Yisha ne tshisumi anu bu Yezu

1. Nngikadilu kayi udi wenza bua Bantemu ba Yehowa bikale bashilangane ne bantu badi badiamba mudibu bena Kristo?

TSHISUMIa tshidi natshi Bantemu ba Yehowa mu buambi ke bualu bumue budi buenza bua bikale bashilangane ne bantu badi badiamba mudibu bena Kristo. (Tito 2:14) Misangu mikuabu, bidi mua kukukolela bua kumvua disanka dia kuyisha. Pamuapa udi mua kumvua mukulu kampanda utu wenza mudimu bikole wamba ne: “Imue misangu tshitu ngumvua bua kuyisha to.”

2. Mmalu kayi adi mua kutupangisha bua kuikala kuyisha ne tshisumi?

² Pamuapa midimu mikuabu ya Nzambi idi mua kutusankisha bikole kupita mudimu wa kuyisha. Bua tshinyi? Bualu patudi tuibaka Nzubu yetu ya Bukalenge ne tuyilama, tuambuluisha bana betu badi batata bua bipupu anyi patudi tukankamija bena Kristo netu bakuabu, tudi tumona bipeta bimpe musangu umue ne tudi tumvua disanka. Tudi tumvua disanka patudi tuenza mudimu ne bana betu mu ditalala ne tuenza malu adi aleja mutudi banangangane. Tudi kabidi bamanye ne: badi banyisha bitudi tubenzela. Ku lukuabu luseke, tudi mua kuikala tuyisha mu teritware umue umue kukadi bidimu bia bungi, kadi anu bantu bakese tshianana ke badi bateleja mukenji wetu. Tudi kabidi bamanye ne: bu mukadi nshikidilu pabuipi, pamuapa nebaluishe mukenji wetu bikole. (Mat. 10:22) Ntshinyi tshiatuambuluisha bua kuikala anu ne tshisumi bua mudimu wa buambi anyi kutshivudija?

3. Mmunyi mudi tshilejilu tshidi mu Luka 13:6-9, tshiumvuija bimpe tshisumi tshivua natshi Yezu?

³ Tuetu bakonkonone tshilejilu tshia Yezu, netumanye tshia kuenza bua kuikala ne tshisumi mu buambi. Uvua anu uyisha ne tshisumi, kayi ulekela. Wakavudija tshisumi atshi bikole pakavuaye ku ndekelu kua mudimu wende. (Bala Luka 13:6-9.) Anu bu mukunyi wa mionji ya tumuma tua mvinyo udi mudienzeje bikole munkatshi mua bidimu bisatu bua kukolesha mutshi wa mfigi udi kawuyi mukuame, Yezu wakenza bidimu bitue ku bisatu uyisha bena Yuda, kadi ba bungi bakabenga kumuteleja. Anu bu muvua mukunyi wa mionji ya tumuma tua mvinyo au mutekemene ne: mutshi au neukuame, Yezu pende kakalekela kuyisha bantu to, kadi wakadienzeja bikole bua kuyisha lumu luimpe.

4. Mmalu kayi anayi avua Yezu muenze atuakonkonona?

⁴ Mu tshiena-bualu etshi, netumone muvua Yezu muyishe ne tshisumi, nangananga mu ngondo isambombo ya ndekelu ya mudimu wende. (Luka 10:1) Tuetu tulonga malu avuaye mulongeshe ne tuidikija malu avuaye muenze, nebituambuluishe bua kuikala ne tshisumi lelu. Tumonayi malu anayi avua Yezu muenze aa: 1) Uvua utamba kuenza disua dia Yehowa, 2) uvua wenza malu mu diumvuangana ne mêyi a buprofete, 3) uvua weyemena Yehowa bua amuambuluishe, ne 4) uvua anu mutuishibue ne: bamue bantu nebamuteleje.

UVUA UTAMBA KUENZA DISUA DIA YEHOWA

5. Ntshinyi tshivua Yezu muenze bua kuleja ne: uvua utamba kuenza disua dia Nzambi?

⁵ Yezu wakayisha “lumu luimpe lua Bukalenge” ne tshisumi bualu uvua mumanye ne: ke mudimu uvua Nzambi musue bua enze. (Luka 4:43) Kuyisha ke mudimu uvua Yezu utamba kuangata ne mushinga wa bungi menemene. Uvua uya “mu tshimenga ne mu tshimenga, mu musoko ne mu musoko” wenda ulongesha bantu nansha muvuaku kumushadile ngondo mikese bua kujikija mudimu wende. (Luka 13:22) Wakalongesha kabidi bayidi bende bakuabu bua kuyisha bakuabu anu muvuaye wenza.​—Luka 10:1.

6. Mmunyi mudi midimu mikuabu ya Nzambi itua mudimu wa diyisha mpanda? (Tangila kabidi tshimfuanyi.)

⁶ Kuyisha lumu luimpe ke mudimu wa mushinga wa bungi menemene udi Yehowa ne Yezu basue bua tuenze petu lelu anu muvuabi matuku a Yezu. (Mat. 24:14; 28:19, 20) Midimu mikuabu ya Nzambi idi itua mudimu wa diyisha mpanda. Tshilejilu, tudi tuibaka Nzubu ya Bukalenge bua bantu batudi tuyisha baluamu bua kutendelela Yehowa. Midimu itudi tuenza ku Betele ne miaba mikuabu idi payi itua mudimu wa diyisha mpanda. Tutu tupesha bana betu bintu bidibu nabi dijinga padiku bipupu ne tubambuluisha bua kuyisha ne kuikala kuenza malu makuabu a mu nyuma pa tshibidilu. Tuetu tuvuluka ne: mudimu wa kuyisha udi ne mushinga wa bungi, tuvuluka kabidi ne: mmudimu munene udi Yehowa musue bua tuenze, katuakutshioka to. Mukulu mukuabu wa mu Hongrie, diende János, udi wamba ne: “Ndi mumanye ne: kakuena mudimu wa Nzambi mukuabu udi mua kuangata muaba wa mudimu wa kuyisha to; wowu ke udi ne mushinga wa bungi menemene.”

7. Bua tshinyi Yehowa mmusue bua tutungunuke ne kuyisha? (1 Timote 2:3, 4)

⁷ Tuetu tumona bantu mudi Yehowa ubamona, tshisumi tshietu tshia kuyisha tshidi tshivula. Yehowa mmusue bua bantu ba bungi bateleje lumu luimpe ne baluitabe. (Bala 1 Timote 2:3, 4.) Bua bualu abu, udi utulongesha bua tuikale bakumbane bua kuyisha mukenji udi usungila bantu. Tshilejilu, broshire wa Nanga bantu ubavuije bayidi udi ne mibelu ya mushinga idi mua kutuambuluisha bua kutuadija kuyukila ne bantu ne tshipatshila tshia kubavuija bayidi. Nansha bantu bobu kabayi bitaba mukenji wetu lelu eu, pamuapa nebapete mpunga wa kushintuluka kumpala kua dikenga dinene kutuadija. Malu atudi tubambila mpindieu ke abasaka pamuapa bua kuitaba mukenji wetu. Badi mua kushintuluka nanku anu tuetu batungunuke ne kuyisha.

WAKENZA MALU MU DIUMVUANGANA NE MÊYI A BUPROFETE

8. Mmunyi muvua Yezu muenze mudimu bimpe ne dîba diende bu muvuaye mumanye mêyi a buprofete?

⁸ Yezu uvua mumanye muvua amue mêyi a buprofete ne bua kukumbana. Uvua mumanye ne: mudimu wende wa kuyisha uvua ne bua kuenza anu bidimu bisatu ne tshitupa. (Dan. 9:26, 27) Uvua mumanye kabidi mêyi a buprofete avua atangila dîba divuaye ne bua kufua ne mushindu uvuabu ne bua kumushipa. (Luka 18:31-34) Bu mukavuaye mumanye malu aa, wakenza mudimu bimpe ne dîba diende. Ke bualu kayi wakayisha ne tshisumi bua kujikija mudimu uvuabu bamupeshe.

9. Mmunyi mudi kumanya mêyi a buprofete kutusaka bua kuyisha ne tshisumi?

⁹ Tuetu bamanye mêyi a buprofete nebitusake bua kuyisha ne tshisumi. Tudi bamanye ne: ndongoluelu wa malu eu ukadi pa kubutuka. Tudi kabidi bamanye ne: malu adi enzeka lelu ne bikadilu bia bantu bidi bipetangana ne tshikavua Bible muambe bua tshimanyinu tshia matuku a ku nshikidilu. Tudi tumona mudi dikokangana didi pankatshi pa bukokeshi bua buloba bujima bua Grande-Bretagne ne États-Unis ne bukokeshi bua Russie ne matunga adi madisange kudibu dikumbaja dîyi dia buprofete didi diakula bua mukalenge wa ku sud ne mukalenge wa ku nord “mu tshikondo tshia ku nshikidilu.” (Dan. 11:40) Tudi bamanye kabidi ne: Makasa a lupingu adibu bakuile mu Danyele 2:43-45 adi aleja bukokeshi bua buloba bujima bua Grande-Bretagne ne États-Unis. Tudi batuishibue ne: mu katupa kîpi emu, Bukalenge bua Nzambi nebubutule mbulamatadi ya bana ba bantu anu mudi dîyi dia buprofete edi dileje. Mêyi a buprofete onso aa adi aleja ne: nshikidilu ukadi mulembelele, nunku mbimpe tuenze mudimu bimpe ne dîba dietu bua kuyisha lumu luimpe ne lukasa.

10. Fila bilejilu bia mudi mêyi a buprofete atusaka bua kuikala ne tshisumi.

¹⁰ Mêyi a buprofete adi kabidi ne mukenji utudi tuzuka bua kumanyisha bantu. Muanetu wa bakaji mukuabu wa mu République dominicaine, diende Carries, udi wamba ne: “Milayi milenga ya nsombelu muimpe utuikala nende idi insaka bua kuyisha bakuabu.” Udi wamba kabidi ne: “Pandi mmona malu adi bantu batuilangana nawu lelu, ndi mmona ne: milayi eyi idi ibatangila pabu.” Mêyi a buprofete adi atukankamija bua kubenga kuteketa mu mikolo bualu tudi bamanye ne: Yehowa udi utuambuluisha mu mudimu wa diyisha. Leila wa mu Hongrie udi wamba ne: “Mêyi adi mu Yeshaya 11:6-9 adi ansaka bua kuyisha bantu lumu luimpe nansha badi bamueneka bu ne: kabakuluitaba to. Ndi mumanye ne: Yehowa udi mua kuambuluisha muntu kayi yonso bua kushintuluka.” Muanetu mukuabu wa mu Zambie, diende Christopher, udi wamba ne: “Anu bu mukavua Mâko 13:10 mumanyishe, lumu luimpe ludi luenda lutangalaka pa buloba bujima; ndi ne disanka bua mundi ngambuluisha panyi bua dîyi dia buprofete edi kukumbanadi.” Mmêyi kayi a buprofete adi akusaka bua kutungunuka ne kuyisha?

UVUA MUEYEMENA YEHOWA BUA AKUAMBULUISHE

11. Bua tshinyi bivua bikengela bua Yezu eyemene Yehowa bua yeye kutungunuka ne kuyisha ne tshisumi? (Luka 12:49, 53)

¹¹ Yezu uvua weyemena Yehowa bua amuambuluishe bua atungunuke ne kuyisha ne tshisumi. Nansha muvuaye wakula ne kanemu, uvua mumanye ne: lumu luimpe lua Bukalenge luvua ne bua kukebesha makokianganyi ne buluishi bukole. (Bala Luka 12:49, 53.) Bu muvua Yezu uyisha, bamfumu ba bitendelelu bakakeba bua kumushipa misangu ne misangu. (Yone 8:59; 10:31, 39) Kadi Yezu wakatungunuka ne kuyisha bualu uvua mumanye ne: Yehowa uvua nende. Wakamba ne: “Tshiena nkayanyi to, kadi Tatu uvua muntume udi nanyi. . . . Kavua mundekele nkayanyi to, bualu misangu yonso ndi ngenza malu adi amusankisha.”​—Yone 8:16, 29.

12. Mmunyi muvua Yezu mulongolole bayidi bende bua bikale bayisha ne tshisumi nansha bobu babaluisha?

¹² Yezu wakavuluija bayidi bende bua bikale beyemena Yehowa bua abambuluishe. Wakabajadikila misangu ya bungi ne: Yehowa uvua ne bua kubambuluisha nansha padibu babakengesha. (Mat. 10:18-20; Luka 12:11, 12) Bua bualu abu, wakabambila bua bikale badimuke. (Mat. 10:16; Luka 10:3) Wakababela bua kabitabijiji bantu mukenji ku bukole to. (Luka 10:10, 11) Wakabambila bua kunyema padibu babakengesha. (Mat. 10:23) Nansha muvua Yezu ne tshisumi ne weyemena Yehowa, kakateka muoyo wende mu njiwu to.​—Yone 11:53, 54.

13. Bua tshinyi mbimpe wikale mutuishibue ne: Yehowa neakuambuluishe?

¹³ Tudi basue bua Yehowa atuambuluishe bua tutungunuke ne kuyisha ne tshisumi padibu batuluisha lelu. (Buak. 12:17) Bua tshinyi mbimpe wikale mutuishibue ne: Yehowa neakuambuluishe? Mona tshivua Yezu muambe mu disambila didi mu Yone nshapita wa 17. Wakalomba Yehowa bua alame bapostolo bende. Ke tshiakenza Yehowa. Mukanda wa Bienzedi udi uleja muvua Yehowa muambuluishe bapostolo bua kuyisha ne tshisumi pavuabu babakengesha. Yezu wakalomba kabidi Yehowa mu disambila adi bua kulama bantu bonso bavua ne bua kuitabuja malu avua bapostolo balongesha. Wewe pebe udi mu bantu abu. Yehowa ki mmulekele kuandamuna disambila dia Yezu adi to. Neakuambuluishe anu muvuaye muambuluishe bapostolo.​—Yone 17:11, 15, 20.

14. Bua tshinyi mbimpe tuikale batuishibue ne: netukokeshe bua kuyisha ne tshisumi? (Tangila kabidi tshimfuanyi.)

¹⁴ Bu mukadi nshikidilu mulembelele bikole, bidi mua kutukolela bikole bua kuyisha lumu luimpe ne tshisumi. Nansha nanku, netupete diambuluisha ditudi nadi dijinga. (Luka 21:12-15) Patudi tuyisha bantu, tudi tubalekela badisuinguila bua kututeleja anyi kubenga kututeleja. Tudi tubenga kukokangana nabu. Ke tshivua Yezu ne bapostolo bende benze. Nansha padibu bakandika mudimu wetu mu amue matunga, bana betu batu anu batungunuka ne kuyisha lumu luimpe bualu mbeyemene Yehowa pamutu pa kudieyemena. Yehowa neatupeshe petu bukole bua mudimu wa ‘diyisha wenzeke menemene’ mudiye musue, anu muvuaye mubupeshe bena mudimu bende ba mu bidimu lukama bia kumpala. (2 Tim. 4:17) Tudi ne bua kuikala batuishibue ne: tuetu beyemene Yehowa, netukokeshe bua kuyisha ne tshisumi.

UVUA MUTUISHIBUE NE: BAMUE BANTU NEBATELEJE

15. Bua tshinyi tudi tuamba ne: Yezu uvua mutuishibue ne: bantu nebamuteleje?

¹⁵ Yezu uvua mutuishibue ne: bamue bantu bavuaye uyisha nebamuteleje. Ke tshiakamuambuluisha bua kuikala ne disanka mu mudimu wende. Tshilejilu, tshidimu bu tshijima yeye mumane kutuadija kuyisha, wakamona ne: bantu ba bungi bavua basue kumuteleja pavuaye ubayisha. Wakabafuanyikija ne bia pa madimi bikavua bikumbane bua kunowa. (Yone 4:35) Tshidimu bu tshijima pashishe, wakalua kuambila bayidi bende ne: “Bia kunowa bidi bia bungi.” (Mat. 9:37, 38) Pashishe wakalua kubambuluila ne: “Bia kunowa bidi bia bungi . . . Lombayi Mfumu wa dinowa bua atume bena mudimu mu dinowa diende.” (Luka 10:2) Yezu uvua mushale mutuishibue ne: bamue bantu bavuaye uyisha lumu luimpe nebamuteleje. Uvua usanka pavuabu bamuteleja.​—Luka 10:21.

16. Mmunyi mudi bilejilu bivua Yezu mufile bitujadikila ne: bantu nebatuteleje? (Luka 13:18-21) (Tangila kabidi tshimfuanyi.)

¹⁶ Yezu wakalongesha bayidi bende bua bikale batuishibue ne: mukenji wabu newupatule bipeta bimpe. Nunku bivua mua kubakankamija bua kuikala ne tshisumi. Tuakulayi bua bilejilu bibidi bivua Yezu mufile. (Bala Luka 13:18-21.) Yezu uvua mufile tshilejilu tshia lutete lua mutâda bua kulongesha ne: mukenji wa Bukalenge uvua ne bua kutangalaka mu mushindu wa dikema ne kakuvua tshivua mua kuwimanyika to. Wakafila kabidi tshilejilu tshia luevene bua kuleja muvua mukenji wa Bukalenge ne bua kutangalaka pa buloba bujima ne kufikisha bantu ku dishintuluka, nansha mudi bantu bakuabu kabayi mua kumona dishintuluka edi musangu umue. Ke bualu, Yezu wakajadikila bayidi bende ne: mukenji uvuabu bayisha uvua ne bua kupatula bipeta bimpe.

17. Mmalu kayi adi atusaka bua kuikala batuishibue ne: bantu nebatuteleje patudi tubayisha?

¹⁷ Malu atudi tukumbaja mu mudimu wa buambi pa buloba bujima lelu, adi atusaka bua kutungunuka ne kuyisha ne tshisumi. Tshidimu tshionso etshi, bantu miliyo ya bungi badi bitaba bua kubuela mu Tshivuluikilu ne balonga netu Bible. Bantu binunu nkama ya bungi badi babatijibua ne batuadija kuyisha. Katuena bamanye bungi bua bantu badi bashale bua kuitaba mukenji utudi tuyisha to. Kadi tudi bamanye ne: Yehowa udi wenda usangisha musumba munene wa bantu bapanduka ku dikenga dinene didi kumpala eku. (Buak. 7:9, 14) Yehowa Mfumu wa dinowa mmutuishibue ne: kutshidi bantu ba bungi bitaba lumu luimpe. Ke bualu kayi tudi tutungunuka ne kuyisha.

18. Ntshinyi tshitudi basue bua bakuabu bambe buetu?

¹⁸ Bayidi ba Yezu batu bamanyike bua mutubu bayisha ne tshisumi. Pavua bantu bamona bapostolo bayisha ne dikima, ‘bakabanga kujingulula ne: mbantu bavua ne Yezu.’ (Bien. 4:13) Padi bantu batumona petu tuyisha ne tshisumi, bidi mua kubasaka bua kuamba ne: tudi tuidikija Yezu.