshisangilu atshi ku TV wa JW wa ngondo wa 11 wa 2023, ne tshitupa tshibidi mu ngondo wa 1/2024.
b Tangila tshiena-bualu tshia Bible utu ushintulula bantu—Mandamuna a mu Bible mimpe adi umvuika avua ankemesha tshidi mu Tshibumba tshia Nsentedi tshia 1/2/2015.